Read nande 2 Samwelĩ 12 Bible Online

2 Samwelĩ 12 - nande bible

2 Samwelĩ 12

¹Neryo Omwami Mukulu mwatuma Natana uku Dawĩdĩ. Abere ahĩka ewuwe mwamubwira ati, Habya bandu babiri omo mũyĩ muguma; omuguma abya mundu wʼebindu, nʼogundi abya nzama.

²Omundu wʼebindu oyo abya wite ebihangulo bingi byʼesyombũlĩ nʼesyonde;

³Nĩkwa omwera oyo siabya awitekĩ, ka nʼakatsugutsi ako agula nʼerĩkũlyako; nako mokakula haguma nʼabana buwe; mokabya kakalya oko hyalya hiwe, nʼerĩpũlĩrya oko lũtehĩ luwe, nʼerigotsera oko kikuba kiwe, kandi kabya kwʼiye nga mwali wuwe.

⁴Neryo omũgenĩ mwahĩka oko mundu wʼebindu, neryo mwatanza erĩĩmya omo mbũlĩ siwe nʼesyonde siwe, erikerera omũgenĩ oyo wamũhĩkako, nĩkwa mwĩmya akatsugutsi kʼomundu mwera oyo, neryo mwakererako omundu oyo, omũgenĩ wuwe.

⁵Neryo erihitana lya Dawĩdĩ molyagulumira oko mundu oyo ko kutsibu; kandi mwabwira Natana, ati, Ngoko Mwami Mukulu aliho, omundu wakola ekĩ atolere erihola.

⁶Kandi asyasũbũlya akatsugutsi ako ko ngendo ĩnĩ, kusangwa abirikola omwatsi oyũ, kandi kusangwa siawite eriganyira.

⁷Neryo Natana mwabwira Dawĩdĩ, ati, Omulume oyo ni we! Omwami Mukulu Nyamuhanga wa Ĩsraelĩ, ati, Ingye nakũhakabaya amagũta eribya mwami wa Ĩsraelĩ, kandi monakũlamya omo byala bya Saũlo.

⁸Kandi monakuha ekĩtũnga kyʼomukama wawe, kandi abakalĩ bʼomukama wawe oko kĩkũba kyawe, kandi monakuha ekihanda kya Ĩsraelĩ nʼekya Yũda; kandi ebyo byamabya bike nangakutomekere kwʼebindi bindu bingi ngʼebĩ.

⁹Busana nakĩ wabiripona ekĩnywa kyʼOmwami Mukulu, erikola ekiri kibi omo meso wuwe kwehĩ? Wabĩrĩta Ũrĩa Omũhĩtĩ omo mũyalĩ, kandi wabĩrĩmya omũkalĩ wuwe eribya mũkalĩ wawe, kandi wabĩrĩmwĩta omo mũyalĩ wʼabana ba Amonĩ.

¹⁰Nĩkwa lino omũyalĩ sĩendĩsyalũa omo nyũmba yawe na kera, kusangwa wabirinyipona, ĩwabĩrĩmya omũkalĩ wa Ũrĩa Omũhĩtĩ eribya mũkalĩ wawe.

¹¹Omwami Mukulu ati, Lebaya, nasyahanganĩa obubi bʼomo nyũmba yawe; kandi nasyalũsya bakalĩ bawe embere syʼameso wawe, nʼerihabo uku mũlĩkyenyũ, naye asyagotsera nʼabakalĩ bawe omo mwisi-wape.

¹²Kusangwa uwe wakolakyo bũbĩso-bĩso; nĩkwa ĩngye nasyakola omwatsi oyo embere syʼAbaĩsraelĩ bosĩ, omwʼitungi.

¹³Neryo Dawĩdĩ mwabwira Natana, ati, Nabĩrĩhalya oko Mwami Mukulu. Kandi Natana mwabwira Dawĩdĩ ati, Omwami Mukulu abĩrĩlũsya ekibi kyawe; siwendisyahola.

¹⁴Nĩkwa, busana nʼerikola ekĩ, wabiriha esyonzĩgũ syʼOmwami Mukulu syʼomwanya munene wʼeritsuma, omwana oyo asyakubutira asyahola kwenene.

¹⁵Neryo Natana mwasuba ewuwe. Neryo Omwami Mukulu mwaswĩrya omwana oyo mũkalĩ wa Ũrĩa abutira Dawĩdĩ yʼomo ndwala, neryo mwalwala kutsibu.

