Read nande 2 Abami 13 Bible Online

2 Abami 13 - nande bible

2 Abami 13

¹Oko mwaka wʼamakũmĩ abiri nʼeyĩsatu wa Yoasĩ mugala wa Ahazĩa, omwami wʼeYũda, Yoahazĩ mugala wa Yehũ mwatsũka eribya mwami oko Ĩsraelĩ eSamarĩa, mwatabala emyaka erĩkũmĩ nʼeyirinda.

²Naye mwakola ekyabya kibi omo meso wʼOmwami Mukulu, kandi mwakwama ebibi bya Yeroboamũ, mugala wa Nebatĩ, ebyo akosesayamo Ĩsraelĩ; mwatalekabyo.

³Neryo erihitana lyʼOmwami Mukulu molyaka oko Baĩsraelĩ, neryo mwahĩrabo omo byala bya Hazaelĩ omwami wʼeSũrĩa, nʼomo byala bya Benĩ-Hadadĩ mugala wa Hazaelĩ ebiro byosĩ.

⁴Kandi Yoahazĩ mwalakira Omwami Mukulu, neryo Omwami Mukulu mwamowa kusangwa alangira erinuba lya Ĩsraelĩ, ngoko mwami wʼeSũrĩa anũbayabo.

⁵Neryo Omwami Mukulu mwaha Ĩsraelĩ yʼomũlamya, kyaleka ĩbalũa omo byala byʼAbanya Sũrĩa; nʼabana ba Ĩsraelĩ mobĩkala omo mahema wabo ngʼerĩmbere.

⁶Nĩkwa mobataleka ebibi byʼekĩtũnga kya Yeroboamũ, ebyo akosesayamo Ĩsraelĩ, nĩkwa mobalendera mubyo; nʼeAsera molwasĩgala ilunahangene eSamarĩa nibya.

⁷Kusangwa mwatasĩgĩra Yoahazĩ yʼabandu ba nʼabali oko syosabayĩrĩ makũmĩ atanu, nʼesyogalĩ ĩkũmĩ, nʼabandu bakagenda omo bisando elfu ĩkũmĩ; kusangwa omwami wʼeSũrĩa mwaheryabo, kandi mwayirabo ngʼolũtũtũ lwʼekĩhũmbĩro.

⁸Nʼeyindi mĩbĩrĩ ya Yoahazĩ, nʼebyosĩ akola, nʼamaka wuwe, sĩbĩsakĩre omo kitabu kyʼemyatsi yʼemigulu yʼabami bʼeĨsraelĩ kwehĩ?

⁹Neryo Yoahazĩ mweya abotata-kulu buwe; mobamuta eSamarĩa; na Yoasĩ mugala wuwe mwabya mwami omo mwanya wuwe.

¹⁰Oko mwaka wʼamakũmĩ asatu nʼeyirinda wa Yoasĩ omwami wʼeYũda, Yoasĩ mugala wa Yoahazĩ mwatsũka eribya mwami oko Ĩsraelĩ eSamarĩa, neryo mwatabala emyaka erĩkũmĩ nʼendatu.

¹¹Naye mwakola ekyabya kibi omo meso wʼOmwami Mukulu; mwataleka ebibi byosĩ bya Yeroboamũ mugala wa Nebatĩ, ebyo akosesayamo Ĩsraelĩ; nĩkwa mwalendera mubyo.

¹²Neryo eyindi mĩbĩrĩ ya Yoasĩ, nʼebyosĩ akola, nʼamaka wuwe ago alwamo na Amazĩa omwami wʼeYũda, sĩbĩsakĩre omo kitabu kyʼemyatsi yʼabami ba Ĩsraelĩ kwehĩ?

¹³Neryo Yoasĩ mweya abotata-kulu buwe; na Yeroboamũ mwĩkala oko kĩtũmbĩ kiwe kyʼobwami; na Yoasĩ mwatabwa eSamarĩa haguma nʼabami ba Ĩsraelĩ.

¹⁴Nĩkwa omugulu Elĩsa abya alwere endwala eyamũholaya, Yoasĩ omwami wa Ĩsraelĩ mwandagalira ewa Elĩsa erimulirira, ati, Tata wage, tata wage, esyogalĩ sya Ĩsraelĩ, nʼabakagendaya esyosabayĩrĩ syayo!

¹⁵Neryo Elĩsa mwamubwira ati, Wĩmaye obuta nʼemisoha. Neryo mwayĩmĩrya obuta nʼemisoha.

¹⁶Neryo Elĩsa mwabwira omwami wʼeĨsraelĩ, ati, Ũhĩre ebyala byawe byʼoko buta. Neryo mwahĩra ebyala biwe kubo. Na Elĩsa mwahĩra ebyala biwe oko byala byʼOmwami.

¹⁷Neryo mwabũga ati, Kingula erĩdĩrĩsa eyo eryuba likasira; naye mwakingulalyo. Neryo Elĩsa mwabũga ati, Lasa, naye mwalasa. Neryo mwabũga ati, Omusoha wʼOmwami Mukulu wʼerĩkĩnda, go musoha wʼerĩkĩnda eSũrĩa; kusangwa wasyĩta Abasũrĩa eAfeke, erĩhĩka aho wasyatĩndĩrabo.

¹⁸Kandi mwabũga ati, Wĩmaye emisoha; naye mwĩmyayo. Neryo mwabwira omwami wʼeĨsraelĩ ati, Ũswĩraye oko kitaka, naye mwaswĩryaho kasatu, neryo mũmbya.

¹⁹Nʼomundu wa Nyamuhanga mwamuhitanako, mwabũga ati, Kumbe ũlĩaswĩrayakyo ngendo ĩtanu kutse ndatu; wangaherĩrye eSũrĩa erĩhĩka okwʼibugabo; nĩkwa lino ũkandĩsyĩta eSũrĩa ngendo ĩsatu nyisa.

²⁰Neryo Elĩsa mwahola, neryo mobamuta. Nĩkwa okwʼĩtsũka lyʼomwaka, emilondo yʼAbamoabũ babya bakingira omo kihugo erĩhũnga.

²¹Neryo babere bakata omundu, neryo, mobalangira omulondo owakahũnga, neryo mobagusa omundu oyo yʼomwʼisinda ya Elĩsa. Neryo omugulu omundu oyo ayĩtũlaya oko makũha wa Elĩsa, mwasuba, mwimana omo bisando biwe.

²²Nĩkwa Hazaelĩ omwami wʼeSũrĩa mwanũbya Ĩsraelĩ ebiro byosĩ bya Yoahazĩ.

²³Nĩkwa Omwami Mukulu mwaganyirabo, mwakwĩrabo olukogo, kandi mwakeberabo busana nʼendagano yiwe haguma na Abrahamũ, na Ĩsaka, na Yakobo, ĩsĩanzĩre erĩheryabo, kutse erigusabo erĩlũa embere siwe erĩhĩka na lino.

²⁴Omugulu Hazaelĩ omwami wʼeSũrĩa ahola, Benĩ-Hadadĩ mugala wuwe mwabya mwami omo mwanya wuwe.

²⁵Na Yoasĩ mugala wa Yoahazĩ mwaswĩmya omo byala bya Benĩ-Hadadĩ mugala wa Hazaelĩ emĩyĩ eyo ahũnga omo byala bya tata wuwe ye Yoahazĩ omo malwa. Yoasĩ mwamũkĩnda ngendo ĩsatu, mwasũbũlya emĩyĩ ya Ĩsraelĩ.