Read nande 1 Abami 14 Bible Online

1 Abami 14 - nande bible

1 Abami 14

¹Oko mugulu oyo Abĩya mugala wa Yeroboamũ mwalwala.

²Na Yeroboamũ mwabwira mũkalĩwe ati, Hangana, uyihindule isiwaminyikala ngʼomũkalĩ wa Yeroboamũ; Uyitwale eSĩlo; lebaya, eyo iri omũmĩnyererĩ ye Ahĩya, oyo wanyahula ati nasyabya mwami oko bandu aba.

³Kandi utwale haguma nawe amandu ĩkũmĩ, nʼotutole, nʼakalega kʼobuki, ugende eyo ali. Asyakubwira omwana ngʼasyabya ati.

⁴Nʼomũkalĩ wa Yeroboamũ mwakola atya, neryo mwahangana mwaya eSĩlo, mwahĩka oko nyũmba ya Ahĩya. Nĩkwa Ahĩya isialitoka erilangira; kusangwa ameso wuwe iniabirikala busana nʼobukulu buwe.

⁵Neryo Omwami Mukulu mwabwira Ahĩya, ati, Lebaya, omũkalĩ wa Yeroboamũ akasa erĩkũbũlya busana nʼomugala wuwe, kusangwa alwere. Nawe Wasyamubwira ebĩ nʼebĩ, kusangwa omugulu akingiramo asyayĩgendesanĩa ngʼogundi mũkalĩ.

⁶Neryo, omugulu Ahĩya owa esyongyĩndo siwe, akingira omo lũkyo, mwabũga ati, Wingire, uwe mũkalĩ wa Yeroboamũ; busana nakĩ ukayihindula eribya gundi kwehĩ? Kusangwa namatumwa kuwe nʼomwatsi alĩtohĩre.

⁷Ugende, Ubwire Yeroboamũ uti, Omwami Mukulu Nyamuhanga wa Ĩsraelĩ akabũga ati, Kusangwa nabĩrĩkũhamya erĩkũlũsya omo katĩkatĩ kʼabandu eribya mũsondolĩ wʼabandu bage Abaĩsraelĩ,

⁸Nabirisagula obwami oko kĩtũnga kya Dawĩdĩ, nʼerikuhabo; nĩkwa sulitabya ngʼomugombe wage Dawĩdĩ oyo wategaya ebihano byage, nʼoyo wanyikwama nʼomutima wuwe gosĩ, erikola ebitunganene bisa omo meso wage.

⁹Nĩkwa wabirikola ebibi kwilaba abosĩ ababya embere syawe, wabiriyayĩkokoterya esindi nyamuhanga nʼesyosanamu syʼerĩnũnĩa, erĩnyĩhĩtanĩa, kandi wabirinyigusa enyũma syawe.

¹⁰Busana nʼekyo, lebaya, nasyaleta obũlĩge oko kĩtũnga kya Yeroboamũ, kandi nasyĩta uku Yeroboamũ obuli mwana wʼobulume, bamabya babohĩrwe kutse batabohĩrwe oko Baĩsraelĩ, kandi nasyabĩrĩrya hali ekĩtũnga kya Yeroboamũ, ngoko mundu akabĩrĩraya amabĩ go hali, erĩhĩka aho gosĩ asyahwera.

¹¹Oyo wasyahola owʼuku Yeroboamũ omo mũyĩ esyombwa syasyamulya; nʼoyukaholera omolĩ esyonyonyũ syʼomo kyanya syasyamulya; kusangwa Omwami Mukulu abĩrĩbũgakyo.

¹²Neryo lino hangana, uye omo nyũmba yawe; nʼomugulu ebisando byawe bikingira omo mũyĩ omwana asyahola.

¹³NʼAbaĩsraelĩ bosĩ basyamulira, nʼerimuta, kusangwa iye iyowene omo nyũmba ya Yeroboamũ yo wanasyahĩrwa omwʼisinda, kusangwa amabanika kʼobubuya buke busana nʼOmwami Mukulu Nyamuhanga wa Ĩsraelĩ omo kĩtũnga kya Yeroboamũ.

¹⁴Kandi Omwami Mukulu asyayĩhanganĩrya omwami endata oko Ĩsraelĩ, oyo wasyaherya ekĩtũnga kya Yeroboamũ oko kiro ekyo, nʼerĩtsũka lino.