¹⁶Neryo Dawĩdĩ mwasaba Nyamuhanga busana nʼomwana oyo; kandi Dawĩdĩ mwatsira kalyo, mwingira omwiwe eriyagotsera ahisi oko kitaka ekiro kyosĩ ekyo.

¹⁷Neryo abakulu bʼenyũmba yiwe mobahangana hakũhĩ naye bati, bamũhanganaye, nĩkwa mwagana, kandi mwatalya kalyo haguma nabo.

¹⁸Neryo oko kiro kyʼebirinda, omwana oyo mwahola. Nʼabagombe ba Dawĩdĩ mobubaha erimubwira omwana oyo kwʼabirihola; kusangwa bati, Lebaya, omugulu omwana abya iniakineho, motwabũga naye, mwatatuhulikirira, sĩendĩyagalya twamamubwira tuti omwana abirihola kwehĩ?

¹⁹Nĩkwa omugulu Dawĩdĩ alangira bagombe buwe bakabũga omo bihwehwe, Dawĩdĩ mwaminyiraho omwana kwʼaholĩre; neryo Dawĩdĩ mwabũlya bagombe buwe ati, Omwana aholĩre kwehĩ? Nabo bati, Aholĩre.

²⁰Neryo Dawĩdĩ mwahangana aho, mwayikosa, mwayĩhakabya amagũta, mwambala esindi ngimba; neryo mwayaramya omo nyũmba yʼOmwami Mukulu. Neryo mwahĩka omuwe; nʼomugulu asonda kalyo, mobateka ebyalya embere siwe, neryo mwalya.

²¹Neryo abagombe buwe mobamũbũlya bati, Omwatsi ogo ukabikola ni wahi kwehĩ? Mowatsira akalyo nʼeririra omwana akiriho; nĩkwa omwana abihola, wamahangana nʼerirya akalyo.

²²Naye mwabũga ati, Omugulu omwana akiriho, monatsira kalyo nʼeririra, kusangwa nabũga nyiti, Nindi wasĩ Omwami Mukulu kwʼangananyiganyira, nʼomwana iniabyaho kwehĩ?

²³Nĩkwa lino abirihola, nangasyatsĩra kalyo busana nakĩ kwehĩ? Nanganamũsũbya kwehĩ? Nasyaya aho ali, nĩkwa siendisyasuba aho ndi.

²⁴Neryo Dawĩdĩ mwakĩranĩa Batĩseba mũkalĩwe. Neryo mwagotsera naye; naye mwabuta mugala, neryo Dawĩdĩ mwamuluka mo Solomono. Nĩkwa Omwami Mukulu mwanza omwana oyo.

²⁵Neryo Omwami Mukulu mwatuma omũmĩnyererĩ Natana, naye mwaluka erĩna liwe mo Yedĩdĩa, (mwanze wʼOmwami Mukulu) busana nʼOmwami Mukulu.

²⁶Nĩkwa Yoabũ mwalwa nʼeRaba omũyĩ wʼabana ba Amonĩ, neryo mwakĩnda omũyĩ wʼOmwami.

²⁷Kandi Yoabũ mwatumira Dawĩdĩ yʼabakwenda, ati, Nalwĩre nʼabʼeRaba; ega, nabĩrĩkĩnda omũyĩ wʼamagetsi.

²⁸Neryo lino ũhĩndanaye abandu abakasĩgalira, uteke endwiro yʼoko mũyĩ oyo, ũkĩndego, ngasyakĩnda omũyĩ oyo iniahulwa omo lĩna lyage.

²⁹Neryo Dawĩdĩ mwahĩndanĩa abandu bosĩ, mwaya eRaba, mwalwa nabo, mwakĩndabo.

³⁰Kandi mwĩmya embĩta yʼOmwami wabo oko mutwe wuwe; obũlĩto bwayo bwabya etalanta nguma yʼesyamagetsi, kandi muyo mwabya erĩbwe ryʼobũgũlĩ bunene; kandi moyahĩrwa oko mutwe wa Dawĩdĩ. Neryo mwahũlũkya eminyego mingi oko mũyĩ oyo.

³¹Kandi mwalũsyako abandu ababyako, mwahĩrabo omo mũbĩrĩ wʼemĩsũmeno, nʼoko mũbĩrĩ wʼerihalula, nʼoko syombasa, nʼeribumba matafalĩ: kandi mwakola atya nʼemĩyĩ yosĩ yʼabana ba Amonĩ. Neryo Dawĩdĩ nʼabandu bosĩ mobasuba eYerũsalema.