Read nande 2 Samwelĩ 2 Bible Online

2 Samwelĩ 2 - nande bible

2 Samwelĩ 2

¹Nʼenyũma wʼaho, Dawĩdĩ mwabũlya Omwami Mukulu ati, Nyihetukire oko mũyĩ muguma wʼemĩyĩ ya Yũda kwehĩ? NʼOmwami Mukulu mwamubwira ati, Uhetuke. Na Dawĩdĩ mwabũga ati, Nyihetukire kuhi kwehĩ? Naye mwabũga ati, eHebũronĩ.

²Neryo Dawĩdĩ mwahetukirayo atya, nʼabakalĩ buwe babiri, Ahĩnoamũ Omũyezreelĩ, na Abĩgaĩlĩ omũkalĩ wa Nabalĩ Omũkaramelĩ.

³Kandi Dawĩdĩ mwaleta abandu buwe ababya haguma naye, obuli mundu nʼekĩtũnga kiwe; neryo mobĩkala omo mĩyĩ yʼeHebũronĩ.

⁴Neryo abandu ba Yũda mobasa, mobahakabya Dawĩdĩ yʼamagũta eribya mwami oko kĩtũnga kya Yũda. Neryo mobabwira Dawĩdĩ, bati, Abandu bʼeYabesĩ-Gĩleadĩ mobata Saũlo.

⁵Neryo Dawĩdĩ mwatuma bakwenda oko bandu bʼeYabesĩ-Gĩleadĩ, mwabwirabo ati, Mutsumulawe nʼOmwami Mukulu kusangwa mwabirikolera omukama wenyũ ye Saũlo ekibuya erimuta.

⁶Na lino Omwami Mukulu abakolere ekibuya nʼekwenene; nage nibya ngandĩsyabakangya ekibuya ekĩ, kusangwa mwabirikola omwatsi oyũ.

⁷Neryo lino ebyala byenyũ bikale, mubye mbangĩ; kusangwa Saũlo omukama wenyũ abirihola, nʼekĩtũnga kya Yũda kyabĩrĩnyĩhakabya amagũta eribya mwami wabo.

⁸Nĩkwa Abenerĩ mugala wa Nerĩ, omukulu wʼomulondo wʼamalwa wa Saũlo, ĩnĩabĩrĩmya Ĩsĩbosetĩ mugala wa Saũlo, nʼerĩmũsokerya eMahanaĩmũ.

⁹Neryo mwamuyira mo mwami oko Gĩleadĩ, nʼowʼAbaasũrĩ, nʼowʼAbayezreelĩ, nʼowʼAbaefũraĩmũ, nʼowʼAbabenyamĩna, nʼowʼAbaĩsraelĩ bosĩ.

¹⁰Ĩsĩbosetĩ mugala wa Saũlo, abya wʼemyaka makũmĩ ani omugulu atsũka eritabalira Ĩsraelĩ, kandi mwatabala myaka ĩbĩrĩ. Nĩkwa ekĩtũnga kya Yũda mokyakwamana na Dawĩdĩ.

¹¹Nʼomugulu Dawĩdĩ abya mwami eHebũronĩ oko kĩtũnga kya Yũda yabya myaka irinda nʼemikera ndatu.

¹²Kandi Abenerĩ mugala wa Nerĩ, nʼabagombe ba Ĩsĩbosetĩ mugala wa Saũlo mobalũa eMahanaĩmũ eriya eGĩbeonĩ.

¹³Neryo Yoabũ mugala wa Zerũya, nʼabagombe ba Dawĩdĩ, mobahongoka, mobayahĩndana nabo hakũhĩ nʼekitsinga kyʼeGĩbeonĩ; mobĩkala ahisi, abandi oko mwisirya ono wʼekitsinga nʼabandi oko mwisirya olya wʼekitsinga.

¹⁴Kandi Abenerĩ mwabwira Yoabũ, ati, Lino nyiti, Uleke abalwana bahangane batsangire embere syetu. Na Yoabũ ati, Bahangane.

¹⁵Neryo mobahangana, mobasokerayo ĩbanaganzĩrwe, erĩkũmĩ nʼababiri Ababenyamĩna, busana na Ĩsĩbosetĩ mugala wa Saũlo, nʼerĩkũmĩ nʼababiri abʼoko bagombe ba Dawĩdĩ.