¹⁵Kusangwa Omwami Mukulu asyaswĩrya Abaĩsraelĩ, ngʼemĩfũnzo ĩkatengatenganĩbawa omo magetsi, kandi asyakula Abaĩsraelĩ omo kihugo ekĩ kyowene ekyo aha abotata-kulu wabo, kandi asyapanzapanzabo eyisirya oko Lũsĩ Efurata kusangwa babiriyikolera esyosanamu sya Asera nʼerĩhĩtanĩa Omwami Mukulu.

¹⁶Kandi asyahiga Abaĩsraelĩ busana nʼebibi bya Yeroboamũ ebyo abĩrĩhalya, nʼebyo abirireka Abaĩsraelĩ ĩbahalyamo.

¹⁷Neryo omũkalĩ wa Yeroboamũ mwahangana, mwalũaho, mwahĩka eTĩrza; neryo abere ahĩka oko lũkyo lwʼenyũmba, omwana mwahola.

¹⁸NʼAbaĩsraelĩ bosĩ mobamuta, kandi mobamulira, ngʼekĩnywa kyʼOmwami Mukulu ekyo abũga oko mugombe wuwe, omũmĩnyererĩ Ahĩya.

¹⁹Nʼeyindi mĩbĩrĩ ya Yeroboamũ, ngoko alwa, kandi ngoko atabala, lebaya, ĩsakĩre omo kitabu kyʼemyatsi yʼabami bʼAbaĩsraelĩ.

²⁰Nʼebiro ebyo Yeroboamũ atabala byabya emyaka makũmĩ abiri nʼeyĩbĩrĩ; neryo mweya abĩse-kulu buwe, na Nadabũ mugala wuwe mwatabala omo mwanya wuwe.

²¹Nĩkwa Rehoboamũ mugala wa Solomono mwatabala eYũda. Rehoboamũ abya wʼemyaka makũmĩ ani nʼomuguma omugulu atsũka eritabala, naye mwatabala emyaka erĩkũmĩ nʼeyirinda eYerũsalema, omũyĩ ogo Mwami Mukulu ayisoga omo bihanda byosĩ bya Ĩsraelĩ, erĩhĩraho erĩna liwe; nʼerĩna lya nyĩnya wuwe lyabya Naama, Omũamonĩ.

²²NʼAbayũda mobakola ekyabya kibi omo meso wʼOmwami Mukulu, kandi mobaleka Omwami Mukulu ĩnĩakwa obũha busana nʼebibi ebyo bakola, ebĩlabĩre ebyosĩ ebyo abotata-kulu wabo bakola.

²³Kusangwa mobayĩhĩmbĩra ahendata, nʼesyondũyĩ sĩbũyĩrĩre, na Aserĩmũ, endata oko buli kitwa kiri, nʼoko ndĩna yʼobuli muti mubisi;

²⁴kandi abamalaya bʼesyonyamuhanga babya omo kihugo nibya; mobakola esyonye syosĩ syʼebihanda ebyo Mwami Mukulu asingula embere syʼabana bʼAbaĩsraelĩ.

²⁵Neryo oko mwaka wʼakatanu wʼOmwami Rehoboamũ, Sĩsakĩ omwami wʼeMĩsĩrĩ mwahetukira eYerũsalema eriyalwa.

²⁶Neryo mwaheka ebindu byʼenyũmba yʼOmwami Mukulu, nʼebindu byʼenyũmba yʼomwami; mwahũnga ebyosĩ; mwaheka esyongabo syosĩ syʼesyamagetsi esyo Solomono ahesa.

²⁷Neryo omwami Rehoboamũ mwahesa esyongabo syʼemiringa omo mwanya wasyo, neryo mwahĩrasyo omo byala byʼabakulu bʼabateya, abategaya olũkyo lwʼenyũmba yʼOmwami.

²⁸Neryo emigulu yosĩ omwami aya omo nyũmba yʼOmwami Mukulu, abateya mobahekasyo, neryo mobasũbyasyo omo kyumba kyʼabateya.

²⁹Neryo eyindi mĩbĩrĩ ya Rehoboamũ, nʼebyosĩ akola, sĩbĩsakĩre omo kitabu kyʼemyatsi yʼabami bʼeYũda kwehĩ?

³⁰Kandi mohabya amalwa omo katĩkatĩ ka Rehoboamũ na Yeroboamũ ebiro byosĩ.

³¹Neryo Rehoboamũ mweya abĩsekulu buwe, mwatabwa haguma nʼabĩsekulu buwe omo mũyĩ wa Dawĩdĩ; nʼerĩna lya nyĩnya wuwe lyabya Naama Omũamonĩ. Na Abĩyamũ mugala wuwe mwatabala omo mwanya wuwe.