Read nande Enzũko 6 Bible Online

Enzũko 6 - nande bible

Enzũko 6

¹Kandi omugulu abandu batsũka erikanya omo kihugo, kandi ibakabuta abana bʼobũkalĩ,

²abagala ba Nyamuhanga mobalangira abali bʼabandu ko bali babuya, neryo mobayĩmĩrya abakalĩ bosĩ abo basĩma.

³Neryo Omwami Mukulu mwabũga ati, Omũlĩmũ wage siendisyabya akakuba buhaka nʼomundu kera na kera, kusangwa naye nibya ni mubiri: kikaleka ebiro biwe ibyasyabya emyaka erĩgana nʼamakũmĩ abiri.

⁴NʼAbanefĩlĩ babya omo kihugo oko biro ebyo, kandi enyũma wʼaho, omugulu abagala ba Nyamuhanga bĩmaya oko bali bʼabandu, mobabutirabo abana. Aba babya bandu bʼamaka ba kera, abandu basĩkĩbawa.

⁵Neryo Omwami Mukulu mwalangira obubi bwʼabandu ibwamabya bungi omo kihugo, nʼakandi obuli bũlengekanĩa bwʼerĩganĩrya lyʼomutima wabo bwabya bubi busa-busa emigulu yosĩ.

⁶Neryo Omwami Mukulu mwayĩkũbya bomo busana nʼeribumba omundu omo kihugo, mokyamwĩta bũlĩge omo mutima wuwe.

⁷Neryo Omwami Mukulu mwabũga ati, Ngandĩsyaherya omundu oyo nabumba erĩlũa oko kihugo, omundu, nʼenyama, nʼebindu ebikakululuka, nʼesyonyonyũ syʼomo kyanya. Kusangwa namayĩkũbya bomo busana nʼeribumbabyo.

⁸Nĩkwa Noa mwabana erĩsĩmwa omo meso wʼOmwami Mukulu.

⁹Aya wa masako wʼesyondengo sya Noa. Noa abya mundu utunganene, ĩnĩahĩkene omo syondengo siwe. Noa mwabya akalendera haguma na Nyamuhanga.

¹⁰Neryo Noa mwabuta bagala basatu, Semũ, Hamũ, na Yafetĩ.

¹¹Neryo ekihugo ikyabiritsanda embere sya Nyamuhanga, nʼekihugo mokyũsũla nʼomwaga.

¹²Neryo Nyamuhanga mwalangira ekihugo, neryo, lebaya, ikyabiritsanda kusangwa abandu bosĩ ĩbabĩrĩyĩtsandĩrya emibere yabo omo kihugo.

¹³Neryo Nyamuhanga mwabũga na Noa ati, Namayisoha eribuga abandu bosĩ; kusangwa ekihugo kyabĩrĩũsũla nʼomwaga busana nabo. Lebaya, ngandĩsyaheryabo haguma nʼekihugo.

¹⁴Uyibatsire obwato bʼomuti wʼegofere. Wasyahĩra omo bwato mwʼesyongonde, wasyahakabyabo enĩmba omwisi nʼeyĩhya.

¹⁵Ko wasyakola utya eribatsabo. Obuli bʼobwato bwasyabya emetere erĩgana nʼamakũmĩ ani, nʼobugali bwabo emetere amakũmĩ abiri nʼeyĩsatu, nʼobuli bwʼendata emetere ĩkũmĩ nʼeyĩsatu.

¹⁶Wasyahĩra erĩdĩrĩsa oko bwato, obuli bwalyo ni nusu yʼemetere erilola endata. Olũyĩ lʼobwato wasyahĩralo omo ndambi yabo; wasyahĩramo manyũmba asatu, eyʼahisi, eyʼakabiri endata nʼeyʼakasatu endata.

¹⁷Neryo nage, lebaya, ngaleta erigunga lyʼamagetsi oko kihugo, erĩherya, ebyosĩ ebikahumula ebiri nʼengebe omwisi wabyo eyĩkwa oko bũtũkũ. Obuli kindu kiri omo kihugo kyasyahola.

¹⁸Nĩkwa nasyĩmanĩa endagano yage haguma nawe. Nawe wasyingira omo bwato, uwe, nʼabagala bawe, nʼomũkalĩ wawe, nʼabakalĩ bʼabagala bawe.

¹⁹Neryo obuli kindu kyʼomubiri ekiriho, ulete bibiri-bibiri ebyʼobuli kihanda omo bwato erĩteyabyo ibikinahumula haguma nawe. Byasyabya ebyʼobulume nʼebyʼobũkalĩ.

²⁰Oko syonyonyũ omuhanda wasyo, nʼoko syonde ngʼomuhanda wasyo, nʼoko buli kindu kikakululuka oko kitaka ngʼomuhanda wakyo, bibiri-bibiri, ebyʼobuli muhanda byasyasa kuwe erĩteyabyo bibyeho.

²¹Neryo wasyayĩmĩrya emihanda yosĩ yʼakalyo akakalibawa, nʼeriyikumakumirako, byasyabya kalyo busana nawe na busana nasyo.

²²Neryo Noa mwakola atya, ngoko Nyamuhanga amuhana.