Read nande 2 Samwelĩ 4 Bible Online

2 Samwelĩ 4 - nande bible

2 Samwelĩ 4

¹Kandi omugulu Ĩsĩbosetĩ mugala wa Saũlo, owa Abenerĩ kwʼabiriholera eHebũronĩ, omutima wuwe mwalũa omo nda, nʼAbaĩsraelĩ bosĩ mobahahũkya emitima.

²Nʼomugala wa Saũlo (ye Ĩsĩbosetĩ) abya nʼabandu babiri ababya bakulu bʼemilondo; omuguma ahulawa mo Baana, nʼerĩna lyʼogundi Rekabũ, bo bagala ba Rĩmonĩ Omunya Beerotĩ, oko bana ba Benyamĩna [kusangwa Beerotĩ akaganzirawa uku Benyamĩna;

³nʼAbanya Beerotĩ mobasagira eGĩtaĩmĩ, kandi bakĩnĩkereyo erĩhĩka mũnabwĩre].

⁴Nĩkwa Yonatana, mugala wa Saũlo, abya awite mugala oyũlehemĩre oko bisando biwe. Abya wʼemyaka ĩtanu omugulu engulu ya Saũlo na Yonatana yalũa eYezreelĩ; nʼomũlemberĩ wuwe mwamubatula, mwatibita. Neryo omugulu anguha eritibita, omwana mwatoga, mwalehema. Nʼerĩna liwe lyabya Mefĩbosetĩ.

⁵Neryo abagala ba Rĩmonĩ Omunya Beerotĩ, ye Rekabũ na Baana mobahĩka omo nyũmba ya Ĩsĩbosetĩ omwʼitungi, omugulu abya akaluhuka.

⁶Neryo mobahĩka omo nyũmba nga bakasonda erienda engano; neryo mobamutsimita omo kabunda; na Rekabũ na Baana mugala wabo mobatibita.

⁷Nĩkwa omugulu bingira omo nyũmba, Ĩsĩbosetĩ iniamabigotsera oko ngyingo yiwe omo kisenge kyʼerigotseramo, mobamũswĩrya, mobamwĩta, kandi mobamũtwa kwʼomutwe, mobahekago, mobalaba omo nzira yʼeAraba omo kiro kyosĩ ekyo.

⁸Mobaleta omutwe wa Ĩsĩbosetĩ ahali Dawĩdĩ eHebũronĩ mobabwira omwami bati, Langira, omutwe wa Ĩsĩbosetĩ, mugala wa Saũlo, enzĩgũ yawe, oyo wasonda-sondaya engebe yawe; litya Omwami Mukulu abiriha erĩkĩsya oko mukama wage omwami mũnabwĩre uku Saũlo nʼabana buwe.

⁹Neryo Dawĩdĩ mwasũbĩrya Rekabũ na Baana mugala wabo, bagala ba Rĩmonĩ Omunya Beerotĩ, mwabwirabo ati, ngoko Mwami Mukulu aliho, oyo walamaya engebe yage oko maligo gosĩ,

¹⁰omugulu omundu ambwira, ati, Saũlo abirihola, ĩnĩakaganĩraya ati amanyiretera engulu yowene, monamuhamba, monamwĩtĩra eZĩklagĩ, nʼekyo mokyabya oluhembo namuhembera engulu yiwe.

¹¹Neryo sĩkĩlabĩre aho, omugulu abandu babi babĩrĩtĩra omundu utunganene omo nyũmba yiwe nʼoko ngyingo yiwe, sĩndĩendĩtũhũlya omusasi wuwe omo byala byenyũ, nʼerĩbalũsya muna-kihugo kwehĩ?

¹²Neryo Dawĩdĩ mwategeka balwana buwe, neryo mobĩtabo, kandi mobatwa ebyala byabo nʼebisando byabo mobahanikabyo oko mũsĩke wʼekitsinga eHebũronĩ. Nĩkwa mobĩmya omutwe wa Ĩsĩbosetĩ, mobatago omwʼisinda ya Abenerĩ eHebũronĩ.