Read nande 1 Abami 21 Bible Online

1 Abami 21 - nande bible

1 Abami 21

¹Neryo enyũma wʼemyatsi eyĩ, ye Nabotĩ Omũyezreelĩ abya awite eririma lyʼebĩnyũ eryabya eYezreelĩ, hakũhĩ nʼekikali kya Ahabũ omwami wʼeSamarĩa.

²Neryo Ahabũ mwabwira Nabotĩ ati, Umba eririma lyawe lyʼebĩnyũ inayiralyo mwʼirima lyʼesyomboka, kusangwa liri hakũhĩ nʼenyũmba yage, nage ngandikuha erindi ririma lyʼebĩnyũ lyowene kwilabalyo; kutse wamanza inakuha esyofranka ngʼenzwere yalyo.

³Nĩkwa Nabotĩ mwabwira Ahabũ, ati, Omwami Mukulu aganekyo busana nage, erikuha omwandu wʼabotata-kulu bage.

⁴Neryo Ahabũ mwaya omo nyũmba yiwe ĩnĩanaswekĩre ĩsĩatsemĩre busana nʼekĩnywa ekyo Nabotĩ Omũyezreelĩ amubwira; kusangwa abya abĩrĩbũga ati, Sindiendikuha omwandu wʼabotata-kulu bage. Neryo mwagotsera oko ngyingo yiwe, mwahindula obũsũ buwe, mwagana erirya akalyo.

⁵Nĩkwa Yezebelĩ mũkalĩwe mwamũhĩkako, mwamũbũlya ati, Busana nakĩ ekĩrĩmũ kyawe kiri nʼobũlĩge, inutalya kalyo, kwehĩ?

⁶Naye mwamubwira ati, Kusangwa monabũga na Nabotĩ Omũyezreelĩ, monamubwira nyiti, Umba eririma lyʼebĩnyũ oko franka; kutse wamanza nasyakulha erindi ririma lyʼebĩnyũ omo mwanya walyo; naye mwasũbĩrya ati, Sindiendikuha eririma lyage lyʼebĩnyũ.

⁷Na Yezebelĩ mũkalĩwe mwamubwira ati, Ukatabalira obwami bwʼAbaĩsraelĩ bo lino kwehĩ? Hangana, ulye akalyo, nʼomutima wawe atsange; ngandikuha eririma lyʼebĩnyũ lya Nabotĩ Omũyezreelĩ.

⁸Neryo Yezebelĩ mwasaka esyobarua omo lĩna lya Ahabũ, neryo mwabohasyo omo kĩmĩnyĩsyo kiwe, neryo mwatuma esyobarua esyo oko bakulu nʼoko banyamwami ababya oko mũyĩ wuwe, ababya bĩkere haguma na Nabotĩ.

⁹Neryo Yezebelĩ mwasaka omo syobarua esyo ati, Mũhĩre eritsira lyʼakalyo, mũhanganaye Nabotĩ omo katĩkatĩ kʼabandu;

¹⁰kandi mũhĩre abandu babĩrĩ batya-batya, embere siwe, bamuhandikirire bati, Mowatsuma Nyamuhanga nʼomwami. Neryo mumutwale eyĩhya mũmwĩte omo mabwe ahole.

¹¹Neryo abalume bʼomũyĩ wuwe, abakulu nʼabanya-mwami ababya bĩkere omo mũyĩ wuwe, mobakola ngoko Yezebelĩ ahanabo, ngʼebĩsakĩre omo syobarua atuma kubo.

¹²Mobahĩra eritsira kalyo, mobahanganĩa Nabotĩ omo katĩkatĩ kʼabandu.

¹³Neryo abandu babiri batya-batya, mobingira mobĩkala embere siwe; neryo abandu batya-batya abo mobamuhandikirira, mobahandikirira Nabotĩ embere syʼabandu bati, Nabotĩ mwakatsuma Nyamuhanga, nʼomwami. Neryo mobamuhekera eyĩhya wʼomũyĩ, mobamwĩta omo mabwe, neryo mwahola.

¹⁴Neryo mobatuma uku Yezebelĩ bati, Nabotĩ abĩrĩtwa omo mabwe, abirihola.

