Read nande 2 Abami 10 Bible Online

2 Abami 10 - nande bible

2 Abami 10

¹Neryo Ahabũ abya awite bagala makũmĩ alinda eSamarĩa. Neryo Yehũ mwasaka esyobarua, mwatumasyo eSamarĩa, oko batabalĩ yʼeYezreelĩ, nʼoko bakulu, nʼoko bateya bʼabana ba Ahabũ, ati,

²Neryo lino ebarua eno ikandibya yamabahĩkako, kusangwa abagala bʼomukama wenyũ bali haguma nenyũ, nʼakandi muwite esyogalĩ nʼesyosabayĩrĩ, nʼomũyĩ owakongotere nibya, nʼebindu byʼamalwa;

³muyisoge oyo gowene nʼoyutolere omo bagala bʼomukama wenyũ, mũmũhĩre oko kĩtũmbĩ kyʼobwami kya tata wuwe, mulwe busana nʼekĩtũnga kyʼomukama wenyũ.

⁴Nĩkwa mobubaha kutsibu, bati, Lebaya, abami babiri mobatahangana embere siwe; netu twasyahangana tuti kwehĩ?

⁵Neryo oyo wabya mũhanganĩrĩ wʼenyũmba, nʼoyo wabya mũhanganĩrĩ wʼomũyĩ, nʼabakulu nibya, nʼabo, abakũlaya abana, mobatuma uku Yehũ bati, Tuli bagombe bawe, kandi tukandikola ebyosĩ ebyo ukatuhana; sitwendisyayira mundu mo mwami, Ukole ekyowene omo meso wawe.

⁶Neryo mwasakirabo ebarua engendo yʼakabiri ati, Mwamabya muli oko luhande lwage, kandi mwamabya mũkandĩowa omulenge wage, mwĩmaye emitwe yʼabalume, abagala bʼomukama wenyũ mũhĩke eYezreelĩ eyo nyiri omo ngyakya oko ndambĩ ngʼeyĩ. Nĩkwa abagala bʼomwami, bo bandu makũmĩ alinda, babya haguma nʼabakulu bʼomũyĩ, abakũlayabo.

⁷Neryo omugulu ebarua yahĩka kubo, mobatsimba abagala bʼomwami, mobĩtabo, abandu makũmĩ alinda, mobahĩra emitwe yabo omo bitiri, mobamutumirayo eYezreelĩ.

⁸Neryo omukwenda mwasa mwamubwira ati, Bamaleta emitwe yʼabagala bʼomwami. Naye mwabũga ati, Mũhĩreyo mo bilundo bibiri omo lũkyo lwʼeringiriramo erĩhĩka engyakya.

⁹Neryo bwabere bwabya tũtũtũ, Yehũ mwahuluka mwahangana, mwabwira abandu bosĩ ati, Ĩnywe mutunganene; nĩkwa ĩngye monahotera omukama wage monamwĩta; nĩkwa nindi oyo wĩta abosĩ aba kwehĩ?

¹⁰Muminye lino ngoko sihali kĩnywa nʼekiguma kyʼOmwami Mukulu ekikandisyatala, ekyo Mwami Mukulu abũga busana nʼekĩtũnga kya Ahabũ; kusangwa Omwami Mukulu abirikola ebyo abũga omo mugombe wuwe Elĩya.

¹¹Neryo Yehũ mwĩta abosĩ abasaka abʼekĩtũnga kya Ahabũ eYezreelĩ, nʼabakulu bosĩ buwe, nʼabĩra buwe banze, nʼabahererĩ buwe, mwatasakya nʼomuguma.

¹²Neryo mwahangana mwalũayo, mwaya eSamarĩa. Neryo omugulu abya omo nzira oko nyũmba yʼabalĩsya, yʼerĩtwa obweya bwʼesyombũlĩ,

¹³Yehũ mwahĩndana nʼabagala babo Ahazĩa omwami wʼeYũda, neryo mwabũga ati, Muli bahi kwehĩ? Nabo mobasũbĩrya bati, Tuli bagala babo Ahazĩa, tukandagala erĩyakerya abana bʼomwami nʼabana bʼomugole.

¹⁴Neryo Yehũ mwabũga ati, Muhambebo ibaneho. Neryo mobahambabo ibaneho, mobĩtĩrabo oko kyũna kyʼenyũmba yʼerĩtwĩramo obweya bwʼesyombũlĩ, abalume makũmĩ ani nʼababiri; mwatasĩga nʼomuguma wa kubo.

¹⁵Abere abĩlũaho mwahĩndana na Yehonadabũ mugala wa Rekabũ akasyahĩndana naye; neryo mwamũkerya mwamũbũlya ati, Omutima wawe analungukere ngoko mutima wage ali haguma nʼomutima wawe kwehĩ? Na Yehonadabũ mwamũsũbĩrya ati, Ali atya. Neryo Yehũ mwabũga ati, Amabya atya, Umba ebyala byawe. Naye mwamuha ebyala biwe; neryo mwamwĩkalya omo galĩ haguma naye.

¹⁶Neryo Yehũ mwabũga ati, Wase haguma nage, ulangire obũha bwage busana nʼOmwami Mukulu. Neryo mwamũgendya omo galĩ yiwe.

¹⁷Neryo omugulu ahĩka eSamarĩa, mwĩta abosĩ abasaka uku Ahabũ eSamarĩa, erĩhĩka aho amabĩmũherya, ngʼekĩnywa kyʼOmwami Mukulu, ekyo abwira Elĩya.

