Read nande 2 Abami 1 Bible Online

2 Abami 1 - nande bible

2 Abami 1

¹Kandi Moabũ mwahona oko Baĩsraelĩ enyũma wʼoluholo lwa Ahabũ.

²Na Ahazĩa mwatoga akalaba omo lĩdĩrĩsa lyʼekyumba kiwe kyʼendata omo nyũmba eyabya eSamarĩa, neryo mwalwala; neryo mwatuma abakwenda, mwabwirabo ati, Mugende, mũyabũlaye Baalĩ-zebũbũ, nyamuhanga wʼeEkũronĩ, nga nanasyalama omo ndwala eno.

³Nĩkwa omũlaĩka wʼOmwami Mukulu mwabwira Elĩya Omũtĩsĩbe ati, Hangana, ũyahĩndane nʼabakwenda bʼomwami wʼeSamarĩa, ubwirebo uti, Ni kusangwa sihali Nyamuhanga omo Ĩsraelĩ, kikaleka ĩmwayabũlya Baalĩ-zebũbũ nyamuhanga wʼeEkũronĩ kwehĩ?

⁴Neryo lino Omwami Mukulu ati, Sĩwendĩsyakĩma oko ngyingo eyo wasambirako, nĩkwa kwenene wasyahola. Neryo Elĩya mwayĩlũĩraho.

⁵Nʼabakwenda abo mobasubula, na Ahazĩa mwabũlyabo ati, Busana nakĩ mwamasubula kwehĩ?

⁶Nabo mobamubwira bati, Omundu mwahĩndana netu mwatubwira ati, Mugende musube eyiri omwami oyo wabatuma, mumubwire muti, Omwami Mukulu akabũga ati, Ni kusangwa sihali Nyamuhanga omo Ĩsraelĩ, kikaleka iwatuma erĩbũlya uku Baalĩ-zebũbũ, nyamuhanga wʼeEkũronĩ kwehĩ? Busana nʼekyo sĩwendĩkĩma oko ngyingo wasambirako, nĩkwa kwenene wasyahola.

⁷Naye mwabũga nabo ati, Omundu oyo wasa akahĩndana nenyũ abya wa muhandakĩ kwehĩ oyo wababwira ebĩnywa ebĩ?

⁸Nabo mobamũsũbĩrya bati, Abya mundu wʼobweya bungi, kandi ĩnĩabohĩre embindi yiwe omo mukoba wʼengobĩ. Naye mwabũga ati, Nĩ Elĩya Omũtĩsĩbe.

⁹Neryo omwami mwatuma ukwʼiye omukulu wʼamakũmĩ atanu haguma nʼamakũmĩ atanu wuwe. Naye mwahetukira eyo abya; neryo lebaya, abya ĩkere endata oko kitwa. Neryo mwamubwira ati, Uwe mundu wa Nyamuhanga, omwami ati, Wandagale.

¹⁰Na Elĩya mwasũbĩrya mwabwira omukulu wʼamakũmĩ atanu ati, Namabya indi mundu wa Nyamuhanga, omuliro akwandagalireko erĩlũa elubula, akũhĩsangaye nʼamakũmĩ atanu wawe. Neryo omuliro mwandagala erĩlũa elubula mwamugulumirirako nʼamakũmĩ atanu wuwe.

¹¹Kandi Ahazĩa mwamutumako ogundi mukulu wʼamakũmĩ atanu nʼamakũmĩ atanu wuwe. Naye mwasũbĩrya mwabũga naye ati, Uwe mundu wa Nyamuhanga omwami ati, Wandagale lũba.

¹²Na Elĩya mwasũbĩrya mwabũga naye ati, Namabya indi mundu wa Nyamuhanga, omuliro akwandagalireko alũe elubula, akũhĩsangaye nʼamakũmĩ atanu wawe. Neryo omuliro wa Nyamuhanga mwakĩma akalũa elubula mwamũhĩsya nʼamakũmĩ atanu wuwe.

¹³Kandi mwatuma omukulu wʼamakũmĩ atanu wʼakasatu haguma nʼamakũmĩ atanu wuwe. Omugulu omukulu wʼakasatu wʼamakũmĩ atanu ahetukirayo, mwasa mwakũkama oko marwĩ wuwe embere sya Elĩya, mwamulakira, mwamubwira ati, Kĩsĩkĩsĩ, uwe mundu wa Nyamuhanga, engebe yage nʼengebe yʼabagombe bawe makũmĩ atanu aba yibye yʼobũgũlĩ bunene omo meso wawe.

¹⁴Lebaya omuliro mwakĩma akalũa elubula, mwahĩsya abakulu babiri bʼerĩmbere bʼamakũmĩ atanu, haguma nʼamakũmĩ atanu-atanu wabo; nĩkwa lino engebe yage ibye yʼobũgũlĩ bunene omo meso wawe.

¹⁵Nʼomũlaĩka wʼOmwami Mukulu mwabwira Elĩya ati, Wandagale haguma naye; Sigumubahe. Neryo Elĩya mwahangana mwandagala haguma naye erĩhĩka oko mwami.

¹⁶Neryo mwamubwira ati, Omwami Mukulu ati, Kusangwa wabirituma abakwenda erĩyabũlya uku Baalĩ-zebũbũ, nyamuhanga wʼeEkũronĩ, ni kusangwa sihali Nyamuhanga omo Ĩsraelĩ erĩbũlya ekĩnywa kiwe kwehĩ? busana nʼekyo, Sĩwendĩsyakĩma oko ngyingo eyo wasambirako, nĩkwa kwenene wasyahola.

¹⁷Ahazĩa kwʼahola atya ngʼekĩnywa kyʼOmwami Mukulu ekyo Elĩya abũga. Kandi Yehoramũ mwabya mwami omo mwanya wuwe omo mwaka wʼakabiri wa Yehoramũ mugala wa Yehosafatĩ omwami wʼeYũda; kusangwa siabya awite mugala.

¹⁸Neryo eyindi mĩbĩrĩ ya Ahazĩa eyo akola, sĩyĩsakĩre omo kitabu kyʼemyatsi yʼemigulu yʼabami ba Ĩsraelĩ kwehĩ?