Read nande 1 Abami 16 Bible Online

1 Abami 16 - nande bible

1 Abami 16

¹Neryo ekĩnywa kyʼOmwami Mukulu mokyahĩka uku Yehũ mugala wa Hananĩ busana na Baasa, kiti,

²Kusangwa monakũhamya erĩlũa omo lũtũtũ, nʼerikuyira mo mũsondolĩ oko bandu bage Abaĩsraelĩ, nawe wabirigendera omo nzira ya Yeroboamũ, ĩwabĩrĩkolesya abandu bage Abaĩsraelĩ ebibi, erĩnyĩhĩtanĩa busana nʼebibi byabo;

³lebaya, nasyĩta Baasa nʼekĩtũnga kiwe; nasyayira ekĩtũnga kyawe ngʼekĩtũnga kya Yeroboamũ mugala wa Nebatĩ.

⁴Omundu wa Baasa oyukahola omo mũyĩ esyombwa syasyamulya; nʼomundu wuwe oyukayiholera omolĩ, esyonyonyũ syʼekyanya syasyamulya.

⁵Nʼeyindi mĩbĩrĩ ya Baasa, nʼebyo akola, nʼamaka wuwe, sĩbĩsakĩre omo kitabu kyʼemyatsi yʼabami bʼAbaĩsraelĩ kwehĩ?

⁶Neryo Baasa mweya abĩse-kulu buwe, mwatabwa eTĩrza; na Ela mugala wuwe mwabya mwami omo mwanya wuwe.

⁷Kandi ekĩnywa kyʼOmwami Mukulu mokyasa oko mũmĩnyererĩ Yehũ mugala wa Hananĩ busana na Baasa, na busana nʼekĩtũnga kiwe, busana nʼebibi byosĩ ebyo akola omo meso wʼOmwami Mukulu erĩmũhĩtanĩa omo mĩbĩrĩ yʼebyala biwe, erisosa ekĩtũnga kya Yeroboamũ, nʼakandi kusangwa ĩta Nadabũ.

⁸Omo mwaka wʼamakũmĩ abiri nʼendatu wa Asa omwami wʼeYũda, Ela mugala wa Baasa mwatsũka eritabala oko Baĩsraelĩ eTĩrza, neryo mwatabala myaka ĩbĩrĩ.

⁹Neryo omugombe wuwe ye Zĩmũrĩ, omukulu wʼekihande kyʼesyogalĩ siwe mwamusamambula. Neryo abya eTĩrza ĩnĩakanywa nʼerĩkũndĩra omo nyũmba ya Arza, oyo wabya mukulu wʼenyũmba eTĩrza.

¹⁰Neryo ye Zĩmũrĩ mwayamo mwamũswĩrya mwamwĩta, oko mwaka wʼamakũmĩ abiri nʼeyirinda wa Asa omwami wʼeYũda, neryo mwabya mwami omo mwanya wuwe.

¹¹Neryo omugulu abya mwami, abere abĩkala oko kĩtũmbĩ kiwe kyʼobwami, neryo mwĩta ekĩtũnga kyosĩ kya Baasa; mwatasĩganĩa kʼomulume nʼomuguma kutse abʼoko kĩtũnga kiwe, kutse oko bĩra buwe.

¹²Litya Zĩmũrĩ mwaherya ekĩtũnga kyosĩ kya Baasa kyʼatya, ngʼekĩnywa kyʼOmwami Mukulu, ekyo abũga akahandikirira Baasa oko mũmĩnyererĩ ye Yehũ,

¹³busana nʼebibi byosĩ bya Baasa, nʼebibi bya Ela mugala wuwe, ebyo bakola nabi, nʼebyo baleka Ĩsraelĩ erikola ebibi, erĩhĩtanĩa Omwami Mukulu, Nyamuhanga wʼeĨsraelĩ busana nʼesyosanamu syabo.

¹⁴Nʼeyindi mĩbĩrĩ ya Ela, nʼebyosĩ akola, sĩbĩsakĩre omo kitabu kyʼemyatsi yʼabami ba Ĩsraelĩ kwehĩ?

¹⁵Oko mwaka wʼamakũmĩ abiri nʼeyirinda ya Asa, omwami wʼeYũda, Zĩmũrĩ mwatabala ebiro birinda eTĩrza. Neryo abandu babya ibabirihanda ekilaliriro erilwa nʼeGĩbetonĩ owabya wʼAbafilĩsĩtĩnĩ.

¹⁶Nʼabandu ababya omo nganda mobowa engulu ambu Zĩmũrĩ abirihona, kandi abĩrĩta omwami; kyaleka Ĩsraelĩ yosĩ ĩbahĩra Omũrĩ omukulu wʼemilondo mo mwami oko Ĩsraelĩ oko kiro ekyo omo ndwiro.

¹⁷Neryo Omũrĩ mwiruka akalũa eGĩbetonĩ nʼAbaĩsraelĩ bosĩ haguma naye, mobagotera eTĩrza.

