Read nande 1 Abami 22 Bible Online

1 Abami 22 - nande bible

1 Abami 22

¹Neryo mobĩkala butsira malwa omo katĩkatĩ kʼeSũrĩa nʼeĨsraelĩ emyaka ĩsatu.

²Neryo omo mwaka wʼakasatu, Yehosafatĩ omwami wʼAbayũda mwandagalira oko mwami wʼAbaĩsraelĩ.

³Nʼomwami wa Ĩsraelĩ mwabwira abagombe buwe ati, Sĩmwasĩ kwʼeRamotĩ-gĩleadĩ ni wetu, netu tukabya bũkũtũ, isitwelũsayago omo byala byʼOmwami wʼeSũrĩa kwehĩ?

⁴Neryo mwabũlya Yehosafatĩ ati, Wanganagenda haguma nage eriyalwira eRamotĩ-gĩleadĩ kwehĩ? Na Yehosafatĩ mwabwira omwami wa Ĩsraelĩ ati, Ĩngye indi nga we, nʼabandu bage bali ngʼabandu bawe, nʼesyosabayĩrĩ syage ngʼesyosabayĩrĩ syawe.

⁵Na Yehosafatĩ mwabwira omwami wa Ĩsraelĩ ati, Ngakũbũlaya, nyiti Ũbũlaye mũnabwĩre busana nʼekĩnywa kyʼOmwami Mukulu.

⁶Neryo omwami wa Ĩsraelĩ mwahĩndanĩa haguma abamĩnyererĩ nga bandu magana ani, mwabũlyabo ati, Nyinayalwe nʼeRamotĩ-gĩleadĩ, kutse nyũmbaye kwehĩ? Nabo mobabũga bati, Uhetukireyo kusangwa Omukama asyahĩrago omo byala byʼOmwami.

⁷Nĩkwa Yehosafatĩ mwabũga ati, Hano sihakiri omũmĩnyererĩ wʼOmwami Mukulu itwatoka erĩmũbũlya kwehĩ?

⁸Nʼomwami wʼAbaĩsraelĩ mwabwira Yehosafatĩ ati, Hakine mundu muguma wangatũbũlĩrya Omwami Mukulu, ye Mĩkaya mugala wa Ĩmũla; nĩkwa nyĩmũponĩre; kusangwa sialiminyerera ebibuya busana nage, bye nʼebibi. Na Yehosafatĩ mwabũga ati, Omwami sĩabũge atya.

⁹Neryo omwami wʼeĨsraelĩ mwabirikira omũsondolĩ, mwabũga ati, Wende Mĩkaya mugala wa Ĩmũla yo lũba.

¹⁰Neryo omwami wʼAbaĩsraelĩ na Yehosafatĩ omwami wʼAbayũda babya ĩbanĩkere obuli mundu oko kĩtũmbĩ kiwe kyʼobwami, ibambite esyongimba syabo, omo kibuga kyʼerĩhũmbĩramo oko lũkyo lwʼeSamarĩa; nʼabamĩnyererĩ bosĩ ibakaminyerera embere syabo.

¹¹Na Zedekĩa mugala wa Kenana mwayihesera amahembe wʼekyuma mwabũga ati, Omwami Mukulu ati, Wasyatũnda Abasũrĩa, erĩhĩka aho basyatĩndĩrwa.

¹²Nʼabamĩnyererĩ bosĩ mobaminyerera batya, bati, Uhetukire eRamotĩ-gĩleadĩ, ubane omũyĩsa; kusangwa Omwami Mukulu akandĩsyahĩrago omo byala byʼOmwami.

¹³Nʼomukwenda oyo wayabirikira Mĩkaya mwamubwira ati, Lebaya lino, ebĩnywa byʼabamĩnyererĩ bĩkabũga kĩnywa kiguma kyʼoko bibuya busana nʼomwami. Kĩsĩ-kĩsĩ nyiti ekĩnywa kyawe kibye ngʼekĩnywa kyʼowa kubo ũbũge ekibuya.

¹⁴Neryo Mĩkaya mwabũga ati, Ngoko Mwami Mukulu aneho, ekyo Mwami Mukulu akambwira kye nʼekyo nasyabũga.

¹⁵Neryo abere abiasa oko mwami, omwami mwamubwira ati, Mĩkaya, tuyalwire eRamotĩ-gĩleadĩ, kutse tũmbaye kwehĩ? Naye mwamũsũbĩrya ati, Hetukirayo ubane omũyĩsa; nʼOmwami Mukulu asyahĩrago omo byala byʼOmwami.

¹⁶Neryo omwami mwamubwira ati, Ko ngendo singahi nasyakũlahĩrĩrya nyiti, sumbwire nʼekyike ekite kya kwenene omo lĩna lyʼOmwami Mukulu kwehĩ?

