Read nande Enzũko 28 Bible Online

Enzũko 28 - nande bible

Enzũko 28

¹Neryo Ĩsaka mwabirikira Yakobo, nʼerimutsumula, nʼerimuhana, nʼerimubwira ati, Sũsyehĩkaya oko bali bʼeKanana.

²Hangana, uye ePadanĩ-aramũ, omo nyũmba ya Betũelĩ nyoko-lume wawe. Ũsyehĩkaya oko bali ba Labanĩ ye nyoko-lume wawe.

³Nyamuhanga Omũtokĩ Wʼebyosĩ akutsumule nʼerĩkũkanyĩa, nʼerikutomekera, iwabya ndeko yʼabandu.

⁴Kandi akuhe eritsumula lya Abrahamũ, ukʼuwe nʼoko bana bawe haguma nawe. Iwatoka erĩsĩgalya ekihugo ekyo ukabungiramo, ekyo Nyamuhanga aha Abrahamũ.

⁵Neryo Ĩsaka mwahamula Yakobo. Naye mwaya ePadanĩ-aramũ ewa Labanĩ mugala wa Betũelĩ Omũsũrĩa, mugala wabo Rebeka, nyĩnya wa Yakobo na Esaũ.

⁶Nĩkwa Esaũ mwalangira ngoko Ĩsaka amabitsumula Yakobo nʼerimutuma ePadanĩ-aramũ, erĩyatahĩryayo omũkalĩ. Neryo omugulu amutsumula mwamuhana, ati, Sũsyetahaya omũkalĩ oko bali bʼeKanana.

⁷Kandi mwalangira ngoko Yakobo owa tata wuwe na koyo wuwe, iniabiriya ePadanĩ-aramũ.

⁸Neryo Esaũ mwalangira ngoko bali bʼeKanana sĩbetsemesaya Ĩsaka tata wuwe.

⁹Neryo Esaũ mwaya ewa Ĩsĩmaelĩ mwahĩkya Mahalatĩ mwali wa Ĩsĩmaelĩ, mugala wa Abrahamũ, mwali wabo Nabayotĩ eribya mũkalĩ wuwe haguma nʼabandi bakalĩ abya nabo.

¹⁰Neryo Yakobo mwalũa eBerĩ-seba akaya ebwanga bwʼeHaranĩ.

¹¹Neryo mwahĩka ehandi omo nzira, mwagotseraho omo kiro ekyo, kusangwa eryuba iryamabirenga. Neryo mwatola erĩbwe liguma lyaho, mwasegemera kulyo, mwagotsera.

¹²Neryo mwalota; neryo lebaya, ekisambiro ĩkĩnatsĩmbĩrwe oko kitaka nʼomutwe wakyo ĩnĩahĩkĩre elubula; neryo lebaya, abamalaĩka ba Nyamuhanga ibakahetuka nʼeriandagala kukyo.

¹³Kandi lebaya, Omwami Mukulu iniahangene endata kukyo, akabũga ati, Ĩngye indi Mwami Mukulu, wa Abrahamũ, tata wawe, na Nyamuhanga wa Ĩsaka. Ekihugo ekyo ugotsereko nasyahakyo ukʼuwe nʼoko bana bawe.

¹⁴Kandi abana bawe basyabya ngʼolũtũtũ lwʼekitaka, neryo wasyabwayira omo kihugo kyʼeyĩkwa nʼomo kyʼendata, nʼomo butambi bwʼendata nʼomo bundi butambi bwʼeyĩkwa, nʼomwisi wawe nʼomo bana bawe, ebihanda byosĩ byʼekihugo byasyatsumulwa.

¹⁵Neryo, talebaya, indi haguma nawe, nasyakũteya ehosĩ wasyaya, nasyakũsũbya omo kihugo ekĩ kandi; kusangwa sindiendĩsyakũsĩganĩa nde nabikola ebyo nakubwira.

¹⁶Neryo Yakobo mwabuka omo tũgotserĩ tuwe, mwabũga ati, Kwenene Omwami Mukulu ali hano. Ĩsĩnyasĩ.

¹⁷Neryo mubaha, mwabũga ati, Hano nĩ hʼerĩũbahya hati! Hano si handi; ye nʼenyũmba ya Nyamuhanga, na hano nĩ lũkyo lwʼelubula.

¹⁸Neryo Yakobo mwahangana omo ngyakya-ngyakya, mwĩmya erĩbwe eryo asegemerako, mwasingikalyo ngʼendũyĩ, neryo mũta amagũta go kulyo.

¹⁹Neryo mwahula erĩna lyaho mo Betelĩ. Nĩkwa erĩna lyʼomũyĩ oyo erĩmbere lyabya Lũzĩ.

²⁰Na Yakobo mwayisema omo kisemo ati, Nyamuhanga amasyabya haguma nage akanyĩteya omo nzira ngayamo, nʼerimba akalyo kʼerirya, nʼolukimba lwʼeriambala,

²¹erireka ĩnaswahĩka omo nyũmba ya tata wage mo buholo, neryo Omwami Mukulu asyabya Nyamuhanga wage.

²²Nʼerĩbwe eryo nasingika eribya ndũyĩ, lyasyabya nyũmba ya Nyamuhanga. Nʼomo byosĩ wasyamba, kwenene nasyakuha ekiguma kyʼomwʼĩkũmĩ.