Read nande Enzũko 41 Bible Online

Enzũko 41 - nande bible

Enzũko 41

¹Enyũma wʼaho, emyaka ĩbĩrĩ yabere yabihwa, Farao mwalota. Abya ahangene oko mũsĩke wʼolũsĩ lwʼeNĩlĩ.

²Neryo, esyonde sirinda mosyahuluka omo lũsĩ lwʼeNĩlĩ, esyowene nʼesĩnenehĩre, neryo mosyalira omo biti byʼekisesa.

³Kandi, esindi nde sirinda mosyahetuka enyũma wʼesindi sĩkalũa omo lũsĩ lwʼeNĩlĩ, esĩtowene, nʼesĩbondĩre, mosyahangana hakũhĩ nʼesindi nde oko mukyingyi wʼolũsĩ lwʼeNĩlĩ.

⁴Esyonde esĩtowene esĩbondĩre, mosyalya esyonde sirinda esyowene esĩnenehĩre. Neryo Farao mwabuka.

⁵Neryo mwagotsera, mwalota engendo yʼakabiri. Engano nguma moyasohola amakũndĩ alinda awabogĩre nʼagowene.

⁶Neryo amakũndĩ alinda mwalasa enyũma wago, awanyalĩre, nʼerĩkwa omwʼihunga lyʼendata.

⁷Nʼamakũndĩ ayo awanyalĩre mwamera amakũndĩ alinda awabogĩre awerĩre. Neryo Farao mwabuka, neryo talebaya, kwesĩ ini ʼlota lisa!

⁸Enyũma wʼaho omo ngyakyangyakya, ekĩrĩmũ kiwe mokyakwa engitsi, neryo mwatuma eribirikira abalagũlĩ bosĩ bʼeMĩsĩrĩ. Nʼabalume bosĩ bʼamenge. Neryo Farao mwabwirabo erilota liwe nĩkwa sihabya mundu nʼomuguma oyo wangatoka eribikuliralyo Farao.

⁹Neryo omũtengĩ mukulu mwabũga na Farao ati, Namibuka ebibi byage mũnabwĩre.

¹⁰Farao abya ahitene oko bagombe buwe, neryo mwanyĩhĩra omo mũlĩkĩ erĩteyĩbwa omo nyũmba yʼomukulu wʼabateya, ĩngye nʼomukulu wʼabatsũmbĩ.

¹¹Nʼomo kiro kiguma motwalota, ĩngye naye. Motwalota obuli mundu nʼeribikula lyʼerilota liwe.

¹²Neryo haguma netu habya omũlwana Muebrania, omugombe wʼomukama wʼabateya. Netu motwamubwira erilota lyetu, naye mwatubikulira erilota lyetu. Neryo mwabikulira obuli mundu ngʼerilota liwe.

¹³Enyũma wʼaho ngoko atubikulira, mobyabya bitya. Ĩngye monasũbĩbwa oko mũbĩrĩ wage, naye mwahanikwa oko muti.

¹⁴Neryo Farao mwatumira uku Yosefũ, mobamuleta lũba erĩlũa omo buhya bwʼomũlĩkĩ. Neryo Yosefũ mwayĩsĩsa, mwambala esindi ngimba, mwingira omwa Farao.

¹⁵Neryo Farao mwabwira Yosefũ ati, Nabirilota, kandi sihali oyo wangabikulalyo. Kandi namowa engulu yawe, bati omugulu ũkowa erilota ukatoka eribikulalyo.

¹⁶Neryo Yosefũ mwasũbĩrya Farao ati, Sĩ ĩngye. Nyamuhanga asyaha Farao erĩsũbĩrya lyʼobuholo.

¹⁷Neryo Farao mwabwira Yosefũ ati, Omwʼilota lyage, lebaya, nabya nyimene oko mukyingyi wʼolũsĩ lwʼeNĩlĩ.

¹⁸Neryo, esyonde sirinda mosyasabuka sĩkalũa omo lũsĩ lwʼeNĩlĩ esĩnenehĩre, nʼesyowene, mosyalira omo kisesa.

¹⁹Neryo lebaya, esindi nde sirinda mosyasabuka enyũma wasyo ini mĩbondũ, ĩsĩsyowene. Omo kihugo kyosĩ kyʼeMĩsĩrĩ sindinatalola uku nde nyibi ngʼesĩ na kera.