¹⁷Neryo Mĩkaya mwabũga ati, Monalangira Abaĩsraelĩ bosĩ ibabiripanza-panzwa oko bitwa, ngʼesyombũlĩ esitawite mũlĩsya. Neryo Omwami Mukulu mwabũga ati, Aba sibawite mukama; basubule obuli mundu omo nyũmba yiwe mo buholo.

¹⁸Nʼomwami wʼAbaĩsraelĩ mwabwira Yehosafatĩ ati, Mondakubwira nyiti siendisyaminyerera ekibuya busana nage kwehĩ, nĩkwa ebibi?

¹⁹Neryo Mĩkaya mwabũga ati, Gowe ekĩnywa kyʼOmwami Mukulu; monalangira Omwami Mukulu ĩnĩanĩkere oko kĩtũmbĩ kiwe kyʼobwami, nʼemilondo yosĩ yʼelubula ibanahangene hakũhĩ naye oko byala biwe byʼamali nʼoko malembe wuwe.

²⁰Neryo Omwami Mukulu mwabũga ati, Nindi wasyateba Ahabũ iniatoka erihetukira eRamotĩ-gĩleadĩ nʼeriwayo kwehĩ? Neryo omuguma mwabũga kiwe nʼogundi mwabũga kiwe.

²¹Neryo ekĩrĩmũ kiguma mokyahuluka, mokyahangana embere syʼOmwami Mukulu, kiti, Ingye ngandimuteba.

²²Neryo Omwami Mukulu mwabwirakyo ati, Ũmũkĩ kwehĩ? Naye ati, Nage nasyagenda, nasyabya ekĩrĩmũ kyʼeriteba omo buno bwʼabamĩnyererĩ buwe bosĩ. Naye mwabũga ati, Wasyamuteba, kandi wasyasĩngana nibya; ugende, Ukole utya.

²³Neryo lino lebaya, Omwami Mukulu abĩrĩhĩra ekĩrĩmũ kyʼeriteba omo buno bwʼabamĩnyererĩ bawe bosĩ aba; Omwami Mukulu abĩrĩbũga erihera busana nawe.

²⁴Neryo Zedekĩa omugala wa Kenana mwahĩka hakũhĩ, mwaswĩrya Mĩkaya okwʼĩtema, mwabũga ati, Omũlĩmũ wʼOmwami Mukulu mwandabĩreko omo nzira yahi erĩbũga nawe kwehĩ?

²⁵Neryo Mĩkaya mwabũga ati, Lebaya, wasyalangira oko kiro ekyo omugulu wasyingira omo kyumba kyʼomwisi ũkabĩsama.

²⁶Neryo omwami wʼAbaĩsraelĩ mwabũga ati, Muhambe Mĩkaya, mũmũsũbaye uku Amonĩ omukulu wʼomũyĩ, nʼuku Yoasĩ mugala wʼOmwami;

²⁷mũbũge muti, Omwami amabũga ati, Mũhĩre omundu oyũ omo mũlĩkĩ, mũmũlĩsaye akalyo kʼobũlĩge nʼamagetsi wʼobũlĩge, erĩhĩka aho nasyasubulira buholo.

²⁸Neryo Mĩkaya mwabũga ati, Wamasyasubula buholo, kwesĩ Omwami Mukulu ĩyũtabũga nage. Kandi mwabũga ati, Mowe, ĩnywe bandu bosĩ.

²⁹Neryo omwami wʼAbaĩsraelĩ na Yehosafatĩ omwami wʼAbayũda mobahetukira eRamotĩ-gĩleadĩ.

³⁰Nʼomwami wʼAbaĩsraelĩ mwabwira Yehosafatĩ ati, Ngandiyihindula nʼeriingira omo malwa; nĩkwa uwe wambale esyongimba syawe. Neryo omwami wʼAbaĩsraelĩ mwayihindula mwingira omo malwa.

³¹Nĩkwa omwami wʼeSũrĩa abya iniabirihana abakulu bʼesyogalĩ siwe amakũmĩ asatu nʼababiri, ati, Simulwe nʼabake-bake kutse abakulu-bakulu, yo nʼomwami wʼAbaĩsraelĩ ĩyowene.

³²Neryo omugulu abakulu bʼesyogalĩ balangira Yehosafatĩ, mobabũga bati, Kwenene yo mwami wʼAbaĩsraelĩ; neryo mobakitiraho erilwa naye; na Yehosafatĩ mwalaka.

³³Neryo omugulu abakulu bʼesyogalĩ balangira kwʼate iyo mwami wʼAbaĩsraelĩ, mobaleka erimukwama.

³⁴Neryo omundu muguma mwakakya obuta buwe ĩsĩasĩ, mwalasa omwami wʼAbaĩsraelĩ aho ebindu biwe byʼamalwa bimatene; neryo omwami mwabwira oyũkagendaya egalĩ yiwe ati, Ũbũnũkale unyiheke nyĩlũe omo mulondo; kusangwa nabirihutala kutsibu.

