Read nande 1 Abami 4 Bible Online

1 Abami 4 - nande bible

1 Abami 4

¹Neryo omwami Solomono abya mwami oko Baĩsraelĩ bosĩ.

²Nʼaba ba bahangamĩ abo abya awite: Azaria mugala wa Zadokĩ; abya mũhererĩ;

³Elĩhorefũ na Ahĩya bagala ba Sĩsa, babya bahandĩkĩ; Yehosafata mugala wa Ahĩlũdĩ abya omũhandĩkĩ wʼekitabu;

⁴na Benaya mugala wa Yehoyada abya mukulu wʼemilondo; na Zadokĩ na Abĩatarĩ babya bahererĩ;

⁵na Azaria mugala wa Natana abya mukulu wʼabahangamĩ; na Zabũdĩ mugala wa Natana abya mũhererĩ, yo mwĩra, wʼomwami;

⁶na Ahĩsarĩ abya mukulu wʼenyũmba; na Adonĩramũ mugala wa Abũda abya mukulu wʼerĩkolesya bandu.

⁷Kandi Solomono abya nʼabakulu ĩkũmĩ nʼababiri endata oko Baĩsraelĩ bosĩ, ababya bakabana ebyalya busana nʼomwami nʼekĩtũnga kiwe obuli mundu iniawite ekĩtũlĩ kiwe kyʼerireta ebyalya busana nʼomukera muguma oko mwaka.

⁸Aya wa mena wabo: Benĩ-hũrũ, omo kihugo kyʼebitwa kya Efũraĩmũ;

⁹Benĩdekerĩ, eMakazĩ, nʼeSalbĩmũ, nʼeBetĩsemesĩ, nʼeElonĩ-betĩ-hananĩ;

¹⁰Behesedĩ, eArũbotĩ awite Sokohĩ nʼekihugo kyosĩ kyʼeHeferĩ;

¹¹Benĩ-abĩnadabũ omo kitwa kyʼeDorĩ, yoyo wahĩkaya Tafatĩ mwali wa Solomono;

¹²Baana mugala wa Ahĩlũdĩ, eTanakĩ nʼeMĩgĩdo, nʼeBetĩ-seanĩ yosĩ ekiri hakũhĩ nʼeZaretana eyĩkwa oko Yezreelĩ, erĩtsũka eBetĩ-seanĩ erĩhĩka eAbelĩ-mehola, nʼeritwangana Yokemeamĩ;

¹³Benĩ-geberĩ, eRamotĩ-gĩleadĩ naye awite emĩyĩ ya Yaĩrĩ mugala wa Manase eyiri eGĩleadĩ; naye awite oluhande lwʼeArgobĩ, oluli eBasanĩ, emĩyĩ minene-minene amakũmĩ ndatu eyiri kwʼesyombĩmbo nʼemihomo yʼemiringa;

¹⁴Ahĩnadabũ mugala wa Ĩdo, eMahanaĩmũ;

¹⁵Ahĩmazĩ eNafũtalĩ, naye mwahĩkya Basematĩ mwali wa Solomono;

¹⁶Baana mugala wa Hũsaĩ eAserĩ nʼeBealotĩ;

¹⁷Yehosafata mugala wa Parũa eĩsakarĩ;

¹⁸Sĩmeĩ mugala wa Ela, eBenyamĩna;

¹⁹Geberĩ mugala wa Ũrĩ, omo kihugo kyʼeGĩleadĩ, kyo kihugo kya Sĩhonĩ, omwami wʼAbaamorĩ, nʼekya Ogĩ omwami wʼeBasanĩ; naye abya mũhangamĩ ĩyowene oyo wabya omo kihugo ekyo.

²⁰Abayũda nʼAbaĩsraelĩ babya bangi ngʼomusege gʼoko ngetsi busana nʼobungi; ibakalya nʼerĩpũlya nʼeritsanga.

