Read nande 2 Samwelĩ 13 Bible Online

2 Samwelĩ 13 - nande bible

2 Samwelĩ 13

¹Kandi enyũma wʼaho, Abũsaloma mugala wa Dawĩdĩ abya awite mwali wabo mubuya, erĩna liwe iyo Tamarĩ; kandi Amnonĩ mugala wa Dawĩdĩ mwamwanza.

²Neryo Amnonĩ mwamũkwĩra bũlĩge kyaleka inialwala busana na mwali wabo ye Tamarĩ; naye abya isialiaminya mulume; kandi mokyakala Uku Amnonĩ erimukola kindu.

³Nĩkwa Amnonĩ abya nʼomwĩra, erĩna Uwe iyo Yonadabũ, mugala wa Sĩmea mugala wabo Dawĩdĩ. Kandi Yonadabũ abya mundu mũtebya.

⁴Neryo mwamubwira ati, Busana nakĩ uwe mugala wʼOmwami ũkakwa bũlĩge utya ekiro nʼekiro kwehĩ? Sulimbwirabyo kwehĩ? Na Amnonĩ mwamubwira ati, Nyanzĩre Tamarĩ mwali wabo mugala wetu ye Abũsaloma.

⁵Neryo Yonadabũ mwamubwira ati, Ugotsere oko ngyingo yawe, uyiyire mo mũkonĩ; nʼomugulu tata wawe akandĩhĩka erikubana, umubwire uti, Ngakusaba nyiti, Uleke mwali wetu Tamarĩ ase, ambe akalyo nyiryeko, ahũke akalyo ako embere syʼameso wage, nyilole kuko, nyiryeko omo byala biwe.

⁶Neryo Amnonĩ mwagotsera, mwayiyira mo mũkonĩ; kandi omugulu omwami ahĩka erĩmũlebya, Amnonĩ mwabwira omwami ati, Ngakusaba, Uleke mwali wetu Tamarĩ ase, anyitsumbire amandu abiri embere syʼameso wage, nyirirego omo byala biwe.

⁷Neryo Dawĩdĩ mwatumira uku Tamarĩ kwʼeka, ati, Uye omo nyũmba ya mugala wenyũ Amnonĩ, umutsumbire akalyo.

⁸Neryo Tamarĩ mwaya omo nyũmba ya mugala wabo ye Amnonĩ; naye abya inianagotsere. Neryo mwĩmya eyĩsyano, mwahĩmatayo, mwatsumbira obundu embere siwe, neryo mokya obundu obo.

⁹Neryo mwĩmya oluyo, mwahũkũlĩrabo embere siwe; nĩkwa mwagana erirya. Kandi Amnonĩ mwabũga ati, Abandu bosĩ balũe embere syage. Neryo abosĩ mobalũa aho ali.

¹⁰Neryo Amnonĩ mwabwira Tamarĩ ati, Ulete akalyo ako omo kisenge nyirireko omo byala byawe. Neryo Tamarĩ mwĩmya obundu obo atsumba, mwaleterabo Amnonĩ mugala wabo omo kisenge.

¹¹Nʼomugulu aletabo hakũhĩ naye alyebo, Amnonĩ mwamuhamba, mwamubwira ati, Wase, ugotsere nage, mwali wetu.

¹²Naye mwamũsũbĩrya ati, Iyihi, mugala wetu, sunyihemule, kusangwa sikyekolawa kitya omo Baĩsraelĩ; sukole obũkĩrũ obo.

¹³Nage; nasyatwala esĩsonĩ syage syo hahi kwehĩ? Kandi nawe iwabya ngʼomuguma gʼoko bakĩrũ omo Baĩsraelĩ. Na lino ngakusaba nyiti, ũbũge nʼomwami, kusangwa siendisyanyikaga we.

¹⁴Nĩkwa mwatanza erĩowa omulenge wuwe; nĩkwa kusangwa amũlengĩrye maka, mwamuhamba, mwagotsera naye.

¹⁵Neryo Amnonĩ mwamũkwa obusu bunene obũlabĩrye; kusangwa obusu obo amũkwa bwabya bunene kwilaba olwanzo olo amwanza nalo. Kandi Amnonĩ mwamubwira ati, Hangana, ugende.

¹⁶Naye mwabũga naye, ati, Ko bite bitya, kusangwa ekibi kyʼerimbiga kĩlabĩrye oko kindi ekyo uliangolera. Nĩkwa Amnonĩ mwagana erĩmowa.

¹⁷Neryo mwabirikira omũlwana wuwe oyukamukolera, ati, Ũndũsaye kwʼomũkalĩ oyũ, kandi umuhomere eyĩhya.

¹⁸Naye abya iniambite olukimba lwʼebitangabitanga; kusangwa abali bʼabami ko bagenda bakambala batya ababya bate baminya mulume. Neryo omugombe wuwe oyo mwamuleta eyĩhya, kandi mwamuhomera eyĩhya.

¹⁹Neryo Tamarĩ mwahĩra erĩbũ oko mutwe wuwe, mwasatangya olukimba lwʼebitanga-bitanga olo abya ambite; kandi mwahĩra ebyala oko mutwe wuwe, mwayigendera akalira.

