Read nande Enzũko 45 Bible Online

Enzũko 45 - nande bible

Enzũko 45

¹Neryo Yosefũ mwatatoka erĩyĩtũlerya embere syʼabandu bosĩ ababya bimene hakũhĩ naye. Neryo mwabirikira ati, Mũlũsaye obuli mundu yʼembere syage. Neryo mohatabya mundu haguma naye omugulu Yosefũ ayĩmĩnyĩsaya oko bagala babo.

²Neryo mwasumba omulenge nʼeririra, nʼAbanya Mĩsĩrĩ mobowa, nʼekĩtũnga kya Farao mokyowa.

³Neryo Yosefũ mwabũga nʼabagala babo ati, Ĩngye indi Yosefũ. Tata wage akineho kwehĩ? Nʼabagala babo mobatatoka erĩmũsũbĩrya, kusangwa mobubaha embere siwe.

⁴Na Yosefũ mwabũga nʼabagala babo ati, Mũyĩtũnde hakũhĩ nage, nabo mobasegera hakũhĩ. Neryo mwabũga nabo ati, Ĩngye indi Yosefũ mugala wenyũ, oyo mwagũlaya eMĩsĩrĩ.

⁵Na lino simuyiswekere, kutse simuyihitaneko, muti mwanyĩgũlaya eno, kusangwa Nyamuhanga mwanyituma embere syenyũ erĩteya engebe yenyũ.

⁶Kusangwa enzala yamatabya omo kihugo mo myaka ĩbĩrĩ. Neryo hakiri yindi myaka ĩtanu, isihendisyabya eririma kutse erigesa omo myaka eyo.

⁷Neryo Nyamuhanga mwanyituma embere syenyũ erĩbateya mo masĩgalira omo kihugo, nʼerĩbalamya mutoke eribyaho ndeke.

⁸Neryo lino, sĩ ʼbũga ambu Ĩnywe mwanyituma eno, nĩkwa ye Nyamuhanga. Naye abĩrĩmbĩra eribya tata uku Farao, nʼomukama wʼekĩtũnga kiwe kyosĩ, nʼeribya mũtabalĩ oko kihugo kyosĩ kyʼeMĩsĩrĩ.

⁹Mwanguhe muhetukire eyiri tata, mumubwire muti, Mugala wawe Yosefũ amabũga ati, Nyamuhanga abiringira mo mukama wʼeMĩsĩrĩ yosĩ. Unyandagalireko, sulinde.

¹⁰Wasyĩkala omo kihugo kyʼeGosenĩ, kandi Wasyabya hakũhĩ nage, uwe, nʼabana bawe, nʼabitsikulu bawe, nʼesyombũlĩ syawe, nʼesyonde syawe, nʼebyosĩ ebyo uwite.

¹¹Nʼeyo yo nasyakulemberera, kusangwa hakine eyindi myaka ĩtanu yʼenzala. Ukasyabya mwera, uwe, nʼabʼekĩtũnga kyawe, nʼabosĩ abo uwite.

¹²Neryo, lebaya, ameso wenyũ amalangira, nʼameso wa mugala wetu Benyamĩna, ngoko bo buno bwage bo bũkabũga nenyũ.

¹³Nenyũ mwasyakanĩrya tata wage olukengerwa lwage losĩ omo Mĩsĩrĩ, nʼoko byosĩ mwabirilangira. Mwasyanguha nʼerĩandagalĩrya tata yʼeno.

¹⁴Neryo Yosefũ mwawa oko bĩkya bya mugala wabo ye Benyamĩna, mwalira, na Benyamĩna mwalirira oko bĩkya biwe.

¹⁵Neryo mwalyatsirira abagala babo bosĩ, mwalirira kubo. Enyũma wʼaho, abagala babo mohakanĩranĩa naye.

¹⁶Engulu eyĩ moyogũbwa omo nyũmba ya Farao, bati, Abagala babo Yosefũ basĩre. Neryo mokyatsemesya Farao nʼabagombe buwe.

¹⁷Na Farao mwabũga na Yosefũ ati, Ubwire bagala benyũ uti, Mukole ekĩ, mũhekaye esyonyama syenyũ, mugende, mubetegere oko kihugo kyʼeKanana.

¹⁸Mwĩmaye tata wenyũ, nʼebĩtũnga byenyũ, mwase kwĩngye. Nage nasyabaha ebibuya ebyʼomo kihugo kyʼeMĩsĩrĩ, mwasyalya oko muboga wʼekihugo.

¹⁹Lino mukahamulawa, mukole ekĩ, Mwĩmaye esyogalĩ syʼomo kihugo kyʼeMĩsĩrĩ busana nʼabana benyũ, na busana nʼabakalĩ benyũ, mulete tata wenyũ, mwase.

²⁰Kandi simusyetsomana ebindu byenyũ kusangwa ebibuya byʼekihugo kyosĩ kyʼeMĩsĩrĩ nĩ byenyũ.

²¹Neryo abagala ba Ĩsraelĩ mobakola batya. Yosefũ mwahabo esyogalĩ, ngoko Farao abũga, mwahabo nʼendanda busana nʼenzira.

²²Mwaha oko buli mundu olukimba olo angaswambala, nĩkwa mwaha Benyamĩna yʼesyofranka magana asatu, nʼesyongimba angaswambala engendo ĩtanu.

²³Neryo mwalebeka ĩse wuwe yʼebĩ: esyopunda ĩkũmĩ esĩhekĩre ebindu byowene byʼeMĩsĩrĩ, nʼesyopunda syʼobũkalĩ ĩkũmĩ esĩhekĩre engano nʼobundu nʼendanda busana na tata wuwe omo nzira.

²⁴Neryo mwahongokya bagala babo, nabo mobagenda neryo mwabũga nabo ati, Simunegenere omo nzira.

²⁵Neryo mobahetuka erĩlũa eMĩsĩrĩ, mobaya omo kihugo kyʼeKanana uku Yakobo tata wabo.

²⁶Neryo mobamũtũlĩrago bati, Yosefũ akineho lino, naye nĩ mũtabalĩ oko kihugo kyosĩ kyʼeMĩsĩrĩ. Omutima wuwe mwalembera kusangwa mwatĩkĩrĩrya ebyo.

²⁷Neryo mobamubwira ebĩnywa byosĩ bya Yosefũ, ebyo abwirabo. Neryo omugulu alola oko syogalĩ esyo Yosefũ amulebeka erimuheka, neryo ekĩrĩmũ kya Yakobo tata wabo mokyamusubako.

²⁸Neryo Ĩsraelĩ mwabũga ati, Bingaho. Yosefũ mugala wage akineho, ngandiyamulolako embere wʼerihola lyage.