Read nande 2 Samwelĩ 17 Bible Online

2 Samwelĩ 17 - nande bible

2 Samwelĩ 17

¹Kandi, Ahĩtofelĩ mwaswabwira Abũsaloma ati, Uleke nyiyisoge abalume elfu ĩkũmĩ nʼĩbĩrĩ (12,000), neryo ngandihangana nʼeriyakwamirira Dawĩdĩ omo kiro kino.

²Neryo ngandĩmũhĩkako iniabiriluha nʼerioloba, ĩnamwĩta obuba, nʼabandu bosĩ abali haguma naye basyatibita. Neryo nage nasyĩta omwami ĩyowene,

³kandi nasyakũsũbũlĩrya abandu bosĩ. Erisubula lyʼabandu bosĩ ni mwatsi wʼomundu oyo mukasonda-sonda; neryo abandu bosĩ basyabya buholo.

⁴Erihana erĩ molyatsemesya Abũsaloma yo ndeke, nʼabakulu bosĩ bʼAbaĩsraelĩ.

⁵Neryo Abũsaloma mwabũga ati, Na lino mubirikire Hũsaĩ Omũarũkĩ towe ekyo akabũga.

⁶Neryo omugulu Hũsaĩ ahĩka ahali Abũsaloma, Abũsaloma mwamubwira ati, Ahĩtofelĩ amabũga ebĩ nʼebĩ; tukole ngoko alĩabũga kwehĩ? Bite bitya, nawe ũbũge.

⁷Neryo Hũsaĩ mwabwira Abũsaloma ati, Erĩhano eryo Ahĩtofelĩ aliahana Sĩryowene lero.

⁸Kandi Hũsaĩ mwabũga ati, Ũnasĩ tata wawe nʼabandu buwe ko bali mbangĩ, kandi bakalĩre, ngʼedubu eyiriasagulawa ebyana byayo omolĩ. Kandi tata wawe ni mundu wʼamalwa, isiendireka abandu bakayato.

⁹Lebaya na lino abĩsamĩre omo buhya, kutse ehandi; kandi omugulu akabambirabo erĩmbere, oyo wasyowago asyabũga ati, Hali erĩkwa omo katĩkatĩ kʼabandu abakakwama Abũsaloma.

¹⁰Nʼoyuli mbangĩ, oyuwite omutima ngʼomutima wʼendale, asyasendekerera ndeke; kusangwa Abaĩsraelĩ bosĩ banasĩ tata wawe kwʼali mbangĩ, nʼabali haguma naye nabo ko nĩ mbangĩ.

¹¹Nĩkwa ĩngye ngahana nyiti Abaĩsraelĩ bosĩ bahĩndane ukʼuwe, erĩlũa eDanĩ nʼerĩhĩka eBerĩ-seba, obungi bwabo ngʼemisege eyiri oko ngetsĩ; kandi nawe ĩgowene ugende oko malwa.

¹²Neryo twasyamũhĩkako aho asyabanika, twasyamuwako ngʼekimi ko kikatogongera ahisi; neryo iye nʼabandu bosĩ abali haguma naye, sĩhendĩsyasĩgala nʼomuguma.

¹³Kandi, amatibita omo mũyĩ, Abaĩsraelĩ basyaleta ebikoba oko mũyĩ oyo, basyakurirago omo lũsĩ, erĩhĩka aho hatendisyabanikira nʼakabwe nʼakaguma.

¹⁴Na Abũsaloma nʼabandu bosĩ ba Ĩsraelĩ mobabũga bati, Erihana lya Hũsaĩ Omũarũkĩ lyowene kwilaba erihana lya Ahĩtofelĩ. Kusangwa Omwami Mukulu iniabirikandayirira erĩsĩnga erihana lyowene lya Ahĩtofelĩ, ati Omwami Mukulu atoke eriretera Abũsaloma yʼobuba.

¹⁵Neryo Hũsaĩ mwabwira abahererĩ ye Zadokĩ na Abĩatarĩ ati, Ahĩtofelĩ mwahana Abũsaloma nʼabakulu ba Ĩsraelĩ atya nʼatya; nage nabirimuhana nyitya na nyitya.

