Read nande Enzũko 9 Bible Online

Enzũko 9 - nande bible

Enzũko 9

¹Neryo Nyamuhanga mwatsumula Noa nʼabagala buwe, mwabũga nabo ati, Mubute, mukanyirire, mũsũlaye ekihugo.

²Obuli nyama syʼekihugo, obuli nyonyũ syʼomo kyanya, nʼamahere gosĩ gʼomo ngetsi, ebyosĩ ebikakululuka oko kitaka, byasyabubaha nʼeribasaga, neryo syabĩrĩhĩrwa omo byala byenyũ.

³Obuli kindu kiriho ekikagenda-genda byasyabya kalyo kenyũ. Ngoko nabaha emyaka mibisi ko namabaha nyitya ebyosĩ.

⁴Nĩkwa Simusyerya enyama ĩtalwĩre mʼomusasi, kusangwa go ngebe yayo

⁵Kwenene omusasi wenyũ go ngebe yenyũ, nasyabũlyago. Oko buli nyama nasyabũlyago, nʼomo byala byʼomundu, nʼomo byala bya mugala wabo mundu, nasyabũlya engebe yʼomundu.

⁶Omundundi oyũkũta omusasi wʼomundu, omusasi wuwe asyũtwa nʼomundu, kusangwa Nyamuhanga mwahangika omundu omo kĩsosekanĩo kiwe.

⁷Nĩkwa Ĩnywe, mubute, mukanyirire; mubute kutsibu omo kihugo, mukanyirire mukyo.

⁸Neryo Nyamuhanga mwabũga na Noa, nʼabagala buwe ati,

⁹Nage, lebaya, nasyahanganĩa endagano yage haguma nenyũ, na haguma nʼabana benyũ enyũma wenyũ,

¹⁰nʼakandi haguma nʼobuli kihangikwa kiriho ekiri haguma nenyũ, esyonyonyũ, esyonde, nʼobuli nyama yʼekihugo haguma nenyũ, oko byosĩ ebĩkalũa omo bwato, obuli nyama yʼekihugo.

¹¹Neryo nasyahanganĩa endagane yage haguma nenyũ. Nĩkwa emibiri yosĩ siyendisyaswalũsĩbwaho kandi omwʼigunga lyʼamagetsi; kandi erigunga lyʼamagetsi siryendisaswaherya ekihugo kyo kandi.

¹²Neryo Nyamuhanga mwabũga ati, Ekĩ ni kiminyikalo kyʼerilagana eryo ngahĩra omo katĩkatĩ kage nenyũ nʼobuli kihangikwa ekiri haguma nenyũ, oko syondengo sya kera na kera:

¹³Ngakanda ekima kyage omo bĩtũ, nakyo kyasyabya kiminyikalo kyʼendagane omo katĩkatĩ kage nʼekihugo.

¹⁴Neryo kyasyabya omugulu ngaleta ekĩtũ endata wʼekihugo, ekima kyasyalolwako omo kĩtũ.

¹⁵Nage nasyibuka endagano yage, eyiri omo katĩkatĩ kage nenyũ, nʼobuli kihangikwa ekiriho kyʼemibiri yosĩ. Amagetsi siendisyaswabya akagunga kandi nʼerĩherya emibiri yosĩ.

¹⁶Ekima kyasyabya omo kĩtũ; nage nasyasamalirakyo, inatoka eryibuka endagano ya kera na kera omo katĩkatĩ ka Nyamuhanga nʼobuli kihangikwa ekiriho kyʼemibiri yosĩ eyiri muna-kihugo.

¹⁷Neryo Nyamuhanga mwabũga na Noa ati, Ekĩ nĩ kiminyikalo kyʼendagano eyo nabĩrĩhanganĩa omo katĩkatĩ kage nʼemibiri yosĩ eyiri muna-kihugo.

¹⁸Neryo abagala ba Noa, abalũa omo bwato, babya Semũ, Hamũ, na Yafetĩ: neryo Hamũ nĩ ĩse wa Kanana.

¹⁹Abasatu aba babya bana ba Noa, nabo mobatsungana oko kihugo kyosĩ.

²⁰Neryo Noa mwatsũka eribya mũlĩmĩ, neryo mwahera eririma lyʼebĩnyũ.

²¹Neryo mwapũlya oko bĩnyũ, nĩkwa mwakũnda, neryo mwabya ndũmbũ omo hema yiwe.

²²Neryo Hamũ ĩse wa Kanana mwalangira endũmbũ yʼĩse wuwe, neryo mwabwira bagala babo babiri ababya eyĩhya.

²³Neryo Semũ na Yafetĩ mobĩmya olukimba, mobahĩralo oko bitigo byabo, mobagenda bũnyũma-nyũma, mobaswika endũmbũ yʼĩse wabo. Amũsũ wabo mwalola enyũma, mobatalangira endũmbũ yʼĩse wabo.

²⁴Neryo Noa mwabuka oko bĩnyũ biwe, mwaminya ekyo mugala wuwe mulere alyamukolera.

²⁵Neryo mwabũga ati, Kanana atakirawe. Akandisyabya mukobe wʼabakobe oko bagala babo.

²⁶Neryo mwabũga ati, Omwami Mukulu, Nyamuhanga wa Semũ apipawe. Kanana abye mukobe wuwe.

²⁷Nyamuhanga akanyaye Yafetĩ, Ĩkale omo mahema wa Semũ, Kanana abye mukobe wuwe.

²⁸Neryo Noa mwabyaho enyũma wʼerigunga emyaka magana asatu nʼamakũmĩ atanu.

²⁹Neryo ebiro byosi bya Noa byabya emyaka magana mwenda nʼamakũmĩ atanu, neryo mwahola.