²⁰Neryo Abũsaloma mugala wabo mwamũbũlya ati, Amnonĩ, mugala wenyũ, abĩrĩkwĩmya kwehĩ? Nĩkwa lino ubye bũkũtũ mwali wetu; iye ni mugala wenyũ; Sũhĩre omwatsi oyũ gʼomo mutima. Na Tamarĩ mwĩkala omo nyũmba ya mugala wabo ngʼomũtsandĩrya.

²¹Nĩkwa omugulu Dawĩdĩ omwami owa emyatsi eyĩ, mwahitana kutsibu.

²²Neryo Abũsaloma mwatakanĩa na Amnonĩ bibuya kutse bibi; kusangwa Abũsaloma mwakwa Amnonĩ yʼobusu, kusangwa mwatsandya Tamarĩ mwali wabo.

²³Neryo enyũma wʼemyaka ĩbĩrĩ yosĩ, Abũsaloma abya awite abatwĩ bʼobweya bwʼesyombũlĩ eBaalĩ-hazorĩ, hakũhĩ nʼeEfũraĩmũ. Na Abũsaloma mwabirikira bagala bosĩ bʼomwami.

²⁴Kandi Abũsaloma mwahĩka eyiri omwami, ati, Omugombe wawe awite abatwĩ bʼobweya bwʼesyombũlĩ; ngakusaba, nyiti, Ũlĩge omwami nʼabagombe buwe bagende haguma nʼomugombe wawe.

²⁵Nĩkwa omwami mwabwira Abũsaloma ati, Iyihi, mugala wage, situgende ĩtwe bosĩ, tũkasyakũlũhya. Kandi mwamuhatikana nĩkwa omwami mwatalĩga erigenda, nĩkwa mwamutsumula.

²⁶Neryo Abũsaloma mwabũga ati, bite bitya, ngakusaba, ũlĩgĩre mugala wetu Amnonĩ agende haguma netu. Neryo omwami mwamubwira ati, Akagenda nawe busana nakĩ kwehĩ?

²⁷Nĩkwa Abũsaloma hatikana, neryo mwalĩgĩra Amnonĩ nʼabagala bosĩ bʼomwami erigenda haguma naye.

²⁸Kandi Abũsaloma mwahana bagombe buwe ati, Mũlebaye ndeke omugulu omutima wa Amnonĩ atsemĩre omo bĩnyũ; nʼoko mugulu nasyabũga nenyũ nyiti, mũswĩraye Amnonĩ, neryo mũmwĩte; simubahe; ĩsĩ ngye ndaliabahana kwehĩ? mũsĩke, mubye mbangĩ.

²⁹Nʼabagombe ba Abũsaloma mobayira Amnonĩ ngoko Abũsaloma ahanabo. Neryo abagala bosĩ bʼomwami mobahangana, nʼobuli mundu mwayĩhĩra oko nyumbu yiwe, mobatibita.

³⁰Neryo omugulu babya omo nzira, engulu moyahĩka uku Dawĩdĩ ambu, Abũsaloma abĩrĩta abagala bʼomwami bosĩ, sihetayira nʼomuguma wasĩgere kubo.

³¹Neryo omwami mwahangana, mwasatangya esyongimba siwe, mwagotsera ahisi; nʼabagombe buwe bosĩ mobamuhanganako luhande ĩbamabĩsatangya esyongimba syabo.

³²Na Yonadabũ, mugala wa Sĩmea, mugala wabo Dawĩdĩ, mwasũbĩrya ati, Sũganĩraye uti babĩrĩta balwana bosĩ abagala bʼomwami, kusangwa Amnonĩ aholĩre ĩyowene; kusangwa busana nʼerihana lya Abũsaloma omwatsi oyũ asohawa erĩtsũka ekiro atsandaya mwali wabo ye Tamarĩ.

³³Na lino omukama wage omwami sĩahĩre omwatsi oyũ omo mutima wuwe, akaganĩrya ati abagala bosĩ bʼomwami baholĩre; kusangwa Amnonĩ ĩyowene yo waholĩre.

³⁴Nĩkwa Abũsaloma abya iniabiritibita. Nʼomũlwana oyo wategaya mwasumba ameso wuwe, neryo lebaya, abandu bangi mobasira enyũma wuwe omo nzira yʼekitambi kyʼekitwa.

³⁵Neryo Yonadabũ mwabwira omwami ati, Lebaya abagala bʼomwami bamasa, ngoko mugombe wawe alĩabũga, ko byanamabya bitya.

³⁶Neryo abere abuga erĩbũga, lebaya, abagala bʼomwami mobahĩka, mobasumba emirenge yabo mobalira; nʼomwami nibya nʼabagombe buwe bosĩ mobalira ekiriro kinene.

³⁷Nĩkwa Abũsaloma mwatibita, mwaya eyiri Talmaĩ mugala wa Amĩhũrĩ, omwami wʼeGesũrĩ. Na Dawĩdĩ mwalira mugala wuwe obuli kiro.

³⁸Na Abũsaloma mwatibita atya, mwaya eGesũrĩ, kandi mwabyayo myaka ĩsatu.

³⁹Nʼomutima wʼOmwami Dawĩdĩ mwakwa Abũsaloma yʼolukando; kusangwa ĩnĩabĩrĩkĩranĩbwa busana na Amnonĩ, kusangwa abya iniabirihola.