Read nande 2 Samwelĩ 10 Bible Online

2 Samwelĩ 10 - nande bible

2 Samwelĩ 10

¹Nʼenyũma wʼaho, omwami wʼAbaamonĩ mwahola, na Hanũnĩ mugala wuwe mwaya oko ngoma yiwe mo mwami.

²Kandi Dawĩdĩ mwabũga, ati, Ngandikolera Hanũnĩ mugala wa Nahasĩ yʼebibuya, ngoko ĩse wuwe mwanyikolera ebibuya. Kyaleka Dawĩdĩ iniatuma abagombe buwe erĩmũkĩranĩa busana nʼĩse wuwe. Nĩkwa omugulu abagombe ba Dawĩdĩ bahĩka omo kihugo kyʼAbaamonĩ,

³abanya-mwami ba Amonĩ mobabwira Hanũnĩ omukama wabo bati, Ũkaganĩraya uti Dawĩdĩ akasĩkaya tata wawe erikutumira abakĩranĩa kwehĩ? Dawĩdĩ sialitatuma abagombe buwe erĩyĩtegererya omũyĩ, nʼeriringago, nʼerĩheryago kwehĩ?

⁴Neryo Hanũnĩ mwahamba bagombe ba Dawĩdĩ, mwasĩsa oluhande lwʼesyonderũ syabo, neryo mwatwĩra esyongimba syabo omo katĩkatĩ erĩhĩka oko matako wabo, neryo mwatumabo bagende.

⁵Nʼomugulu batũlĩrago Dawĩdĩ, mwatuma abakayahĩndana nabo; kusangwa abalume abo ĩbabĩrĩkwa esĩsonĩ nene. Neryo omwami mwabũga ati, Mulindirire eYerĩko erĩhĩkĩra aho esyonderũ syenyũ syasyalasira neryo imwasubula.

⁶Kandi omugulu abagala ba Amonĩ balangira ko bamabĩkũbwa nye na Dawĩdĩ, abagala ba Amonĩ mobasĩgĩra Abasũrĩa bʼeBetĩ-rehobĩ, nʼAbasũrĩa bʼeSoba, emilondo yʼabasĩrĩkanĩ eyikagenda omo bisando makũmĩ abiri (20,000), nʼomwami wʼeMaka nʼabandu elfu nguma (1,000), nʼabalume bʼeTobũ elfu ĩkũmĩ nʼĩbĩrĩ (12,000).

⁷Omugulu Dawĩdĩ owa, mwatuma Yoabũ, nʼomulondo gosĩ wʼabasĩrĩkanĩ, esyombangĩ.

⁸Neryo abagala ba Amonĩ mobahuluka, mobahĩra ekilaliriro erĩtegekanĩa malwa ahakingirira olũkyo lwʼomũyĩ, nʼAbasũrĩa bʼeSoba nʼabʼeRehobũ, nʼabalume bʼEtobũ nʼeMaka, mobahĩra ekilaliriro omolĩ.

⁹Nʼomugulu Yoabũ alangira amalwa kwʼamabitekwa embere nʼenyũma siwe, mwasombola abowene-wene bʼomo balume bosĩ ba Ĩsraelĩ mwʼabatasĩ amalwa mwatondekabo erilwa nʼAbasũrĩa.

¹⁰Nĩkwa abasaka oko bandu mwahĩrabo omo byala bya Abĩsayĩ mugala wabo. Neryo mwatondekabo erilwa nʼabana ba Amonĩ.

¹¹Neryo mwabũga ati, Abanya Sũrĩa bamanyĩrengya maka, wasyangwatĩkya; nĩkwa bagala ba Amonĩ bamakũlengya maka, nasyasa nʼerĩkũwatĩkya.

¹²Mubye nʼamaka, tulwe kilume-lume busana nʼabandu betu, na busana nʼemĩyĩ ya Nyamuhanga wetu; kandi Omwami Mukulu akole ekiri kibuya omo meso wuwe.

¹³Neryo Yoabũ nʼabandu babya haguma naye mobayĩtũnda erilwa nʼAbasũrĩa; nabo mobasaga embere siwe.

¹⁴Nʼomugulu abana ba Amonĩ balangira Abasũrĩa ko bamabitibita, nabo mobasaga embere sya Abĩsayĩ, mobingira omo mũyĩ. Neryo Yoabũ mwasubula oko malwa nʼabana ba Amonĩ, mwahĩka eYerũsalema.

¹⁵Neryo mugulu Abasũrĩa balangira ko bakĩndĩrwe embere sya Ĩsraelĩ, mobayĩhĩndanĩa haguma.

¹⁶Neryo Hadarezerĩ mwatumira oko Basũrĩa ababya oko gundi mwisirya wʼolũsĩ Efũratĩ eriretabo mobahĩka eHelamũ, haguma na Sobakĩ omũsondolĩ wʼomulondo wa Hadarezerĩ erisondolabo.

¹⁷Dawĩdĩ mwabwirwa; naye mwahĩndanĩa Abaĩsraelĩ bosĩ bo haguma, mobasoka eYorodanĩ mobahĩka eHelamũ. Kandi Abasũrĩa mobateka endwiro erilwa na Dawĩdĩ, mobalwa naye.

¹⁸Nĩkwa Abasũrĩa mobasaga embere sya Ĩsraelĩ; na Dawĩdĩ mwĩta oko Basũrĩa ko bandu bʼesyogalĩ magana alinda (700), nʼabakagenda oko syosabayĩrĩ makũmĩ ani (40,000), kandi mwĩta Sobakĩ omũsondolĩ wʼomulondo wabo, neryo mwaholera aho.

¹⁹Kandi omugulu abami bosĩ ababya bagombe ba Hadarezerĩ balangira ko bamabĩsĩngwa nʼAbaĩsraelĩ, mobasangana na Ĩsraelĩ, mobakolerabo. Neryo Abasũrĩa mobubaha erĩswawatĩkya bagala ba Amonĩ.