¹⁸Neryo Yehũ mwahĩndanĩa abandu bosĩ bo haguma, mwabwirabo ati, Ahabũ mwakolera Baalĩ yo hake, nĩkwa Yehũ asyamukolera kutsibu.

¹⁹Neryo lino mumbirikirire abamĩnyererĩ bosĩ ba Baalĩ, abakamũramaya bosĩ, nʼabahererĩ buwe bosĩ; Sihabye nʼomuguma oyũkasĩgala; kusangwa ngwite obuhere bunene bwʼerihongera Baalĩ; oyo wasyabula eyo, siendisyabyaho. Nĩkwa Yehũ mwakola atya nʼobũgobya atoke erĩherya abakaramaya Baalĩ.

²⁰Na Yehũ mwabũga ati, Mubirikire erĩhĩndana lĩbũyĩrĩre busana na Baalĩ. Neryo mobatũlaganĩago.

²¹Na Yehũ mwatumira oko Baĩsraelĩ bosĩ, nʼabaramya bosĩ ba Baalĩ mobasa, mohatasĩgala omundu nʼomuguma oyũtahĩka. Neryo mobingira omo nyũmba ya Baalĩ; nʼenyũmba ya Baalĩ moyũsũla mobatsungana omosĩ.

²²Neryo Yehũ mwabwira oyo wabya mũbĩkĩ wʼesyongimba ati, Ũhũlũkaye esyongimba busana nʼabosĩ abakaramaya Baalĩ. Neryo mwaleterabo esyongimba.

²³Neryo Yehũ na Yehonadabũ mugala wa Rekabũ mobaya omo nyũmba ya Baalĩ; neryo mwabwira abaramaya Baalĩ, ati, Mũsonda-sondaye, mũlebaye hano Sihabye nʼomuguma wʼabagombe bʼOmwami Mukulu haguma nenyũ, ba nʼabo abakaramaya Baalĩ ĩbobene.

²⁴Neryo mobingira erihera esyohongo nʼamahere wʼerĩokererya. Neryo Yehũ mwayĩhĩrĩra eyĩhya bandu makũmĩ munani, mwabwirabo ati, Omundu muguma wʼoko bandu abo ngahĩra omo byala byenyũ amabala, oyũkamũbalaya, engebe yiwe yasyahingana nʼengebe yʼoyo.

²⁵Neryo, abere abibuga erihera obuhere bwʼerĩokererya, Yehũ mwabwira abateya nʼabasondolĩ ati, Mwingire, mwĩtebo. Sihahuluke nʼomuguma. Neryo mobĩtabo omo boya bwʼomũyalĩ; nʼabateya nʼabasondolĩ, mobagusabo eyĩhya, kandi mobahĩka oko mũyĩ wʼenyũmba ya Baalĩ.

²⁶Mobalũsya esyondũyĩ esyabya omo nyũmba ya Baalĩ, mobahĩsyasyo.

²⁷Kandi mobatulanga endũyĩ ya Baalĩ, kandi mobaterya enyũmba ya Baalĩ, mobayirayo mo bwiga erĩhĩka mũnabwĩre.

²⁸Ye Yehũ kwʼaheraya Baalĩ yʼatya eribugayo omo Baĩsraelĩ.

²⁹Nĩkwa Yehũ mwataleka erikwama ebibi bya Yeroboamũ mugala wa Nebatĩ ebyo akosesayamo Ĩsraelĩ, mwataleka erikwamabyo, bye byana byʼende byʼesyamagetsi ebyabya eBetelĩ nʼeDanĩ.

³⁰Neryo Omwami Mukulu mwabwira Yehũ ati, Kusangwa wabirikola ndeke erĩberererya ekitunganene omo meso wage, iwabirikolera ekĩtũnga kya Ahabũ ngʼebyosĩ byabya omo mutima wage, abagala bawe basyĩkala oko kĩtũmbĩ kyʼobwami kyʼeĨsraelĩ erĩhĩka oko lulengo lwʼakani.

³¹Nĩkwa Yehu mwatateya nʼomutima wuwe gosĩ erirendera omo migambo yʼOmwami Mukulu Nyamuhanga wʼeĨsraelĩ; mwataleka ebibi bya Yeroboamũ, ebyo akosesayamo Abaĩsraelĩ.

³²Nʼomo biro ebyo, Omwami Mukulu mwatsũka erĩĩta Abaĩsraelĩ; na Hazaelĩ mwĩtĩrabo omo mitano yosĩ yʼeĨsraelĩ,

³³erĩtsũka eYorodanĩ erĩlolya endata eyo eryuba likasira, ekihugo kyosĩ kyʼeGĩleadĩ, nʼekya Gadĩ, nʼekya Rũbenĩ, nʼekya Manase, erĩtsũka eRoerĩ, ekiri hakũhĩ nʼomusya wʼeArnonĩ, erĩhĩka eGĩleadĩ nʼeBasanĩ.

³⁴Neryo eyindi mĩbĩrĩ ya Yehũ, nʼebyosĩ akola nʼobũbangĩ buwe, sĩbĩsakĩre omo Kitabu kyʼemyatsi yʼeMigulu yʼabami ba Ĩsraelĩ kwehĩ?

³⁵Neryo Yehũ mweya abĩse-kulu buwe; mobamuta eSamarĩa. Na Yehoahazĩ mugala wuwe mwabya mwami omo mwanya wuwe.

³⁶Nʼemigulu Yehũ atabala oko Ĩsraelĩ eSamarĩa yabya myaka makũmĩ abiri na munani.