³⁵Neryo amalwa mwakanya ekiro ekyo; nʼomwami mwayegemerĩbwa oko galĩ yiwe embere syʼAbasũrĩa, neryo mwahola omwʼĩgologolo; nʼomusasi mwasendera omwisi wʼegalĩ akalũa omo kironda.

³⁶Neryo mohabya eribirikira omo mulondo gosĩ omo malengera bati, Obuli mundu aye oko mũyĩ wuwe, nʼobuli mundu oko kihugo kiwe.

³⁷Neryo omwami kwʼahola atya, neryo mwahekerwa eSamarĩa; neryo mobata omwami eSamarĩa.

³⁸Kandi mobererya egalĩ hakũhĩ nʼekitsinga kyʼeSamarĩa; nʼesyombwa mosyalyatsirira omusasi wuwe [aho abamalaya bayikosera]; ngʼekĩnywa kyʼOmwami Mukulu ekyo abũga.

³⁹Nʼeyindi mĩbĩrĩ ya Ahabũ, nʼebyosĩ akola, nʼenyũmba yʼameno wʼesyonzogũ, eyo ahĩmba, nʼemĩyĩ yosĩ eyo ahĩmba, sĩbĩsakĩre omo kitabu kyʼemyatsi yʼabami ba Ĩsraelĩ kwehĩ?

⁴⁰Neryo Ahabũ mweya abotata-kulu buwe atya; na Ahazĩa mugala wuwe mwabya mwami omo mwanya wuwe.

⁴¹Neryo Yehosafatĩ omugala wa Asa mwatsũka eritabalira eYũda omo mwaka wʼakani wa Ahabũ omwami wʼAbaĩsraelĩ.

⁴²Yehosafatĩ abya awite emyaka makũmĩ asatu nʼeyĩtanu omugulu atsũka eritabala; neryo mwatabala emyaka makũmĩ abiri nʼeyĩtanu eYerũsalema, Nʼerĩna lya koyo wuwe lyabya Azũba mwali wa Sĩlĩhĩ.

⁴³Naye mwagendera omo nzira yosĩ ya tata wuwe Asa; mwatakita kuyo, iniakakola ekyabya kitunganane omo meso wʼOmwami Mukulu; nĩkwa ahendata mohatalũsĩbwa; abandu ibakinahonga nʼerĩhĩsya obukwa oko hendata.

⁴⁴Na Yehosafatĩ mwayira Obuholo haguma nʼomwami wa Ĩsraelĩ.

⁴⁵Neryo eyindi mĩbĩrĩ ya Yehosafatĩ, nʼamaka wuwe ago akangaya, kandi ngoko alwa, sĩbĩsakĩre omo kitabu kyʼemyatsi yʼemigulu yʼabami bʼeYũda kwehĩ?

⁴⁶Nʼabasĩgalira oko Banya Sodomo abasĩgala omo biro bya tata wuwe Asa, Yehosafatĩ mwalũsyabo omo kihugo.

⁴⁷Kandi eEdomũ sihabya mwami, tsongo-mwami yo wabya mwami.

⁴⁸Na Yehosafatĩ mwabatsa amato wʼeTarsĩsĩ erienda esyamagetsi eOfĩrĩ; nĩkwa mwatagenda; kusangwa amato ayo mwatulangikira eEzĩonĩ-geberĩ.

⁴⁹Neryo Ahazĩa mugala wa Ahabũ mwabwira Yehosafatĩ ati, Uleke abagombe bage bagende haguma nʼabagombe bawe omo mato. Nĩkwa Yehosafatĩ mwatalĩga.

⁵⁰Neryo Yehosafatĩ mweya abĩse-kulu buwe, neryo mwatabwa ahali abĩse-kulu buwe omo mũyĩ wʼĩse wuwe Dawĩdĩ; na Yoramũ mugala wuwe mwabya mwami omo mwanya wuwe.

⁵¹Ahazĩa mugala wa Ahabũ mwatsũka eritabala oko Ĩsraelĩ eSamarĩa omo mwaka wʼerĩkũmĩ nʼeyirinda wa Yehosafatĩ omwami wʼeYũda, neryo mwatabala emyaka ĩbĩrĩ oko Ĩsraelĩ.

⁵²Neryo mwakola ekibi omo meso wʼOmwami Mukulu, mwagendera omo nzira ya tata wuwe nʼomo nzira ya koyo wuwe, nʼomo nzira ya Yeroboamũ mugala wa Nebatĩ, oyo waleka Abaĩsraelĩ ĩbahalya.

⁵³Neryo mwakolera Baalĩ, mwamũramya, mwahĩtanĩa Omwami Mukulu, Nyamuhanga wa Ĩsraelĩ, ngʼebyosĩ ebyo tata wuwe akola.