Read nande Enzũko 29 Bible Online

Enzũko 29 - nande bible

Enzũko 29

¹Neryo Yakobo mwĩmya enzira, mwahĩka omo kihugo kyʼabana bʼendata.

²Neryo mwasamalira, neryo mwalangira ekitehero omwʼirima, kandi lebaya, ebihangulo bisatu byʼesyombũlĩ byabya bigotsere oko mũsĩke wakyo. Kusangwa omo kitehero ekyo imobakanywĩsĩraya ebihangulo byʼesyombũlĩ. Nĩkwa erĩbwe eryabya oko kitehero lyabya ĩnene.

³Nʼaho hʼebihangulo byosĩ byabya bĩhĩndene, ĩbakakũmbagalaya erĩbwe ĩryalũa oko mwanya wʼekitehero, ĩbanywĩsya esyombũlĩ neryo ĩbasũbya erĩbwe kandi oko kitehero aho walyo.

⁴Yakobo mwabũga nabo ati, Balĩkyetu, muli banyahi kwehĩ? Neryo bati, Ĩtwe tuli bʼeHaranĩ.

⁵Neryo mwabũga nabo ati, Mũnasĩ Labanĩ mugala wa Nahorĩ kwehĩ? Nabo mobabũga bati, Tũnamwasĩ.

⁶Naye mwabũga nabo ati, Anabũkĩre kwehĩ? Nabo mobabũga bati, Anabũkĩre. Neryo lebaya, Rakelĩ, mwali wuwe akasa nʼesyombũlĩ.

⁷Neryo Yakobo mwabũga ati, Lebaya, eryuba siririryasingirira, kandi endambĩ sĩrĩyahĩka erĩhĩndanĩa ebihangulo. Mũnywĩsaye esyombũlĩ, mugende mũlĩsayesyo.

⁸Nabo mobabũga bati, Sitwangatoka ebihangulo byosĩ bite byahĩndana, neryo bakakũmbagalya erĩbwe erĩlũa oko lũkyo lwʼekitehero. Ĩtwasomya esyombũlĩ.

⁹Abere akĩnabũga nabo, Rakelĩ mwasa nʼesyombũlĩ sya tata wuwe, kusangwa yo wabya mũlĩsya wasyo.

¹⁰Enyũma wʼaho omugulu Yakobo alangira Rakelĩ, mwali wa Labanĩ nyĩnya-lume wuwe, nʼesyombũlĩ sya Labanĩ nyĩ-nya-lume wuwe, Yakobo mwaya hakũhĩ mwakũmbagalya erĩbwe erĩlũsyalyo oko mwanya wʼekitehero, mwasomya ekihangulo kya Labanĩ nyĩnya-lume wuwe.

¹¹Neryo Yakobo mwalyatsirira Rakelĩ, mwasumba omulenge wuwe mwalira.

¹²Na Yakobo wabwira Rakelĩ ngoko ali mũhwa wa tata wuwe, nʼakandi ngoko ali mugala wa Rebeka. Neryo Rakelĩ mwatibita mwayabwira ĩse wuwe.

¹³Enyũma wʼaho, omugulu Labanĩ owa engulu ya Yakobo mũhwa wuwe, mwatibita erĩyahĩndana naye, mwamuwako, mwamulyatsirira, mwamuleta omo nyũmba yiwe. Neryo Yakobo mwabwira Labanĩ yʼemyatsi yosĩ eyĩ.

¹⁴Neryo Labanĩ mwabũga naye ati, Kwenene uli ĩkũha lyage nʼomubiri wage. Neryo mwĩkala haguma naye nga mukera muguma.

¹⁵Neryo Labanĩ mwabũga na Yakobo ati, Kusangwa uli mugala wetu, wasyanyikolera busa kwehĩ? Umbwire, ebihembo byawe nga byasyabyakĩ?

¹⁶Na Labanĩ abya nʼabali babiri. Erĩna lyʼomukulu lyabya Lea, nʼerĩna lyʼomulere lyabya Rakelĩ.

¹⁷Neryo ameso wa Lea abya molo nĩkwa Rakelĩ abya mubuya, abya atungukere.

¹⁸Neryo Yakobo mwanza Rakelĩ. Mwabũga ati, Nasyakukolera myaka irinda busana na Rakelĩ mwali wawe mulere.

¹⁹Na Labanĩ mwabũga ati, Lyowene inakuhaye kwilaba erimuha ogundi mundu. Wĩkale haguma nage.

²⁰Neryo Yakobo mwakola emyaka irinda busana na Rakelĩ, moyabya nga biro bike busana nʼerimwanza.

²¹Neryo Yakobo mwabũga na Labanĩ ati, Umba mũkalĩ wage, kusangwa ebiro byage byamahĩkana, nyĩmwĩmaye.

²²Na Labanĩ mwahĩndanĩa abalume bosĩ baho bo haguma, mwakokotya erirya ĩnene.

²³Nʼenyũma omwʼĩgolo-golo, mwamutwalira Lea mwali wuwe naye mwamwĩmya.

²⁴Na Labanĩ mwaha Sĩlpa uku Lea mwali wuwe eribya mũbegerya wuwe.

²⁵Enyũma wʼaho omo ngyakya, lebaya, abya ini Lea. Neryo mwabũga na Labanĩ ati, Ekĩ nĩkĩ ekyo wamangolera kwehĩ? Mondakukolera busana na Rakelĩ kwehĩ? Busana nakĩ wamandeba kwehĩ?

²⁶Neryo Labanĩ mwabũga ati, Eno si mitsye yetu erĩherũkya Omulere embere wʼomukulu.

²⁷Ũberereraye ebiro birinda byʼoyũ, netu twasyakuha ogundi nibya busana nʼomũbĩrĩ wasyangolera eyindi myaka irinda.

²⁸Neryo Yakobo mwakola atya mwaberererya ebiro birinda biwe. Neryo Labanĩ mwamuha Rakelĩ mwali wuwe eribya mũkalĩ wuwe.

²⁹Neryo Labanĩ mwaha omũbegerya wuwe Bĩlĩha uku Rakelĩ mwali wuwe eribya mũbegerya wuwe.

³⁰Neryo Yakobo mwĩmya Rakelĩ, mwanza Rakelĩ kwilaba Lea, mwamukolera eyindi myaka irinda.

³¹Neryo Omwami Mukulu mwalangira ngoko Lea mwasombwa, neryo mwalĩbũla enda yiwe, na Rakelĩ mwabya mugumba.

³²Neryo Lea mwaheka obukule, mwabuta mugala, mwahula erĩna liwe mo Rũbenĩ, kusangwa abũga ati, Omwami Mukulu abirilangira obũlĩge bwage; lino ĩbage akandinyanza.

³³Neryo Lea mwaheka obukule kandi, mwabuta omugala; mwabũga ati, Kusangwa Omwami Mukulu abĩrĩowa ko nasombawa, kyalekĩre iniamba omugala oyũ nibya; neryo mwahula erĩna liwe mo Sĩmeonĩ.

³⁴Kandi mwaheka obukule, mwabuta omugala; mwabũga ati, Lino ĩbage akandinyibegerako, kusangwa namamubutira bagala basatu; kyaleka erĩna liwe iryahulwa mo Lawĩ.

³⁵Neryo kandi mwaheka obukule, mwabuta omugala; neryo mwabũga ati, Engendo eyĩ ngandipipa Omwami Mukulu; kyaleka iniahulwa mo Yũda; neryo mũmbya eributa.