Read nande Enzũko 38 Bible Online

Enzũko 38 - nande bible

Enzũko 38

¹Enyũma wʼaho, oko mugulu oyo Yũda mwalũa eyiri bagala babo, mwabungira Omũadũlamũ muguma, erĩna liwe iyo Hĩra.

²Kandi eyo, Yũda mwalangira mwali wʼOmukanana muguma erĩna liwe iyo Sũa, neryo mwamwĩmya mwamũhĩkya.

³Naye mwaheka obukule, mwabuta mugala, mwaluka erĩna liwe mo Erĩ.

⁴Neryo mwaswaheka obukule, mwabuta mugala, neryo mwaluka erĩna liwe mo Onanũ.

⁵Neryo mwaswabuta kandi mugala, mwaluka erĩna liwe mo Sela. Mũkalĩwe abya eKezĩbũ omugulu amubuta.

⁶Neryo Yũda mwatahĩrya Erĩ, akambere kuwe, omũkalĩ, nʼerina liwe lyabya Tamarĩ.

⁷Nĩkwa Erĩ, akambere ka Yũda, abya mubi omo meso wʼOmwami Mukulu, neryo Omwami Mukulu mwamwĩta.

⁸Neryo Yũda mwabwira Onanũ ati, Ugende wĩmaye muka mugala wenyũ, ũsĩgalaye omũkalĩ wa mugala wenyũ, ubutire omugala wenyũ yʼabana.

⁹Na Onanũ mwaminya ngoko abana abo batendisyabya buwe, nʼenyũma wʼaho, omugulu ĩmaya omũkalĩ wa mugala wabo oyo, mũtalo ahisi, akasyaha mugala wabo yʼomwana.

¹⁰Nʼekyo akola mokyabya kibi embere syʼameso wʼOmwami Mukulu, neryo Omwami Mukulu mwamwĩta nibya.

¹¹Neryo Yũda mwabwira Tamarĩ, mwalĩana wuwe ati, Ubye mũkwakalĩ omo nyũmba ya tata wawe erĩhĩka aho mugala wage Sela asyakulira; kusangwa abũga ati, Akasyahola ngʼabagala babo. Neryo Tamarĩ mwagenda mwĩkala omo nyũmba ya tata wuwe.

¹²Enyũma wʼebiro bingi mwali wa Sũa, muka Yũda, mwahola. Yũda mwakĩranĩbwa mwahetukira eTĩmũna oko batwĩ buwe bʼobweya bwʼesyombũlĩ siwe, iye nʼomwĩra wuwe Hĩra Omũadũlamũ.

¹³Neryo Tamarĩ mwabwirwa ambu, Lebaya, ĩse-byala akahetukira eTĩmũna erĩtwa obweya bwʼesyombũlĩ siwe.

¹⁴Neryo mwambula esyongimba syʼobũkwĩrwa, neryo mwayiswika akatambara kʼoko mutwe nʼobũsũ, mwayĩkala omo lũkyo lwʼomũyĩ wʼeEnaĩmũ, omo nzira eyikalola eTĩmũna. Kusangwa mwalangira ngoko Sela abirikula, naye kwʼatetahabwaye eribya mũkalĩ wuwe.

¹⁵Neryo omugulu Yũda amulangira, mwaganĩrya ati nĩ mũmalaya, kusangwa iniabiriswika obũsũ buwe.

¹⁶Neryo mwamukebera omo nzira, mwabũga naye ati, Wase, Uleke ngakwĩmaye; kusangwa siabya asĩ omũkalĩ oyo kwʼali mwalĩana wuwe. Neryo Tamarĩ mwabũga naye ati, Wasyambakĩ; uti ũkandĩnyĩmya kwehĩ?

¹⁷Naye mwabũga ati, Nasyakulebeka akana kʼembene kʼomo kihangulo. Naye mwabũga ati, Wasyamba omutsimbo erĩhĩka aho wasyalebekerako kwehĩ?

¹⁸Naye mwabũga ati, Nyikuhe omutsimbo wahi kwehĩ? Neryo Tamarĩ mwabũga ati, Embũka yawe yʼekiminyerero nʼomukoba wawe, nʼomũtso wawe owali omo byala byawe. Neryo mwamuhabyo, neryo mwamwĩmya, neryo omwanamuto oyo mwaheka obukule.

¹⁹Neryo mwahangana mwayigendera, mwambula akatambara kuwe, mwaswambala, esyongimba siwe syʼobũkwakalĩ.

²⁰Neryo Yũda mwamulebeka ekyana kyʼembene omo byala bya mwĩra wuwe Omũadũlamũ, eribana omutsimbo owabya omo byala byʼomũkalĩ; nĩkwa mwatamweyayo.

²¹Neryo mwabũlya abalume baho ati, Omũmalaya oyo wabya eEnaĩmũ oko nzira alihi kwehĩ? Neryo mobabũga bati, Hano sihabya mũmalaya.

²²Neryo Omũadũlamũ oyo mwasuba eyiri Yũda, mwabũga ati, Sĩndĩtamweyayo. Abandu baho mobakabũga bati, Hano sĩhalwe mũmalaya.

²³Na Yũda mwabũga ati, Abikebyo, tukasyahemulwa, Lebaya, namulebeka ekyana kyʼembene ekĩ, nawe sũlĩtamweyayo.

²⁴Enyũma wʼemikera ngʼĩsatu, Yũda mwabwirwa ambu, Tamarĩ mwalĩana wawe abiribya mũmalaya, nʼakandi, ni mukule omo luteto. Neryo Yũda mwabũga ati, Mũmũhũlũkaye ahĩsĩbawe.

²⁵Neryo omugulu ahũlũkĩbawa, mwalayira ũkwʼĩse-byala, ati, Omwenye bindu ebĩ, yo wangira mo mukule. Kandi mwabũga ati, Talebaya uminyerere, embũka yʼekiminyerero, nʼomukoba, nʼomũtso nga ni byandi.

²⁶Na Yũda mwaminyererabyo, mwabũga ati, Iye ni mugenge kwilaba ngye, kusangwa mondamuha Sela, mugala wage. Neryo mwataswamwĩmya kandi.

²⁷Enyũma wʼaho omugulu akunda, lebaya, abahasa ibane omo nda yiwe.

²⁸Enyũma wʼaho abere akinakunda, omuguma mwahũlũkya ebyala. Neryo omũyĩrya mwĩmya akalĩkĩ kʼengula mwabohako oko byala biwe, ati, Oyũ yo wamatsũka erihuluka.

²⁹Enyũma wʼaho omugulu omwana asũbũlaya ebyala biwe, neryo mugala wabo mwahuluka, neryo omũyĩrya mwabũga ati, Busana nakĩ ukasa kinya-maka kwehĩ? Kyaleka erĩna liwe iryalukwa mo Peresĩ.

³⁰Enyũma wʼaho mugala wabo mwahuluka oyo wabya kwʼakalĩkĩ akʼengula oko byala; erĩna liwe molyalukwa mo Zera.