Read nande Enzũko 32 Bible Online

Enzũko 32 - nande bible

Enzũko 32

¹Neryo Yakobo mwayigendera omo nzira yiwe, nʼabalaĩka ba Nyamuhanga mobahĩndana naye.

²Omugulu Yakobo alola kubo mwabũga ati, Oyũ ni mulondo wa Nyamuhanga. Mwahula erĩna lyʼaho mo Mahanaĩmũ.

³Neryo Yakobo mwatuma abakwenda buwe embere siwe uku Esaũ mugala wabo omo kihugo kyʼeSeĩrĩ, kye kihugo kyʼeEdomũ.

⁴Mwahanabo ati, ko mwasyabũga mutya oko mukama wage Esaũ: muti, Omugombe wawe Yakobo amabũga ati, Nabiribya mubunga haguma na Labanĩ erĩhĩka lino.

⁵Kandi ngwite esyonde, nʼesyopunda, nʼesyombene, nʼabagombe bʼobulume nʼabʼobũkalĩ, neryo namabatuma eribwira omukama wage, inabana eriganyira embere syʼameso wawe.

⁶Abakwenda abo mobasuba ewa Yakobo, bati, Motwahĩkĩre uku mugala wenyũ Esaũ, kandi anemwasa erĩhĩndana nawe, nʼabalume magana ani bali haguma naye.

⁷Neryo Yakobo mubaha kutsibu, mwakwa buba, neryo mwagaba abandu ababya haguma naye, nʼebihangulo, nʼesyonde, nʼesyongamia, mwatwasyo mo milondo ĩbĩrĩ,

⁸mwabũga ati, Esaũ amasa akĩta omulondo muguma akaswĩryago, neryo ogundi mulondo owakasĩgala asyabala.

⁹Neryo Yakobo mwabũga ati, Uwe Nyamuhanga wa tata wage Abrahamũ, na Nyamuhanga wa tata wage Ĩsaka, uwe Mwami Mukulu, oyo wambwira ati, Usube oko kihugo kyawe, nʼoko kĩtũnga kyawe, nasyakukolera ebibuya,

¹⁰sinyitolere nʼahake oko bibuya byawe byosĩ nʼokwʼitendiregula lyosĩ eryo wakangaya omugombe wawe. Nasoka eYorodanĩ eyĩ nʼomũtso musa, na lino nabiribya milondo ĩbĩrĩ.

¹¹Ngakusaba, ũnyĩlamaye omo byala bya mugala wetu, omo byala bya Esaũ, kusangwa ngamubaha, isyasa nʼerĩnyĩta, nʼabokoyo haguma nʼabana.

¹²Nawe mowabũga uti, Kwenene nasyakukola ndeke, nʼeriyira abana bawe ngʼemisege yʼomo ngetsi, eyite yangatoka eriganzwa busana nʼobungi.

¹³Neryo Yakobo mwagotseraho ekiro ekyo, neryo mwĩmya oluhembo oko bindu abya nabyo bibye luhembo busana na mugala wabo ye Esaũ.

¹⁴Mwĩmya esyombene magana abiri nʼesyombaya makũmĩ abiri, nʼesyombũlĩ magana abiri, nʼesyombangale makũmĩ abiri,

¹⁵nʼesyongamia esikakamawa makũmĩ asatu nʼebyana byasyo, nʼesyonde makũmĩ ani, nʼesyondabana ĩkũmĩ, nʼesyopunda syʼobũkalĩ makũmĩ abiri nʼebyana ĩkũmĩ.

¹⁶Neryo mwahĩrabyo omo byala byʼabagombe buwe, obuli kihangulo aho wakyo, neryo mwabũga nʼabagombe buwe ati, Musoke embere syage, mũhĩre omwanya omo katĩkatĩ kʼobuli kihangulo.

¹⁷Neryo mwategeka owʼerĩmbere ati, Omugulu Esaũ mugala wetu akahĩndana nawe, amakũbũlya ati, Uli mundu wandi kwehĩ? Ukagahi kwehĩ? Nʼesiri embere syawe ni syandi kwehĩ?

¹⁸neryo ĩwabũga uti, Ni syʼomugombe wawe Yakobo. Ni luhembo lukatumawa oko mukama wage Esaũ. Neryo lebaya, naye ane enyũma syetu.

¹⁹Neryo mwahana owʼakabiri nʼowʼakasatu nibya, nʼabosĩ ababinga ebihangulo, ati, Ko mwasyabũga mutya na Esaũ mwamubandana.

²⁰Nʼakandi mwasyabũga muti, Lebaya, omugombe wawe Yokobo ane enyũma syetu. Kusangwa mwabũga ati, Nasyamwolobya omo luhembo olukatangirira embere syage, nʼenyũma wʼaho nasyalangira obũsũ buwe. Kwamũhwa asyanyĩsĩma.

²¹Litya oluhembo molwasoka embere siwe. Naye mwagotseraho ekiro ekyo omo kilaliriro.

²²Neryo mwahangana ekiro ekyo mwĩmya abakalĩ buwe babiri, nʼababegerya buwe babiri, nʼabana buwe ĩkũmĩ nʼomuguma, mwasoka oko kisokero kyʼeYabokĩ.

²³Mwĩmyabo mwasokyabo olũsĩ mwasokya nʼebyosĩ abya nabyo.

²⁴Neryo Yakobo mwasĩgala ĩyowene, nʼomundu muguma mwahambana naye erĩhĩka oko bũtũkũ erikya.

²⁵Neryo omugulu alangira kwʼate angamũkĩnda, omũlaĩka oyo mwatũla oko nyonga yʼekihinga kiwe. Enyonga yʼekihinga kya Yakobo moyahenyuka, omugulu ahambana nʼomundu oyo.

²⁶Naye mwabũga ati, Undeke, nyigende, kusangwa bukakya. Neryo Yakobo mwabũga ati, Sindiendikulegulako erigenda ute wanzumula.

²⁷Neryo mwamũsũbĩrya ati, Erĩna lyawe uwendi kwehĩ? Naye mwabũga ati, Ĩngye Yakobo.

²⁸Neryo omundu oyo mwabũga ati, Erĩna lyawe siryendisyaswahulwa mo Yakobo, nĩkwa Ĩsraelĩ, kusangwa wabirirengana na Nyamuhanga nʼabandu, nawe wamasĩnga.

²⁹Na Yakobo mwamũbũlya ati, Ngakũbũlaya unyibwire erĩna lyawe. Naye mwabũga ati, Busana nakĩ ũkabũlaya erĩna lyage kwehĩ? Neryo mwamutsumuliraho.

³⁰Neryo Yakobo mwalukaho mo Penũelĩ, kusangwa abũga ati, Twamalolanako na Nyamuhanga ameso nʼawandi, nʼengebe yage yamalamĩbwa.

³¹Eryuba molyahuluka ukwʼiye omugulu asokera ePenũ elĩ, neryo mwahinira oko kihinga kiwe.

³²Kikaleka abana ba Ĩsraelĩ ibatalya Omũ sĩsa owali oko nyonga yʼekihinga, erĩhĩka na mũnabwire, kusangwa mwatũla oko nyonga yʼekihinga kya Yakobo oko mũsĩsa wʼendungu.