²⁰Esyonde sĩbondĩre esĩtowene mosyalya esyonde sĩnenehĩre sirinda syʼerĩmbere.

²¹Syabere syabiryasyo, mositatoka eriminyikala nga siryalyasyo, nĩkwa isikine nyibi ngoko syabya erĩmbere. Neryo monatsumbuka.

²²Neryo monalangira kandi omwʼilota lyage, neryo talebaya, amakũndĩ alinda mwasohola oko mukongo muguma, awatũngĩre nʼerĩowana.

²³Neryo lebaya, amakũndĩ alinda mwalasa awanyalĩre, awalagere omwʼihunga lyʼendata, eryabuhirira enyũma wago.

²⁴Amakũndĩ awanyalĩre mwamera amakũndĩ owene alinda. Neryo monatũlĩrasyo abalagũlĩ, nĩkwa mohatabya nʼomuguma oyo wangatoka erimbikulirasyo.

²⁵Na Yosefũ mwabwira Farao ati, Erilota lya Farao niʼguma Nyamuhanga akatũlĩra Farao ebyo akĩsĩya iniakola.

²⁶Esyonde sirinda syowene ni myaka irinda. Nʼamakũndĩ alinda owene ni myaka irinda. Erilota ni ʼguma.

²⁷Esyonde sirinda esĩbondĩre nʼesĩtowene esyasabuka enyũma wasyo ni myaka irinda, nʼamakũndĩ alinda nibya ebinyunzu ebyũmĩbawa nʼerihunga lyʼendata yasyabya myaka irinda yʼenzala.

²⁸Ebĩ byo nabwira Farao. Nyamuhanga abĩrĩkangya Farao ebyo akĩsĩya iniakola.

²⁹Lebaya, emyaka irinda yʼomukene ikasa omo kihugo kyosĩ kyʼeMĩsĩrĩ.

³⁰Neryo enyũma wʼaho, emyaka irinda yʼenzala yasyahĩka. Omukene gosĩ asyibiriranwa omo kihugo kyʼeMĩsĩrĩ, nʼenzala yasyabugana ekihugo.

³¹Omukene siendisyaswaminywa omo kihugo busana nʼenzala eyikasa, kusangwa yasyakala kutsibu.

³²Neryo kusangwa erilota lya Farao molyasubirana kabiri, ni kusangwa ni mwatsi Nyamuhanga abĩrĩhanganĩa, neryo hakĩsĩya hake Nyamuhanga ĩnĩaberereryago.

³³Busana nʼekyo lino Farao ũyĩsonderaye omundu wʼamenge nʼobũlengekanĩa, ũmũhĩre omo kihugo kyʼeMĩsĩrĩ.

³⁴Farao akole ekĩ, ahĩre abateya omo kihugo, bĩmaye ekiguma oko bitanu byʼekihugo kyʼeMĩsĩrĩ omo myaka irinda yʼomukene.

³⁵Bahĩndanaye akalyo kosĩ kʼemyaka yowene eyikasa, babike engano omo byala bya Farao busana nʼakalyo omo mĩyĩ, bategayeko.

³⁶Nʼakalyo ako; kasyabya mbĩso busana nʼemyaka irinda yʼenzala, eyikandisyabya omo kihugo kyʼeMĩsĩrĩ. Ekihugo sikihere busana nʼenzala.

³⁷Omwatsi oyũ mowana omo meso wa Farao, nʼomo meso wʼabagombe buwe bosĩ.

³⁸Neryo Farao mwabwira abagombe buwe ati, Twanganabana omundu oyuli ngʼoyũ, oyuli nʼOmũlĩmũ wa Nyamuhanga kwehĩ?

³⁹Neryo Farao mwabũga na Yosefũ ati, Kusangwa Nyamuhanga abĩrĩkũkangya ebyosĩ ebyo, sihali gundi wʼamenge nʼobũlengekanĩa nga we.

⁴⁰Wasyatabala omo nyũmba yage, kandi abandu bage bosĩ basyakenga ekĩnywa kyawe. Oko kĩtũmbĩ kyʼobwami kisa nasyabya mukulu kuwe.

