Read nande 2 Samwelĩ 18 Bible Online

2 Samwelĩ 18 - nande bible

2 Samwelĩ 18

¹Neryo Dawĩdĩ mwaganza abandu ababya haguma naye, kandi mwahĩra kubo kwʼabakulu bʼamaelfu, nʼabakulu bʼamagana.

²Neryo Dawĩdĩ mwahongokya abandu mo bihanda bisatu, ekihanda kiguma omo byala bya Yoabũ, nʼekindi kihanda omo byala bya Abĩsayĩ, omugala wa Zerũya, mugala wabo Yoabũ, nʼekyʼakasatu omo byala bya Ĩtaĩ, Omũgĩtĩ. Kandi omwami mwabwira abandu ati, Kwenene nage ngandigenda haguma nenyũ nibya.

³Nĩkwa abandu mobabũga bati, Susyegenda; kusangwa twamasyatibita, sibendisyatutsomana; nomo twangahola ko kihande, sibendisyatutsomana; nĩkwa uwe ulingene nʼamaelfu ĩkũmĩ kwĩtwe; nĩkwa lino lyowene ĩwasĩka erĩtũwatĩkya mune eka.

⁴Neryo omwami mwabwirabo ati, Ekyo mũkandĩsĩma kyo ngandikola. Neryo omwami mwahangana oko mũsĩke wʼolũkyo, nʼabandu bosĩ mobahuluka omo magana nʼamaelfu.

⁵Neryo omwami mwahana Yoabũ na Abĩsayĩ, na Ĩtaĩ, ati, Mulwe bolo-bolo na Abũsaloma busana nage. Neryo abandu bosĩ mobowa omugulu omwami ahana abasondolĩ bosĩ busana na Abũsaloma.

⁶Neryo abandu mobaya omolĩ bakayalwa nʼAbaĩsraelĩ; nʼamalwa ayo mwabya omo mũsĩtũ wʼeEfũraĩmũ.

⁷Nʼabandu ba Ĩsraelĩ mobakĩndĩrwaho embere syʼabagombe ba Dawĩdĩ mohabya erĩkwa lĩnene aho ekiro ekyo, abandu elfu makũmĩ abiri mobahola (20,000).

⁸Kusangwa amalwa iniabiribugana ekihugo kyosĩ. Nʼomo mũsĩtũ abandu bangi mobahola kwilaba abo mũyalĩ ĩta ekiro ekyo.

⁹Na Abũsaloma mwabũlĩkĩra akahĩndana nʼabagombe ba Dawĩdĩ. Na Abũsaloma abya oko nyumbu yiwe, nʼenyumbu moyalaba omwisi wʼemitahi minene-minene yʼomuti munene wʼeterebĩntĩ, nʼomutwe wa Abũsaloma mwagoba omo muti oyo wʼeterebĩntĩ, mwaleremba, nʼenyumbu eyabya yĩmũhekĩre moyatwangana.

¹⁰Kandi omundu muguma mwamulangira, mwabwira Yoabũ, ati, Lebaya, Namalangira Abũsaloma ĩnĩahanĩkĩrwe omo terebĩntĩ.

¹¹Na Yoabũ mwabũga nʼomundu oyo wamubwira, ati, mowamulangira, kandi busana nakĩ mũtetamũswĩrya akatogera ahisi kwehĩ? Kumbe nabirikuha ebĩtsĩpa ĩkũmĩ nʼomukoba wʼomo mbindi.

¹²Nʼomundu oyo mwabwira Yoabũ, ati, Nomo nangabana ebĩtsĩpa elfu nguma (1,000) omo byala byage, sĩnangalĩga erisumba ebyala byage okwʼĩta omugala wʼOmwami; kusangwa omʼowa lyetu, omwami mwakuhana na Abĩsayĩ na Ĩtaĩ, ati, Mũlebaye Sihabye mundu ũkatũla oko mũlwana ye Abũsaloma.

¹³Bite bitya kumbe nabĩrĩmwĩta omo menge [kandi sihali mwatsi abĩsamĩre oko mwami] neryo nawe siwanganyilwira nibya.

¹⁴Neryo Yoabũ mwabũga ati, Sinangasiba ngabũga nawe. Neryo mwĩmya ehĩtũmo hisatu hyʼobuta mwalabyahyo omwʼĩsolo-tima ya Abũsaloma, iniakineho omo katĩkatĩ kʼomuti wʼeterebĩntĩ.

¹⁵Nʼabalwana ĩkũmĩ abaheka ebindu byʼamalwa bya Yoabũ mobamũtĩmbako mobaswĩrya Abũsaloma mobamwĩta.

¹⁶Neryo Yoabũ mwabuha engubi, nʼabandu mobasubula okwʼikwama Abaĩsraelĩ; kusangwa Yoabũ mwakakĩrya bandu.

¹⁷Neryo mobĩmya Abũsaloma, mobamugusa omo buhya bunene omo mũsĩtũ, mobamulunda kwʼekilundo kinene kyʼamabwe; nʼAbaĩsraelĩ bosĩ mobatibita obuli mundu omo hema yiwe.