¹⁶Na lino mutume lũba mubwire Dawĩdĩ, muti, Sugotsere omo kiro ekĩ omo bisokero byʼembwarara, nĩkwa usoke eYorodanĩ lino omwami akasyakwa, nʼabandu bosĩ abali haguma naye.

¹⁷Nĩkwa Yonatana na Ahĩmazĩ babya bĩkere hakũhĩ Enĩ-rogelĩ; nʼomutsana abya akayabwirabo, nabo ibayabwira omwami Dawĩdĩ, kusangwa bakasyalolwako bakingira omo mũyĩ.

¹⁸Nĩkwa omũlwana muguma mwalola kubo, neryo mwabwira Abũsaloma. Neryo mobagenda lũba-lũba ababiri, mobahĩka oko nyũmba yʼomundu eBahũrĩmũ, oyo wabya awite erĩrĩba omo kibuga kiwe. Neryo mobaya mulyo.

¹⁹Nʼomũkalĩ mwĩmya ekĩkũnĩngo mwahĩrakyo oko buno bwʼerĩrĩba, nʼendata wakyo mwasanza kwʼengano, nʼomwatsi oyo mataminyikala.

²⁰Neryo abagombe ba Abũsaloma mobahĩka oko mũkalĩ oko nyũmba, bati, Ahĩmasĩ na Yonatana bali hahi kwehĩ? Nʼomũkalĩ mwabwirabo ati, Babirisoka akũsĩ. Neryo mobasondasondabo mobabylabo, mobasuba eYerũsalema.

²¹Neryo babere babigenda, mobalũa omwʼĩrĩba, mobayabwira Omwami Dawĩdĩ; ibakabwira Dawĩdĩ bati, Muhangane, musoke olũsĩ lo lũba, kusangwa Ahĩtofelĩ abiriya embĩta erĩkwĩta.

²²Neryo Dawĩdĩ mwahangana, nʼabandu bosĩ ababya haguma naye, mobasoka eYorodanĩ; omusakala akakyika mohatasaka nʼomuguma oyute wasoka eYorodanĩ.

²³Neryo omugulu Ahĩtofelĩ alangira ko batetakwama erihana liwe, mwasesa epunda yiwe, mwahangana mwaya omuwe oko mũyĩ wuwe, mwalagana nʼekĩtũnga kiwe, neryo mwayihanika; kwʼahola atya, neryo mwatabwa omwʼisinda yʼĩse.

²⁴Neryo Dawĩdĩ mwahĩka eMahanaĩmũ. Na Abũsaloma mwasoka eYorodanĩ, iye nʼabandu bosĩ ba Ĩsraelĩ haguma naye.

²⁵Kandi Abũsaloma mwayira Amasa mo mukulu wʼomulondo wʼabasĩrĩkanĩ omo mwanya wa Yoabũ. Nĩkwa Amasa abya mugala wʼomundu wahulawa mo Ĩtĩra Omũĩsraelĩ, oyo wingira omwa Abĩgaĩlĩ mwali wa Nahasĩ, ye mwali wabo Zerũya, nyĩnya wa Yoabũ.

²⁶Kandi Abaĩsraelĩ na Abũsaloma mobahanda ekilaliriro kyabo omo kihugo kyʼeGĩleadĩ.

²⁷Neryo omugulu Dawĩdĩ ahĩka eMahanaĩmũ, ye Sobĩ mugala wa Nahasĩ wʼeRaba wʼoko bana ba Amonĩ, na Makĩrĩ mugala wa Amĩelĩ wʼeLodebarĩ, na Barzĩlaĩ Omũgĩleadĩ wʼeRogelĩmũ,

²⁸mobaleta esyongyingo, nʼebisya, nʼesyonyungu syʼeribumba, nʼengano, nʼekisusu, nʼeyĩsyano, nʼebĩkalangĩre, nʼobũhotĩ, nʼobũtsalĩ, nʼebĩtsali bĩkalangĩre,

²⁹nʼobuki, nʼamagũta wʼomo masabũ, nʼesyombũlĩ, nʼamasabũ Wʼende awakamatĩre, busana na Dawĩdĩ, na busana nʼabandu ababya haguma naye, balye; kusangwa bati, Abandu bawĩrĩre, kandi balũhĩre, bakwĩrĩre nʼenyota yʼomo mbwarara.