⁴¹Neryo Farao mwabũga na Yosefũ ati, Lebaya, nabĩrĩkũhĩra endata oko kihugo kyosĩ kyʼeMĩsĩrĩ.

⁴²Neryo Farao mwalũsya embũka yiwe yʼekiminyerero oko byala biwe, mwahĩrayo oko byala bya Yosefũ kandi mwamwambalya esyongimba esyowene syʼengurungu, kandi mwahĩra omusege wʼesyamagetsi omo bĩkya biwe.

⁴³Kandi Farao mwamũgendya omo galĩ yiwe yʼakabiri eyo abya nayo. Mobabirikira embere siwe bati, Muhande amarwĩ. Mwamũhĩra endata wʼekihugo kyosĩ kyʼeMĩsĩrĩ.

⁴⁴Neryo Farao mwabũga na Yosefũ ati, Ĩngye indi Farao, kandi butsira we sihali mundu wasyasumba ebyala biwe kutse ebisando biwe omo kihugo kyosĩ kyʼeMĩsĩrĩ.

⁴⁵Neryo Farao mwaluka erĩna lya Yosefũ mo Zefanatĩpanea. Neryo mwamuha Asenatĩ, mwali wa Potĩfera, omũhererĩ wʼeOnĩ eribya mũkalĩwe. Neryo Yosefũ mwalaba omo kihugo kyʼeMĩsĩrĩ.

⁴⁶Neryo Yosefũ abya wʼemyaka makũmĩ asatu omugulu ahangana embere sya Farao Omwami wʼeMĩsĩrĩ. Neryo Yosefũ mwalũa embere sya Farao, mwalaba omo kihugo kyosĩ kyʼeMĩsĩrĩ.

⁴⁷Omo katĩkatĩ kʼemyaka irinda yʼomukene eyo, ekitaka mokyerya bingi.

⁴⁸Neryo Yosefũ mwahĩndanĩa akalyo kosĩ kʼemyaka irinda akabya omo kihugo kyʼeMĩsĩrĩ, mwabikako omo mĩyĩ. Akalyo kʼamalima awabya atĩmbĩre oko buli mũyĩ, mwabikako oko mũyĩ oyo.

⁴⁹Na Yosefũ mwabika engano nene kũndũ ngʼomusege wʼomo ngetsi, erĩhĩka aho alekera eriganza kusangwa isiriganzika.

⁵⁰Kandi Yosefũ mwabuta abana babiri embere wʼeriasa lyʼomwaka wʼenzala, abo Asenatĩ mwali wa Potĩfera omũhererĩ wʼeOnĩ, amubutira.

⁵¹Yosefũ mwaluka erĩna lyʼakambere mo Manase; kusangwa abũga ati, Nyamuhanga abirireka inibirirwa erinuba lyage lyosĩ, nʼekĩtũnga kya tata wage kyosĩ.

⁵²Neryo mwaluka akambale mo Efraĩmũ, kusangwa Nyamuhanga abĩrĩnyĩkanyĩrĩrya omo kihugo kyʼobũlĩge bwage.

⁵³Nʼemyaka irinda yʼomukene owabya omo kihugo kyʼeMĩsĩrĩ, moyahwa.

⁵⁴Emyaka irinda yʼenzala moyatsũka erĩhĩka, ngoko Yosefũ abũga. Enzala moyabya omo bihugo byosĩ. Nĩkwa akalyo mokabya omo kihugo kyosĩ kyʼeMĩsĩrĩ.

⁵⁵Omugulu ekihugo kyosĩ kyʼeMĩsĩrĩ kyalola oko nzala, abandu mobalakira Farao busana nʼakalyo. Farao mwabũga nʼAbanya Mĩsĩrĩ bosĩ ati, Muye eyiri Yosefũ, nʼekyo akandibabwira, mukolekyo.

⁵⁶Enzala moyabya omo kihugo kyosĩ. Yosefũ mwakingula esyombĩso syosĩ, mwagũlya oko Banya Mĩsĩrĩ. Enzala moyakala omo kihugo kyʼeMĩsĩrĩ.

⁵⁷Ebihugo byosĩ mobyasa eMĩsĩrĩ uku Yosefũ erigula engano, kusangwa enzala moyakala omo kihugo kyosĩ.