Read nande Enzũko 40 Bible Online

Enzũko 40 - nande bible

Enzũko 40

¹Enyũma wʼemyatsi eyĩ, omũtengĩ wʼOmwami wʼeMĩsĩrĩ, nʼomũtsũmbĩ wuwe wʼamandu mobahĩtanĩa omukama wabo Omwami wʼeMĩsĩrĩ.

²Neryo Farao mwahitana oko bakama buwe babiri, oko mukulu wʼabatengĩ, nʼoko mukulu wʼabatsũmbĩ.

³Neryo mwahĩrabo omo mũlĩkĩ omo nyũmba yʼomukulu wʼabateya omo nyũmba yʼomũlĩkĩ, aho Yosefũ abya aboherwe.

⁴Omukulu wʼabateya mwahĩra Yosefũ erĩteyabo, nʼerikolerabo nabo mobabuga omo mũlĩkĩ mo biro.

⁵Neryo omũtengĩ nʼomũtsũmbĩ bʼomwami wʼeMĩsĩrĩ, ababya omo mũlĩkĩ, mobalota esyonzolĩ, oko kiro kiguma, obuli mundu nʼerilota liwe, nʼobuli ilota nʼeribikulirwa lyalyo.

⁶Neryo Yosefũ mwahĩka kubo omo ngyakya-ngyakya, mwatungererabo, neryo, lebaya, ibali nʼobũlĩge.

⁷Neryo Yosefũ mwabũlya abakama ba Farao ababya babohĩrwe haguma naye omo nyũmba yʼomukama wuwe ati, Busana nakĩ mũkakwa obũlĩge bo mutya mũnabwĩre kwehĩ?

⁸Neryo mobamũsũbĩrya bati, Motukalota esyonzolĩ, kandi sihali mundu wʼeritubikulirasyo. Nĩkwa Yosefũ mwabwirabo ati, Ngababũlaya mumbwire, eribikula si rya Nyamuhanga kwehĩ? mukatambwirasyo.

⁹Neryo omukulu wʼabatengĩ mwabwira Yosefũ erilota liwe, mwamubwira ati, Omwʼilota lyage, talebaya, omũlĩkĩ wʼebĩnyũ abya embere syage.

¹⁰Nʼoko mũlĩkĩ wʼebĩnyũ kwabya mitahi ĩsatu. Kandi abya ngʼakasogaya, nʼomusanga wago mwahuluka. Ebĩkũto byago mobyaleta ebĩgũma byʼebĩnyũ ebyerĩre.

¹¹Neryo olũtehĩ lwa Farao lwabya omo byala byage. Nage monĩmya ebĩgũma nʼerikamulirabyo omo lũtehĩ lwa Farao, kandi monahererya olũtehĩ omo byala bya Farao.

¹²Neryo Yosefũ mwamubwira ati, Eribikula lyalo lyerĩ. Emitahi ĩsatu ni biro bisatu.

¹³Hakĩsĩya biro bisatu neryo Farao asyaswakũlĩga nʼerĩkũsũbya oko mũbĩrĩ wawe. Neryo wasyahererya Farao yʼolũtehĩ omo byala biwe, ngoko wagenda ukakola omugulu wabya mũtengĩ wuwe.

¹⁴Nĩkwa ngakũbũlaya, usyenyibuka nʼerinyisasira ekiro omwatsi wawe asyowana, kandi nʼerinyahula embere sya Farao, nʼerĩndũsya omo nyũmba eyĩ.

¹⁵Kusangwa kwenene nĩbawa omo kihugo kyʼAbaebrania, na hano nibya sinditakola kindu kyangaleka ĩbambĩra omo buhya bʼomũlĩkĩ.

¹⁶Neryo omugulu omukulu wʼabatsũmbĩ alangira eribikula ko lyamowana, mwabũga na Yosefũ ati, Nage nibya monalota esyonzolĩ, neryo lebaya, Ebĩbo bisatu byʼobundu bũhenĩrye byabya oko mutwe wage.

¹⁷Neryo omo kĩbo kyʼendata imuli emĩsĩndo yosĩ yʼakalyo busana na Farao, nʼesyonyonyũ mosyalira omo kĩbo ekiri oko mutwe wage.

¹⁸Neryo Yosefũ mwasũbĩrya mwabũga ati, Eribikula lyalyo lyerĩ: ebĩbo bisatu ni biro bisatu.

¹⁹Hakĩsĩya biro bisatu Farao asyatwa omutwe wawe ĩnĩakũlũsya goko, asyakuhanika oko muti, nʼesyonyonyũ syasyalya emĩnyokũ yawe nʼerĩkũlũsya yoko.

²⁰Neryo enyũma wʼebiro bisatu, kyabya kiro kyʼeributwa lya Farao, mwakokotya erirya ĩnene busana nʼabagombe buwe bosĩ. Mwaswahanganĩa omukulu wʼabatengĩ nʼomukulu wʼabatsũmbĩ omo katĩkatĩ kʼabagombe buwe.

²¹Neryo mwasũbya omũtengĩ mukulu okwʼitenga liwe, neryo mwabya akaha olũtehĩ omo byala bya Farao.

²²Nĩkwa mwahanika omũtsũmbĩ mukulu. Ngoko Yosefũ abikulirabo.

²³Nĩkwa omũtengĩ mukulu mwatibuka Yosefũ, mwamwibirirwa.