¹⁶Mobahambana obuli mundu mwahamba mũlĩkyabo oko mutwe, nʼerĩlũba omũyalĩ wuwe gʼomo lukanga lwa mũlĩkyabo; mobawa kuguma. Kyaleka aho ihalukwa mo Helkatĩ-hazũrĩmũ (Eririma lyʼoboya bʼomũyalĩ), aho nĩ Gĩbeonĩ.

¹⁷Nʼamalwa ayo mwakala kutsibu ekiro ekyo; na Abenerĩ mwakĩndwa, nʼabandu ba Ĩsraelĩ, embere syʼabagombe ba Dawĩdĩ.

¹⁸Nʼabagala basatu ba Zerũya babyayo, Yoabũ, na Abĩsayĩ, na Asahelĩ. Kandi Asahelĩ abya angũhĩre omo bisando ngʼengabi.

¹⁹Neryo Asahelĩ mwakwamirira Abenerĩ butakebera oko luhande lwʼamali kutse oko luhande lwʼamalembe omwʼikwamirira Abenerĩ.

²⁰Neryo Abenerĩ mwalebya enyũma siwe, mwabũga ati, Nina we Asahelĩ kwehĩ? Naye mwasũbĩrya, ati, Nĩna ngye.

²¹Na Abenerĩ mwamubwira ati, Kebera oko luhande lwʼamali, kutse oko malembe, uhambe muguma oko balwana wĩmaye ebindu biwe byʼamalwa. Nĩkwa Asahelĩ mwatalĩga erisubula nʼerireka erimukwamirira.

²²Kandi Abenerĩ mwabwira Asahelĩ, Unyisubuleko, ko nangakwĩta busa busana nakĩ kwehĩ? Nangaswasumba obũsũ bwage bo nyiti embere sya Yoabũ mugala wenyũ kwehĩ?

²³Nĩkwa Asahelĩ mwagana erisubula; kyaleka Abenerĩ iniamutsimita omo kabunda omo muhunda wʼerĩtũmo liwe, nʼerĩtũmo molyahulukira enyũma; neryo mwawa aho, mwaholeraho. Neryo mokyabya, abosĩ abahĩka aho Asahelĩ awa nʼeriholera, mobimana.

²⁴Nĩkwa Yoabũ na Abĩsayĩ mobakwamirira Abenerĩ; nʼeryuba molyalenga omugulu bahĩka oko kitwa kyʼeAma ekĩhererenĩe nʼeGĩa omo nzira yʼembwarara yʼeGĩbeonĩ.

²⁵Nʼabana ba Benyamĩna mobayĩhĩndanĩa ahali Abenerĩ, mobabya mulondo muguma, mobahangana omo singi yʼekitwa.

²⁶Neryo Abenerĩ mwabirikira Yoabũ, ati, Ko mũyalĩ wansyabya akalya bandu ebiro byosĩ kwehĩ? Ko Sĩwasĩ kwʼakandisyakaliha oko ndũlĩ yago kwehĩ? Ko wasyabirikira bandu uku mugulu guraha ati erisubula nʼerireka erikwamirira bagala babo kwehĩ?

²⁷Neryo Yoabũ mwabũga ati, Ngoko Nyamuhanga aliho, Ngʼũtalĩabũga nga babiriyigendera mwangyakya, obuli mundu iniatasyakwamirira mugala wabo.

²⁸Neryo Yoabũ mwabuha engubi; nʼabandu bosĩ mobahangana, mobataswakwama kandi Ĩsraelĩ, kandi mobataswalwa.

²⁹Na Abenerĩ nʼabandu buwe mobagenda omo kiro kyosĩ ekyo nʼerilaba eAraba; kandi mobasoka eYorodanĩ, nʼerilaba omo Bĩtorĩ yosĩ, mobahĩka eMahanaĩmũ.

³⁰Na Yoabũ mwasubula mwaleka erikwama Abenerĩ; neryo abere abĩhĩndanĩa abandu bosĩ, mobabula oko bagombe ba Dawĩdĩ ko bandu ĩkũmĩ na mwenda na Asahelĩ.

³¹Nĩkwa abagombe ba Dawĩdĩ mobĩta bandu bangi ba Benyamĩna nʼaba Abenerĩ, neryo mohahola bandu magana asatu nʼamakũmĩ ndatu (360).

³²Kandi mobatelula Asahelĩ, mobamuta omwʼisinda yʼĩse, eyabya eBetelehemũ. Na Yoabũ nʼabandu buwe mobagenda omo kiro kyosĩ, neryo mobwakerabo eHebũronĩ.