²¹Na Solomono mwatabala oko mami gosĩ erĩtsũka oko lũsĩ lwʼeEfurata erĩhĩka oko kihugo kyʼAbafĩlĩstĩnĩ, nʼerĩhĩka oko mutano wʼeMĩsĩrĩ; mobaleta engemu, nʼerikolera Solomono ebiro byosĩ byʼeribyaho liwe.

²²Nʼebyalya bya Solomono byʼekiro kiguma byabya ehĩrengĩ makũmĩ asatu hyʼeyĩsyano yʼenzelele, nʼehĩrengĩ makũmĩ ndatu hyʼeyĩsyano,

²³esyonume syʼesyonde esĩnenehĩre ĩkũmĩ, nʼesyonume syʼesyonde amakũmĩ abiri esĩkalũa omo lũlĩsĩryo, nʼesyombũlĩ erĩgana, haguma nʼempara, nʼejatsa, nʼesama, nʼesyongoko esĩnenehĩre.

²⁴Kusangwa abya atabere oko mwisirya ono wʼolũsĩ lwʼeEfurata erĩtsũka eTĩfsa erĩhĩka eGaza, oko bami bosĩ bʼomwisirya ono wʼolũsĩ lwʼeEfurata. Na Solomono abya nʼobuholo oko mbande siwe syosĩ.

²⁵Abayũda nʼAbaĩsraelĩ mobĩkala buholo, obuli mundu omo ndĩna yʼomũlĩkĩ wʼebĩnyũ biwe, nʼoko ndĩna yʼomuti wʼomũtĩnĩ wuwe, erĩtsũka eDanĩ nʼerĩhĩka eBerĩ-seba, oko biro byosĩ bya Solomono.

²⁶Na Solomono abya nʼebĩyĩte byʼesyosabayĩrĩ elfu makũmĩ ani (40,000) busana nʼesyogalĩ siwe, nʼabandu abali oko syosabayĩrĩ elfu ĩkũmĩ nʼĩbĩrĩ (12,000).

²⁷Nʼabahangamĩ abo mobabana ebyalya busana nʼomwami Solomono, na busana nʼabosĩ abahĩka oko mesa yʼOmwami Solomono, obuli mundu oko mukera wuwe; mobatakehya nʼekindu.

²⁸Kandi mobaleta ekisusu nibya nʼesyombuba busana nʼesyosabayĩrĩ na busana nʼesyonyama esyangũhĩre aho byangabya, obuli mundu ngʼekĩtũlĩ kiwe.

²⁹Na Nyamuhanga mwaha Solomono amenge nʼobowĩka bunene kutsibu, nʼobukulu bwʼomutima ngʼemisege eyiri oko mũsĩke wʼengetsi.

³⁰Nʼamenge wa Solomono mwalaba amenge wʼabana bosĩ bʼoluhande lwʼeyo eryuba likasira, nʼamenge gosĩ wʼeMĩsĩrĩ.

³¹Kusangwa abya nʼamenge kwilaba abandu bosĩ; kwilaba Etanĩ, Omuezra, na Hemanĩ, na Kalkolĩ, na Darda, bagala ba Maholĩ; nʼengulu yiwe moyatsungana omo bihanda byosĩ oko mbande syosĩ.

³²Kandi mwabũga emĩsyo elfu ĩsatu (3,000); nʼesyonyimbo siwe syabya elfu nguma nʼesĩtanu (1,005).

³³Kandi mwahula emiti, erĩtsũka oko mĩerezĩ eyiri eLebanonĩ erĩhĩka oko hĩsopo owakalasa omo mbĩmbo; mwahula esyonyama nibya, nʼesyonyonyũ, nʼebikakululuka, nʼamahere.

³⁴Kandi abandu mobalũa oko bihanda byosĩ erĩowa amenge wa Solomono, erĩlũa oko bami bosĩ bʼekihugo abowa engulu yʼamenge wuwe.