Read nande Enzũko 31 Bible Online

Enzũko 31 - nande bible

Enzũko 31

¹Neryo Yakobo mowa ebĩnywa byʼabagala ba Labanĩ bakabũga bati, Yakobo abiriheka ebindu byosĩ ebyabya bya tata wetu. Kandi obuteke bosĩ obũ abiribanabo omo bindu bya tata wetu.

²Neryo Yakobo mwalangira obũsũ bwa Labanĩ, isibukiri ngʼerĩmbere.

³Neryo Omwami Mukulu mwabwira Yakobo, ati, Usube oko kihugo kyʼabotata wawe, nʼoko kihanda kyawe. Nage nasyabya haguma nawe.

⁴Neryo Yakobo mwatumira uku Rakelĩ na Lea ati, base omwʼirima ahali ekihangulo kiwe,

⁵mwabwirabo ati, Namalangira obũsũ bwa tata wenyũ, sibukiri ũkwʼĩngye ngʼerĩmbere; nĩkwa Nyamuhanga wa tata wage abiribya haguma nage.

⁶Nenyũ mũnasĩ ngoko nabirikolera tata wenyũ nʼamaka wage gosĩ.

⁷Na tata wenyũ abirinyiteba, abiribindingula oluhembo lwage lo ngendo ĩkũmĩ; nĩkwa Nyamuhanga mwatamuleka akanyĩta.

⁸Anabya abũga ati, Esyʼebitanga syasyabya luhembo lwawe; neryo esyombene syosĩ mosyabuta esyʼebitanga. Anabya abũga ati, Esyʼamalemba syasyabya luhembo lwawe, ekihangulo kyosĩ ikyabuta esyʼamalemba.

⁹Litya Nyamuhanga abirisagulabyo tata wenyũ, nʼerimbabyo.

¹⁰Enyũma wʼaho omugulu ebihangulo byahaka, monasumba ameso wage, monalangira omo nzolĩ, neryo lebaya, esyombaya esyasamba oko kihangulo mosyabya syʼamalemba esyʼebitanga, nʼesyʼebinyenze.

¹¹Neryo omũlaĩka wa Nyamuhanga mwabũga nage omo nzolĩ, ati, Yakobo; nage monabũga nyiti, Nandi hano.

¹²Neryo mwabũga ati, Sumba ameso wawe lino; ulangire, esyombaya syosĩ esikasamba oko kihangulo ni syʼamalemba, nʼebitanga, nʼebinyenze. Kusangwa nabirilangira ebyosĩ ebyo Labanĩ akakukolera.

¹³Ĩngye indi Nyamuhanga wʼeBetelĩ, aho wahakabaya endũyĩ yʼamagũta, aho wanyĩlahĩrayako. Lino uhangane, Ũlũe omo kihugo ekĩ, Usube omo kihugo ekyo wabutawamo.

¹⁴Rakelĩ na Lea mobamũsũbĩrya mobamubwira bati, Hakine kihande kutse mwandu busana netu omo nyũmba ya tata wetu kwehĩ?

¹⁵Sialituganza ngʼabʼehandi kwehĩ? Kusangwa abĩrĩtũgũlya, abirirya omũtahyo gʼũkwʼĩtwe ekyo kyahwere.

¹⁶Kusangwa ebindu byosĩ ebyo Nyamuhanga abirisagula tata wetu, ebyo ni byetu nʼabana betu. Lino, ebyosĩ Nyamuhanga abirikubwira, ukolebyo.

¹⁷Litya Yakobo mwahangana mwahĩra bagala buwe nʼabakalĩ buwe oko syongamia,

¹⁸neryo mwatwala ebihangulo biwe byosĩ, nʼebindu byosĩ byʼabana nʼebihangulo ebyo ayibanira ePadanĩ-aramũ, eriya uku Ĩsaka tata wuwe omo kihugo kyʼeKanana.

¹⁹Nĩkwa Labanĩ abya iniamabigenda erĩyatwa obweya bwʼesyombũlĩ siwe, kandi Rakelĩ mwĩba ebisambo ebyabya bya tata wuwe.

²⁰Nĩkwa Yakobo mwomboloka uku Labanĩ Omunya Sũrĩa, kusangwa mwatamubwira kwʼakatswa.