¹⁵Neryo omugulu Yezebelĩ owa ngoko Nabotĩ abĩrĩtwa omo mabwe kwʼabirihola, Yezebelĩ mwabwira Ahabũ ati, Hangana, ũsĩgalaye eririma lyʼebĩnyũ lya Nabotĩ Mũyezreelĩ, eryo agana erikuha busana nʼesyofranka; kusangwa Nabotĩ siakiriho, nĩkwa abirihola.

¹⁶Neryo omugulu Ahabũ owa ngoko Nabotĩ abirihola, Ahabũ mwahangana eriandagalira omwʼirima lyʼebĩnyũ lya Nabotĩ Omũyezreelĩ erĩsĩgalyalyo.

¹⁷Neryo ekĩnywa kyʼOmwami Mukulu mokyahĩka uku Elĩya Omũtĩsĩbe, kiti,

¹⁸Hangana Wandagale erĩhĩndana na Ahabũ omwami wʼeĨsraelĩ, oyo wĩkere eSamarĩa; lebaya, ali omwʼirima lyʼebĩnyũ lya Nabotĩ, aho andagalira erĩsĩgalyalyo.

¹⁹Kandi Wasyamubwira uti, Omwami Mukulu akabũga ati, Wabĩrĩta, kandi wabĩrĩsĩgalya kwehĩ? Kandi Wasyamubwira uti, Omwami Mukulu akabũga, ati, Aho esyombwa syalyatsirira omusasi wa Nabotĩ, esyombwa syasyalyatsirira nʼomusasi wawe wʼaho.

²⁰Na Ahabũ mwabwira Elĩya, ati, Wabĩrĩnyeya uwe nzĩgũ yage kwehĩ? Naye mwasũbĩrya ati, Nabĩrĩkweya kusangwa wabĩrĩyĩgũlya erikola ekibi omo meso wʼOmwami Mukulu.

²¹Lebaya, ngandikuletera ebibi, ngandĩsyakũbĩrya nʼerĩĩta obuli mwana wʼobulume uku Ahabũ, oyuli omo mũlĩkĩ nʼogʼobwĩranda omo Baĩsraelĩ.

²²Kandi nasyayira ekĩtũnga kyawe ngʼekĩtũnga kya Yeroboamũ mugala wa Nebatĩ, kandi ngʼekĩtũnga kya Baasa mugala wa Ahĩya busana nʼerĩnyĩhĩtĩkĩranĩa eryo wanyĩhĩtĩkĩranayamo erihitana, kandi ĩwabĩrĩkolesya Abaĩsraelĩ bʼebibi.

²³Kandi Omwami Mukulu mwabũga busana na Yezebelĩ ati, Esyombwa syasyalya Yezebelĩ omo mitano yʼeYezreelĩ.

²⁴Owʼekĩtũnga kya Ahabũ oyukaholera omo mũyĩ, esyombwa syasyamulya; nʼoyukaholera omolĩ esyonyonyũ syʼomo kyanya syasyamulya.

²⁵Nĩkwa kwenene mohatabya oyuli nga Ahabũ, oyo wayĩgũlaya erikola ekibi omo meso wʼOmwami Mukulu, kusangwa Yezebelĩ mũkalĩwe amũkaba-kabaya.

²⁶Ahabũ mwakola ebyʼesyonye kutsibu erikwama esyosanamu ngʼebyosĩ ebyo Abaamorĩ bakola, abo Mwami Mukulu ahiga embere syʼabana ba Ĩsraelĩ.

²⁷Neryo omugulu Ahabũ owa ebĩnywa ebyo, mwasatangya esyongimba siwe, mwambala emisarandwe oko mubiri wuwe, mwatsira akalyo mwagotsera nʼemisarandwe, mwagenda nʼobũlĩge.

²⁸Nʼekĩnywa kyʼOmwami Mukulu mokyahĩka uku Elĩya Omũtĩsĩbe, kiti,

²⁹Wamalangira ngoko Ahabũ akayĩkehaya embere syage kwehĩ? Kusangwa akayĩkehaya embere syage, sindiendisyaleta ebibi ebyo omo biro biwe; nĩkwa omo biro byʼomugala wuwe nasyaleta ebibi ebyo oko kĩtũnga kiwe.