Read nande Enzũko 8 Bible Online

Enzũko 8 - nande bible

Enzũko 8

¹Neryo Nyamuhanga mwibuka Noa, nʼesyonyama syosĩ, nʼesyonde syosĩ esyabya haguma naye omo bwato. Neryo Nyamuhanga mwalabya erihunga lyʼoko kihugo, neryo amagesti mwatsũka erihwako.

²Nʼesĩsoko syʼemitobero nʼebĩtũ byʼekyanya mobyũmbya erĩwĩsya embũla, nʼembũla eyĩkalũa omo kyanya moyakakĩrĩbwa.

³Neryo amagetsi mwahwerekerera erĩlũa oko kihugo. Enyũma wʼebiro erĩgana nʼamakũmĩ atanu amagetsi mwasonda erihwa.

⁴Nʼoko mukera wʼeyirinda, nʼoko kiro kyʼerĩkũmĩ nʼebirinda kyʼomukera, obwato mobwalegera oko kitwa kyʼeAraratĩ.

⁵Amagetsi mwasonda erihwa erĩhĩka oko mukera wʼerĩkumĩ, oko kiro kyʼerĩtsũka kyʼomukera wʼerĩkũmĩ esyosingi syʼebitwa mosyalolwako.

⁶Neryo oko ndũlĩ yʼebiro makũmĩ ani, Noa mwakingula erĩdĩrĩsa lyʼobwato eryo abatsa,

⁷neryo mwahũlũkya ekikororo, nakyo mokyagenda-genda erĩhĩka oko kiro amagetsi uma oko kihugo.

⁸Neryo Noa mwahũlũkya akalĩkũkũ erĩrebya amagetsi ngʼamakeha oko kitaka.

⁹Nĩkwa akalĩkũkũ mokatabana ahʼerĩkĩra, kyaleka ikasuba eyiri Noa omo bwato. Kusangwa amagetsi abya oko kitaka kyʼekihugo kyosĩ. Neryo Noa mwasumba ebyala biwe mwĩmyako, mwĩngĩryako omo bwato.

¹⁰Neryo mwalinda ebindi biro birinda, kandi mwahũlũkya akalĩkũkũ kʼeyĩhya oko bwato.

¹¹Neryo akalĩkũkũ ako mokaswamũhĩkako omwʼĩgologolo. Neryo, mokasa, ikanawite oko kikoma kyʼomũzeĩtũnĩ omo buno bwako ekyo koha, kyatuma Noa iniaminya amagetsi kwʼamahwerekerera oko kitaka.

¹²Neryo mwalinda kandi ebindi biro birinda neryo mwahũlũkya akalĩkũkũ nako mokataswasuba ukwʼiye.

¹³Neryo oko mwaka wʼamagana ndatu nʼomuguma, oko mukera wʼerĩtsũka, oko kiro kyʼerĩtsũka omukera, amagetsi muma oko kitaka. Neryo Noa mwalũsya olutwe lwʼobwato, mwalangira ekitaka ko kikasonda eriuma.

¹⁴Nʼoko mukera wʼakabiri oko kiro kyʼamakũmĩ abiri nʼebirinda kyʼomukera, ekitaka ikyabiriuma.

¹⁵Nĩkwa Nyamuhanga mwabũga na Noa ati,

¹⁶Huluka omo bwato, uwe, omũkalĩ wawe, abana bawe, haguma nʼabalĩana bawe haguma nawe.

¹⁷Ũhũlũkaye haguma obuli kindu, kiriho haguma nawe ebyʼemihanda yosĩ, esyonyonyũ, esyonde, nʼobuli kindu ekikakululuka oko kitaka, bibutire kutsibu oko kihugo, bibane ehyana, nʼerikanyirira omo kihugo.

¹⁸Neryo Noa mwahuluka, abagala buwe, mũkalĩwe, nʼabalĩana buwe.

¹⁹Obuli nyama, obuli kindu ekikakululuka, nʼobuli nyonyũ, obuli kindu kikagenda oko kihugo, ngʼemihanda yabyo, mobyahuluka bĩkalũa omo bwato.

²⁰Neryo Noa mwahĩmba ekiherero busana nʼOmwami Mukulu, neryo mwĩmya oko buli nyama yowene, nʼobuli nyonyũ yowene, neryo mwayirabyo mo mahere wʼerĩokererya oko kiherero.

²¹Neryo Omwami Mukulu mowa erikumba lĩsĩhĩre. Neryo Omwami Mukulu mwabũga omo mutima wuwe, ati, Sindiendisyaswatakira ekitaka busana nʼomundu kusangwa amalengekanĩa wʼomutima wʼomundu ni mabi erĩtsũka omo bũlwana. Kandi sindiendĩsyaswĩta obuli kindu kiriho, ngoko nabirikola.

²²Omugulu ekihugo kikineho, omugulu wʼerihera nʼerigesa, omugulu wʼeritsuku nʼowʼekĩhũhanĩ, omugulu wʼobugoma nʼomugulu wʼeritsuku, omusibo nʼekiro sĩbyendĩsyũmbya.