²¹Neryo mwatswa nʼebyosĩ abya awite, mwahangana, mwasoka Olũsĩ Efũratĩ, erĩlolya obũsũ buwe ebwanga bwʼekitwa kyʼeGĩleadĩ.

²²Neryo Labanĩ mwabwirwa ekiro kyʼebisatu ngoko Yakobo abiritswa.

²³Neryo Labanĩ mwatwala abagala buwe haguma naye, mwakwama Yakobo olugendo lwʼebiro birinda. Mwamubana oko kitwa kyʼeGĩleadĩ.

²⁴Kandi Nyamuhanga mwahĩka uku Labanĩ Omunya Sũrĩa, omo nzolĩ omo kiro, mwabũga naye ati, Ũyĩtegaye ĩsĩwabũga ekibuya kutse ekibi uku Yakobo.

²⁵Nĩkwa Labanĩ mwahĩka uku Yakobo. Neryo Yakobo iniamabihanda ehema yiwe yʼoko kitwa, nĩkwa Labanĩ nʼabagala babo mobahanda awabo oko kitwa kyʼeGĩleadĩ.

²⁶Neryo Labanĩ mwabũga na Yakobo ati, Wabirikolakĩ, erinyombolokako bũbĩso-bĩso, nʼeriheka bali bage ngʼabanyegwa bʼomũyalĩ kwehĩ?

²⁷Ko watswa bũbĩso-bĩso busana nakĩ, nʼeriomboloka, mutambwira inatoka eribahamula nʼobutseme haguma nʼesyonyimbo nʼengoma nʼebinanga.

²⁸Mutaleka ngalyatsirira bagala bage nʼabali bage kwehĩ? Wabirikola omo bũkĩrũ.

²⁹Obũtokĩ buli omo byala byage erikukola nabi, nĩkwa Nyamuhanga wa tata wawe mwambwĩre mũlĩgolo omo kiro ati, Ũyĩtegaye sũbũge na Yakobo ekĩnywa kibuya kutse kibi.

³⁰Na lino ukasonda erigenda kusangwa ũkwĩre enyũmba ya tata wawe yʼolukando, nĩkwa wabĩrĩba ebisambo byage busana nakĩ kwehĩ?

³¹Na Yakobo mwasũbĩrya nʼeribwira Labanĩ ati, Kusangwa nubaha; kyaleka ĩnabũga nyiti, Kwamũhwa wasyanzagula bali bawe nʼamaka.

³²Nʼomundu wasyeya kwʼebisambo byawe, siendisyabyaho. Embere syʼabagala betu uminyerere ebyawe omo byage, utwalebyo. Kusangwa Yakobo ĩsyasĩ ko Rakelĩ abĩrĩbabyo.

³³Neryo Labanĩ mwingira omo hema ya Yakobo, nʼomo hema ya Lea, nʼomo hema yʼababegerya babiri, nĩkwa mwatabana byomo. Neryo mwalũa omo hema ya Lea, mwingira omo hema ya Rakelĩ.

³⁴Nĩkwa Rakelĩ ĩnĩamabĩĩmya ebisambo nʼerĩhĩrabyo omo kĩtũmbĩ kyʼoko ngamia, mwĩkalira kubyo. Neryo Labanĩ mwamamata omo hema yosĩ, nĩkwa mwatabanabyo.

³⁵Neryo Rakelĩ mwabũga na tata wuwe ati, Omukama wage, siahitane sinangatoka erihangana embere syawe kusangwa nyiri oko mitsye yʼabakalĩ. Nĩkwa Labanĩ mwasondyabyo, nĩkwa mwatabana ebisambo ebyo.

³⁶Neryo Yakobo mwahitana, mwanegena na Labanĩ. Neryo Yakobo mwasũbĩrya mwabwira Labanĩ ati, Erĩlolo lyage ni ryahi kwehĩ? Ebibi byage ni byahi, ebyaleka iwanyibingula utya kwehĩ?

³⁷Wabirimata-mata omo bindu byage byosĩ wamabana mokĩ oko byʼomo nyũmba yawe kwehĩ? Ũkĩhĩre embere syʼabagala betu nʼabagala benyũ, batutswere ĩtwe babiri.

³⁸Emyaka makũmĩ abiri eyĩ nabiribya haguma nawe; esyombũlĩ syawe nʼesyombene syawe mosĩtatesya ehyana hyasyo, kutse sinditalya oko mbangale syʼekihangulo kyawe.

