Read nande Enzũko 48 Bible Online

Enzũko 48 - nande bible

Enzũko 48

¹Enyũma wʼemyatsi eyĩ, Yosefũ mwabwirwa ambu, Lebaya, tata wawe alwere. Neryo Yosefũ mwĩmya bagala buwe babiri haguma naye, ye Manase na Efũraĩmũ.

²Neryo omugulu Yakobo abwirawa ambu, Lebaya, omugala wawe Yosefũ anemwasa ukʼuwe. Neryo Ĩsraelĩ mwayĩsũnga-sũnga, mwĩkala oko ngyingo.

³Neryo Yakobo mwabũga na Yosefũ ati, Nyamuhanga Omũtokĩ Wʼebyosĩ mwanyihulukira eLũzĩ omo kihugo kyʼeKanana, nʼerinyitsumula.

⁴Kandi mwambwira ati, Lebaya, nasyakuha abana, nʼerĩkũkanyĩrĩrya, kandi nasyakuyira mo bihanda bingi byʼabandu, kandi nasyaha abana bawe ekihugo ekĩ enyũma syawe mo mwandu wa kera na kera.

⁵Na lino abagala bawe babiri abo wabutira omo kihugo kyʼeMĩsĩrĩ isindinakũhĩkako eMĩsĩrĩ, ni bage; Efũraĩmũ na Manase nga Rũbenĩ na Sĩmeonĩ, basyabya bage.

⁶Kandi abana abo wasyaswabuta enyũma wʼabo, basyabya bawe, basyahulwa omo lĩna lyʼabagala babo oko mwandu wabo.

⁷Nage, omugulu nahĩka ePadanĩ, monakwĩrwa Rakelĩ omo kihugo kyʼeKanana omo nzira, ĩtũkĩsĩya ĩtwahĩka eEfurata; nage monamutaho omo nzira ikaya Efurata (eyo nĩ Betelehemũ).

⁸Neryo Ĩsraelĩ abere abisamalira bagala ba Yosefũ, mwabũga ati, Aba ni bahi kwehĩ?

⁹Neryo Yosefũ mwabwira tata wuwe ati, Aba ba bagala bage, abo Nyamuhanga ambera enoka. Neryo Yakobo mwabũga ati, Ngakũbũlaya, ũtũndebo hano, nage nganditsumulabo.

¹⁰Nĩkwa ameso wa Ĩsraelĩ iniamabikula busana nʼobũsyakulu, neryo isiakitoka erilangira. Neryo Yosefũ mwatũndabo hakũhĩ naye, naye mwalyatsirirabo, mwabagalirabo.

¹¹Neryo Ĩsraelĩ mwabũga na Yosefũ ati, Mondaganĩrya nyiti nasyalola oko bũsũ bwawe. Neryo lebaya, Nyamuhanga abĩrĩnyĩkangya abana bawe.

¹²Neryo Yosefũ mwalũsyabo omo katĩkatĩ kʼamarwĩ wuwe. Mũnamĩrya obũsũ buwe bʼoko kitaka.

¹³Neryo Yosefũ mwĩmyabo ababiri, Efũraĩmũ oko byala biwe byʼamali, erĩmũlolya oko byala byʼamalembe bya Ĩsraelĩ, na Manase omo byala biwe byʼamalembe erĩmũlolya oko byala byʼamali bya Ĩsraelĩ, neryo mwatũndabo hakũhĩ naye.

¹⁴Neryo Ĩsraelĩ mwakakya okuboko kuwe kwʼamali, mwahĩrako oko mutwe wa Efũraĩmũ, oyo wabya mulere, nʼebyala biwe byʼamalembe oko mutwe wa Manase, iniakaminyerera omo byala, kusangwa Manase abya kambere.

¹⁵Neryo Yakobo mwatsumula Yosefũ, nʼerĩbũga ati, Nyamuhanga oyo abotata wage abo Abrahamũ na Ĩsaka balendera embere siwe, Nyamuhanga oyo wanyirembera omo ngebe yage yosĩ erĩhĩka mũnabwĩre.

¹⁶Omũlaĩka oyo wanyĩtongolaya kwʼebibi byosĩ, atsumule abalwana aba. Erĩna lyage lyahulawe kubo, nʼerĩna lyʼabotata wage Abrahamũ na Ĩsaka. Bakanye eribya bangi omo kihugo.

¹⁷Omugulu Yosefũ alangira ngoko tata wuwe amahĩra ebyala biwe byʼamali oko mutwe wa Efũraĩmũ, mokĩtamũtsemesya. Neryo mwasumba ebyala bya tata wuwe erĩlũsyabyo oko mutwe wa Efũraĩmũ erĩhĩrabyo oko mutwe wa Manase.

¹⁸Neryo Yosefũ mwabwira tata wuwe ati, Butsira bitya, tata wage. Kusangwa oyũ ni kambere. Ũhĩre ebyala byawe byʼamali oko mutwe wuwe.

¹⁹Neryo tata wuwe mwagana, mwabũga ati, Nyĩnasĩ, mugala wage, nyĩnasĩ. Naye nibya anemwendisyabya kihanda, nibya asyabya mukulu, nĩkwa omugala wabo Omulere asyabya mukulu kwiye, nʼabana buwe basyabya bihanda bingi.

²⁰Neryo Yakobo mwatsumulabo ekiro ekyo, ati, Busana nenyũ Ĩsraelĩ asyatsumula ati, Nyamuhanga akuyire nga Efũraĩmũ na Manase! Litya Yakobo mwahĩra Efũraĩmũ yʼembere sya Manase.

²¹Neryo Ĩsraelĩ mwabwira Yosefũ ati, Lebaya, nyiri hakũhĩ nʼerihola. Nĩkwa Nyamuhanga asyabya haguma nenyũ, asyabasũbya omo kihugo kyʼabotata wenyũ.

²²Kandi nabirikuha erĩgabo liguma ĩnene kwilaba eryʼabagala benyũ eryo nalũsaya omo byala byʼOmũamorĩ, omo mũyalĩ wage nʼobuta bwage.