Read nande Enzũko 49 Bible Online

Enzũko 49 - nande bible

Enzũko 49

¹Neryo Yakobo mwabirikira bagala buwe, mwabũga ati, Mũhĩndane haguma, inatoka eribabwira ebĩkandĩsyabahĩkako oko biro byʼenyũma,

²Mukuma-kumane, muhulikirire, ĩnywe bagala ba Yakobo; Muhulikirire Ĩsraelĩ tata wenyũ.

³Rũbenĩ, uwe uli kambere kage, Akagala kage nʼerĩtsũka lyʼamaka wage; Omukulu wʼerĩsĩkya, nʼomukulu wʼamaka.

⁴Eribera nʼerĩũtĩka ngʼamagetsi, siwendisyabya nʼobukulu; Kusangwa mowasambira oko ngyingo ya tata wawe; Neryo mowatsandyayo ukasambira oko ngotsero yage.

⁵Sĩmeonĩ na Lawĩ ni bagala; Emĩyalĩ yabo ni bindu byʼamalwa byʼomwaga.

⁶Uwe mutima wage, sũhĩke omo mbĩta yabo; Olukengerwa lwage, silubegerane omo ndeko syabo; Kusangwa omwʼihitana lyabo mobĩta abandu, Nʼomo bukali bwabo mobakona esyonume syʼesyonde.

⁷Erihitana lyabo litsumawe, kusangwa lyabya lĩkalĩre. Nʼeriagalirwa lyabo litakirawe, kusangwa lyabya butsira erisasira; Nasyagababo ewa Yakobo, Nʼeripanzabo ewa Ĩsraelĩ.

⁸Yũda, abagala benyũ basyakupipa. Ebyala byawe byasyabya oko bĩkya byʼesyonzĩgũ syawe; Abagala ba tata wawe basyũnama embere syawe.

⁹Yũda ni kyana kyʼendale; Uwe mugala wage wabirihangana ũkalũa omo buhiyi; Akũnama, akakangama ngʼendale, Ngʼendale yʼobũkalĩ nindi wasyasĩsĩryayo?

¹⁰Omũtso wʼobwami sĩendĩsyalũa uku Yũda, Kutse omũtso wʼomũtabalĩ sĩendĩsyalũa hakũhĩ nʼebisando biwe, Erĩhĩka aho Sĩlo asyasira; Kandi abandu basyamowa.

¹¹Akahanga ekyana kyʼepunda yiwe oko mũlĩkĩ wʼebĩnyũ, Akahanga ekyana kyʼepunda yiwe oko mutahi wʼebĩnyũ bibuya. Akeraya esyongimba siwe omo bĩnyũ, Nʼebyambalo biwe omo musasi wʼebĩnyũ.

¹²Ameso wuwe akasasuka omo bĩnyũ, Nʼameno wuwe akahenaya omo masabũ.

¹³Zebũlũnĩ asyĩkala oko mukyingyi wʼengetsi; Naye asyabya ngonde yʼamato, Nʼomutano wuwe asyabya hakũhĩ nʼeSĩdonĩ.

¹⁴Ĩsakarĩ ni punda yʼamaka, Akabundama omo katĩkatĩ kʼebĩyĩte byʼesyombũlĩ;

¹⁵Mwalangira ahʼeriluhukira nga howene; Nʼekihugo nga ni kyʼerĩmũtsemesya; Mũnamya ekitigo kiwe okwʼiheka emiheke, Mwabya mukobe wʼomũbĩrĩ akalĩre.

¹⁶Danĩ asyatswera abandu buwe, Ngʼomuguma gʼoko bihanda bya Ĩsraelĩ.

¹⁷Danĩ asyabya nzoka omo nzira, Enzoka omo mbalu, Eyikaluma ebigere byʼesabayĩrĩ, Kikaleka oyũhekĩrwe iniatogera enyũma.

¹⁸Ngalindirira erĩlamya lyawe, uwe Mwami Mukulu.

¹⁹Gadĩ, omulondo asyamũhatatanĩa; Nĩkwa asyapũra oko tũsĩnzĩro twabo.

²⁰Nĩkwa Aserĩ, akalyo kuwe kasyaboga, Naye asyatsumba ebĩsĩhĩre byʼabami.

²¹Nafũtalĩ ni ngabi yibohwere; Akagambula ebĩnywa bibuya.

²²Yosefũ ni mutahi owali kwʼebĩgũma, Omutahi owali kwʼebĩgũma hakũhĩ nʼeyĩsoko; Emitahi yiwe ikalaba oko lũhĩmbo.

²³Abalasĩ bʼemisoha babĩrĩmwagalya kutsibu, Mobamulasa, nʼerĩmwendererya;

²⁴Nĩkwa obuta buwe mobwasĩka nʼamaka, Amaboko wuwe mwahĩrwa mwʼamaka, Busana nʼebyala byʼOmũtokĩ Wʼebyosĩ wa Yakobo. Erĩlũa aho nĩ mũlĩsya wʼesyombũlĩ, erĩbwe lya Ĩsraelĩ,

²⁵Busana na Nyamuhanga wa tata wawe, oyũkakũwatĩkaya, Na busana nʼOmũtokĩ Wʼebyosĩ oyukakutsumula, Omo mĩyĩsa yʼelubula lwʼendata, Emĩyĩsa yʼemitobero eyĩbũndamĩre omwisi, Emĩyĩsa yʼamabere nʼeyʼekĩsũko kyʼenda.

²⁶Emĩyĩsa ya tata wawe Yabirilaba emĩyĩsa yʼabotata wage Erĩhĩka oko ndũlĩ yʼebitwa byʼerikota; Yasyabya oko mutwe wa Yosefũ, Nʼoko kahũlĩ-hũlĩ kʼoyo wahigulawa nʼabagala babo.

²⁷Benyamĩna ni boha eyikatulanga-tulanga; Omo ngyakya-ngyakya akalya obuhiyi, Nʼomwʼĩgolo akagaba ebyanyegawa.

²⁸Abosĩ aba ni bihanda ĩkũmĩ na bibiri bya Ĩsraelĩ. Nʼebyo byo tata wabo abũga nabo nʼeritsumulabo, obuli muguma ngʼomũyĩsa wuwe ngoko amutolere.

²⁹Neryo Yakobo mwategekabo ati, Nasyeya abʼewetu. Munyite haguma nʼabotata omo mwangalũ owali omwʼirima lya Efũronĩ Omũhĩtĩ,

³⁰omo mwangalũ owali omwʼirima lyʼeMakĩpela, owali embere syʼeMamũrĩ, omo kihugo kyʼeKanana, ogo Abrahamũ agula haguma nʼeririma uku Efũronĩ Omũhĩtĩ busana nʼeribya kitaka kyʼamahero.

³¹Aho bata Abrahamũ na Sara omũkalĩ wuwe; aho bata Ĩsaka na Rebeka omũkalĩ wuwe; aho nage nata Lea.

³²Eririma nʼomwangalũ owalimo ebyagulawa oko bana ba Hetĩ.

³³Neryo Yakobo abere abibuga erihana bagala buwe, mwakũnya amagulu wuwe oko ngyingo, nʼomutima mwatwĩka, neryo mweya abʼewabo.