¹⁸Neryo, omugulu Zĩmũrĩ alangira kʼomũyĩ abĩrĩkĩndwa, mwaya omo nyũmba yʼOmwami, neryo mwayĩhĩsĩrya kwʼenyũmba yʼomwami omo muliro neryo mwahola,

¹⁹busana nʼebibi biwe ebyo akola iniakakola ebibi omo meso wʼOmwami Mukulu, nʼerigendera omo nzira ya Yeroboamũ, nʼomo kibi kiwe ekyo akola erĩkolesya Abaĩsraelĩ bʼebibi.

²⁰Nĩkwa eyindi mĩbĩrĩ ya Zĩmũrĩ, nʼeriyisamambũla liwe akola, sĩbĩsakĩre omo kitabu kyʼemyatsi yʼabami ba Ĩsraelĩ kwehĩ?

²¹Neryo abandu ba Ĩsraelĩ mobagabana mo bihande bibiri; ekihande kyʼabandu mokyakwama Tĩbĩnĩ mugala wa Gĩnatĩ, erimuyira mo mwami; nʼekihande mokyakwama Omũrĩ.

²²Nĩkwa abandu abakwama ye Omũrĩ mobakĩnda abandu abakwama Tĩbĩnĩ mugala wa Gĩnatĩ. Neryo Tĩbĩnĩ mwahola, na Omũrĩ mwabya mwami.

²³Oko mwaka wʼamakũmĩ asatu nʼomuguma wa Asa omwami wʼeYũda, Omũrĩ mwabya mwami oko Baĩsraelĩ, neryo mwatabala emyaka ĩkũmĩ nʼĩbĩrĩ; mwatabala eTĩrza emyaka ndatu.

²⁴Neryo mwagula ekitwa kyʼeSamarĩa uku Semerĩ omo syotalanta ĩbĩrĩ syʼekĩtsĩpa; neryo mwahĩmba oko kitwa ekyo, mwahula erĩna lyʼomũyĩ ogo ahĩmba mo Samarĩa, ngʼerĩna lya Semerĩ, Omwenye kitwa.

²⁵Na Omũrĩ mwakola ekyabya kibi omo meso wʼOmwami Mukulu, mwakola ebibi kwilaba bosĩ ababya embere siwe.

²⁶Kusangwa mwagendera omo nzira yosĩ ya Yeroboamũ mugala wa Nebatĩ, nʼomo bibi biwe ebyo akolesaya Abaĩsraelĩ, erĩhĩtanĩa Omwami Mukulu Nyamuhanga wa Ĩsraelĩ, omo syosanamu syabo.

²⁷Neryo eyindi emĩbĩrĩ ya Omũrĩ eyo akola, nʼobũbangĩ obo akangaya, sĩbĩsakĩre omo kitabu kyʼemyatsi yʼabami ba Ĩsraelĩ kwehĩ?

²⁸Neryo Omũrĩ mweya abotata-kulu buwe, mwatabwa eSamarĩa; na Ahabũ mugala wuwe mwabya mwami omo mwanya wuwe.

²⁹Nʼoko mwaka wʼamakũmĩ asatu nʼomunani wa Asa omwami wʼeYũda, Ahabũ mugala wa Omũrĩ, mwabya mwami oko Baĩsraelĩ; kandi Ahabũ mugala wa Omũrĩ mwatabalira Abaĩsraelĩ eSamarĩa emyaka makũmĩ abiri nʼeyĩbĩrĩ.

³⁰Ahabũ mugala wa Omũrĩ mwakola ekyabya kibi omo meso wʼOmwami Mukulu kwilaba bosĩ ababya embere siwe.

³¹Neryo, nga mwatsi muke erigendera omo bibi bya Yeroboamũ mugala wa Nebatĩ, Ahabũ mwahĩkya Yezebelĩ ye mwali wa Etĩbaalĩ omwami wʼAbanya Sĩdonĩ, kandi mwayakolera Baalĩ, nʼerĩmũramya.

³²Neryo mwahĩmbĩra Baalĩ ekiherero omo nyũmba ya Baalĩ, eyo ahĩmba eSamarĩa.

³³Kandi Ahabũ mwakokotya esanamu ya Asera. Litya Ahabũ mwakola bingi byʼerĩhĩtanĩa Omwami Mukulu Nyamuhanga wʼAbaĩsraelĩ kwilaba abami bosĩ ba Ĩsraelĩ ababya embere siwe.

³⁴Oko biro biwe ye Hĩelĩ Omũbetelĩ mwahĩmba eYerĩko. Mwahala ekibanza kyago omwʼĩkwa lya Abĩramũ akambere kuwe, kandi mwasingika esyongyo syago omwʼĩkwa lyʼomugala wuwe mulere ye Segũbũ, ngʼekĩnywa kyʼOmwami Mukulu ekyo abwira Yosũa mugala wa Nũnĩ.