¹⁸Nĩkwa Abũsaloma omugulu abya akiriho abya ĩnĩabĩrĩyĩhanganĩrya endũyĩ eyiri omo musya wʼOmwami; kusangwa abũga ati, Singwite mugala oyo wangaleka erĩna lyage iryibukwa; neryo mwaluka endũyĩ yʼomo lĩna liwe; nʼerĩhĩka mũnabwĩre ikahulawa mo mahero wa Abũsaloma.

¹⁹Neryo Ahĩmazĩ mugala wa Zadokĩ mwabũga ati, Uleke nyitibite, ngayabwira omwami yʼemyatsi, ngoko Mwami Mukulu abĩrĩmũkĩsĩrya esyonzĩgũ siwe.

²⁰Neryo Yoabũ mwamubwira ati, Siwendibya mũhekĩ wʼengulu mũnabwĩre, nĩkwa wasyahekayo kindi kiro; mũnabwĩre siwendiheka engulu eyĩ, kusangwa mugala wʼOmwami abirihola.

²¹Neryo Yoabũ mwabwira Omũkũsĩ, ati, Genda, uyabwire omwami yʼebyo wabirilangira. Omũkũsĩ mũnamira Yoabũ, neryo mwatibita.

²²Neryo Ahĩmazĩ mugala wa Zadokĩ mwabwira Yoabũ ati, Sihali mwatsi, nĩkwa kĩsĩ-kĩsĩ, Uleke nyikwamirire Omũkũsĩ. Neryo Yoabũ mwabũga ati, Busana nakĩ, mugala wage, ukasonda eritibita kwehĩ? Kusangwa siwendihemberwa engulu eyo.

²³Naye mwabũga ati, Sihali mwatsi, nyanzĩre eritibita. Neryo mwamubwira ati, Ego, tibita. Neryo Ahĩmazĩ mwatibita omo nzira yʼebwerere, kandi mwatanga Omũkũsĩ.

²⁴Nĩkwa Dawĩdĩ abya ĩkere omo katĩkatĩ kʼesyongyo ĩbĩrĩ; kandi omũteya mwahetukira oko lutwe lwʼolũkyo endata oko lũhĩmbo, neryo mwasumba meso wuwe, mwalangira, omundu akatibita ĩyowene.

²⁵Neryo omũteya mwabirikira, mwabwira omwami. Nʼomwami mwabũga ati, Amabya ali ĩyowene, omo buno buwe muli engulu yowene. Neryo omundu oyo mwasa lũba, mwasegera hakũhĩ.

²⁶Kandi omũteya mwalangira ogundi mundu akatibita; neryo omũteya mwabirikira omũteya wʼesyongyo, ati, Nʼogundi mundu yoyo anemwasa akatibita ĩyowene. Nʼomwami mwabũga ati, Naye akaleta engulu yowene.

²⁷Nʼomũteya mwabũga ati, Ngaganĩraya emitibitire yʼowʼembere iri ngʼemitibitire ya Ahĩmazĩ mugala wa Zadokĩ. Neryo omwami mwabũga ati, Iye ni mundu gowene, akaleta engulu yowene.

²⁸Na Ahĩmazĩ mwabirikira, mwabwira omwami ati, Ni buholo. Neryo mũnama erĩkolya obũsũ buwe oko kitaka, mwabũga ati, Omwami Mukulu, Nyamuhanga wawe apipawe, oyo wabĩrĩhĩra bandu abasonda erĩĩta omukama wage omwami omo byala byawe.

²⁹Neryo omwami mwabũga ati, Nina mirembe oko mũlwana Abũsaloma kwehĩ? Neryo Ahĩmazĩ mwasũbĩrya ati, Omugulu Yoabũ atuma omugombe wʼOmwami nage mugombe wawe, monowa olukanda lunene, nĩkwa mondaminya nga ni kyahi.

³⁰Neryo omwami mwabũga ati, Labira aha, uhangane hano, Neryo mwalabiraho, mwahanganaho bũkũtũ.

³¹Neryo Omũkũsĩ mwahĩka; mwabũga ati, Ngwite engulu yowene busana nʼomukama wage omwami; kusangwa Omwami Mukulu abirikuha erĩkĩnda mũnabwĩre abosĩ abahangana erilwa nawe.

³²Nʼomwami mwabwira Omũkũsĩ ati, Nina mirembe oko mũlwana Abũsaloma kwehĩ? NʼOmũkũsĩ mwasũbĩrya ati, Esyonzĩgũ syʼOmukama wage omwami, nʼabosĩ abahangana erilwa nawe erikukolera nabi, babye ngʼomũlwana oyo!

³³Nʼomwami mwĩkĩkana kutsibu, mwahetukira omo nyũmba yʼendata oko lũkyo, neryo mwalira. Nʼomugulu abya akagenda, mwabũga ati, Uwe mugala wage Abũsaloma, mugala wage! mugala wage Abũsaloma! Kumbe ĩngye ndiahola butsira we, Uwe Abũsaloma, mugala wage, mugala wage!