³⁹Esyĩtawa nʼebisoro mondakuleterasyo. Ĩngyowene monaheka eririha lyasyo; mowabũlyasyo omo byala byage, kutse syamĩbwa omwʼitungi kutse omo kiro.

⁴⁰Emibere yage ko yabya itya; omwʼitungi inumirira, nʼeritsuku molyanyĩta omo kiro nʼotũgotserĩ motwabula omo meso wage.

⁴¹Emyaka makũmĩ abiri eyĩ inyine omo nyũmba yawe. Monakukolera emyaka ĩkũmĩ nʼĩnĩ busana nʼabali bawe babiri, nʼemyaka ndatu busana nʼesyombene syawe, kandi mowabindula oluhembo lwage lo ngendo ĩkũmĩ.

⁴²Kumbe Nyamuhanga wa tata wage, Nyamuhanga wa Abrahamũ, nʼolubahwa lwa Ĩsaka, bitalibya haguma nage, kwenene nga wabirinyĩhehetya butsira kindu. Nyamuhanga abirilola oko bũlĩge bwage nʼomũbĩrĩ wʼebyala byage, neryo mwakũkũngĩre omo kiro kya mũlĩgolo.

⁴³Neryo Labanĩ mwasũbĩrya mwabũga na Yakobo, ati, Abali ni bali bage, nʼabana ni bana bage, nʼebihangulo ni bihangulo byage, nʼebyosĩ ukalangira ni byage. Nĩkwa nage nangakolĩrekĩ mũnabwĩre uku bali bage aba, nʼabana babo abo babuta kwehĩ?

⁴⁴Na lino Wase tũhĩre endagano ĩngye nawe. Ibye kĩmĩnyĩsyo omo katĩkatĩ kage nawe.

⁴⁵Neryo Yakobo mwĩmya erĩbwe mwasingikalyo ngʼendũyĩ.

⁴⁶Neryo Yakobo mwabwira bagala babo ati, Mũsongaye amabwe. Neryo mobasongya amabwe, mobayirago mo kilundo. Neryo mobaliraho hakũhĩ nʼekilundo ekyo.

⁴⁷Neryo Labanĩ mwalukaho mo Yegarĩ-saha-dũta, nĩkwa Yakobo mwalukaho mo Gĩleadĩ.

⁴⁸Neryo Labanĩ mwabũga ati, Ekilundo ekĩ nĩ kĩmĩnyĩsyo omo katĩkatĩ kage nawe mũnabwĩre. Kyaleka erĩna lyakyo ikyalukwa mo Galedĩ,

⁴⁹na Mĩsĩpa, kusangwa ati, Omwami Mukulu ategaye omo katĩkatĩ kage nawe omugulu tuli hali na hali.

⁵⁰Nawe wamagalya bali bage, kandi wamahalĩkanĩa bali bage, hate mundu haguma netu, langira, Nyamuhanga nĩ mũlangĩrĩ omo katĩkatĩ kage nawe.

⁵¹Neryo Labanĩ mwabwira Yakobo ati, Tungerera ekilundo ekĩ, ulangire endũyĩ eyo nabĩrĩhanganĩa omo katĩkatĩ kage nawe.

⁵²Ekilundo ekĩ kibye mũlangĩrĩ, nʼendũyĩ ibye mũlangĩrĩ, ngoko nyitendisyakiruka ekilundo ekĩ eriya ukʼuwe, nawe kʼutendisyakiruka ekilundo ekĩ nʼendũyĩ eyĩ eriasa ewage erikola nabi.

⁵³Nyamuhanga wa Abrahamũ, na Nyamuhanga wa Nahorĩ, Nyamuhanga wa tata wabo, atswere omo katĩkatĩ ketu. Neryo Yakobo mwayisema oko lubahwa lwa tata wuwe Ĩsaka.

⁵⁴Na Yakobo mwahera obuhere oko kitwa, mwabirikira bagala babo erirya akalyo, neryo mobalya, mobasibayo nʼerigotserayo omo kitwa.

⁵⁵Nʼomo ngyakya-ngyakya Labanĩ mwahangana, mwalyatsirira abagala buwe nʼabali buwe, mwatsumulabo. Labanĩ mwahongoka erisuba ewuwe.