Read nande 1 Abami 5 Bible Online

1 Abami 5 - nande bible

1 Abami 5

¹Neryo Hĩramũ omwami wʼeTĩro mwatuma abagombe buwe bʼuku Solomono; kusangwa amabĩowa ngoko babĩrĩmũhakabya amagũta eribya mwami omo mwanya wʼĩse wuwe, kusangwa Hĩramũ atula mwĩra wa Dawĩdĩ.

²Neryo Solomono mwatumira Hĩramũ ati,

³Ũnasĩ ngoko tata wage Dawĩdĩ mwatatoka erĩhĩmba enyũmba busana nʼerĩna lyʼOmwami Mukulu Nyamuhanga wuwe busana nʼamalwa awamũtĩmbako oko syombande syosĩ, erĩhĩka aho Mwami Mukulu ahĩrĩrabo omwisi wʼebisando biwe.

⁴Nĩkwa lino Omwami Mukulu Nyamuhanga wage abirimba Obuholo oko mbande syosĩ; sihali enzĩgũ kutse omwatsi mubi.

⁵Neryo, lebaya, ngasonda erĩhĩmba enyũmba busana nʼerĩna lyʼOmwami Mukulu Nyamuhanga wage, ngoko Mwami Mukulu abwira tata wage Dawĩdĩ, ati, Omugala wawe, oyo nasyahĩra oko kĩtũmbĩ kyawe kyʼobwami omo mwanya wawe, yũkasyahĩmba enyũmba busana nʼerĩna lyage.

⁶Neryo lino uhane uti banyikondere emiti yʼemĩerezĩ yʼeLebanonĩ; nʼabagombe bage basyabya haguma nʼabagombe bawe; kandi nasyakuha obũhĩngĩ busana nʼabagombe bawe ngoko wasyabũga; kusangwa ũnasĩ ko hate omo katĩkatĩ ketu oyo wasĩ erikonda emiti ngʼAbasĩdonĩ.

⁷Neryo, omugulu Hĩramũ owa ebĩnywa bya Solomono, mwatsema kutsibu, mwabũga ati, Omũyĩsa abye oko Mwami Mukulu mũnabwĩre, oyo wabiriha Dawĩdĩ omugala wʼamenge busana nʼabandu banene aba.

⁸Neryo Hĩramũ mwatuma uku Solomono, ati, Nabĩrĩowa obukwenda obo wabirinyitumira. Nasyakola ebyosĩ ebyo wanzĩre busana nʼemiti yʼemĩerezĩ, na busana nʼemiti yʼekĩlagũ.

⁹Abagombe bage basyandagalĩryayo oko ngetsi erĩlũa eLebanonĩ; nage nasyaboherayo haguma erigenda oko ngetsi erĩhĩka aho wasyanyahũlĩrya, neryo nasyasengulirayo aho, nawe wasyahekayo aho; nawe wasyaberererya erisonda lyage erimba akalyo busana nʼekĩtũnga kyage.

¹⁰Neryo Hĩramũ mwaha Solomono emiti yʼemĩerezĩ nʼemiti yʼekĩlagũ ngoko abya anzĩre.

¹¹Na Solomono mwaha Hĩramũ ehĩrengĩ hyʼengano elfu makũmĩ abiri (20,000) mo kalyo busana nʼekĩtũnga kiwe, nʼehĩrengĩ makũmĩ abiri hyʼamagũta owene. Solomono kwʼaha Hĩramũ yʼatya oko buli mwaka.

¹²Kandi omwami Mukulu mwaha Solomono yʼamenge, ngoko amulaga; kandi mohabya Obuholo omo katĩkatĩ ka Hĩramũ na Solomono; nʼababiri abo mobalagana haguma.

¹³Kandi Solomono mwakuma-kuma abandu omo Ĩsraelĩ yosĩ; nʼerikuma-kuma eryo molyabya lyʼabandu elfu makũmĩ asatu (30,000).

¹⁴Mwatumabo eLebanonĩ, obuli mukera elfu ĩkũmĩ (10,000) mo kĩtũlĩ; oko mukera muguma mobabya eLebanonĩ, nʼemikera ĩbĩrĩ mobabya ewabo. Na Adonĩramũ mwabya mukulu wʼabandu abo, abakongolawa.

¹⁵Kandi Solomono mwahĩra abahekĩ bʼemiheke elfu makũmĩ alinda (70,000), nʼabakakonda emiti omo bitwa elfu makũmĩ munani (80,000);

¹⁶kandi abakulu ba Solomono ababya oko mũbĩrĩ mobabya bandu elfu ĩsatu nʼamagana asatu (3,300), abasondola bandu abakola omũbĩrĩ.

¹⁷Neryo omwami mwahana, neryo mobaleta amabwe manene-manene, amabwe wʼobugali, busana nʼerĩhĩra ekibanza kyʼenyũmba, omo mabwe awabatsĩre.

¹⁸Neryo abahĩmbĩ ba Solomono nʼabahĩmbĩ ba Hĩramũ nʼAbagebalĩtĩ mobabatsago, nʼerĩkokotya emiti nʼamabwe busana nʼerĩhĩmba enyũmba.