Read nande 2 Abami 14 Bible Online

2 Abami 14 - nande bible

2 Abami 14

¹Omo mwaka wʼakabiri wa Yoasĩ mugala wa Yoahazĩ omwami wʼeĨsraelĩ, Amazĩa mugala wa Yoasĩ omwami wʼeYũda mwabya mwami.

²Amazĩa abya wʼemyaka makũmĩ abiri nʼeyĩtanu omugulu atsũka eribya mwami, neryo mwatabala emyaka makũmĩ abiri nʼomwenda eYerũsalema; nʼerĩna lya koyo wuwe lyabya Yehoadĩnĩ wʼeYerũsalema.

³Kandi mwakola ebyabya bibuya omo meso wʼOmwami Mukulu, nĩkwa butsira nga tata wuwe Dawĩdĩ; mwakola ngʼebyosĩ ebyo tata wuwe Yoasĩ akola.

⁴Nĩkwa ahendata mohatalũsĩbwaho; abandu ibakinahonga nʼerĩhĩsya obukwa oko hendata.

⁵Neryo obwami bwabere bwabĩsĩka omo byala biwe, mwĩta abagombe buwe abĩta omwami tata wuwe.

⁶Nĩkwa mwatĩta abana bʼabĩtĩ; ngʼekyasakawa omo kitabu kyʼEmigambo ya Musa, ngoko Mwami Mukulu ahana ati, Abotata sĩbesyĩtawa busana nʼabana, kutse abana sĩbesyĩtawa busana nʼabotata; nĩkwa obuli mundu asyahola busana nʼebibi biwe ĩyowene.

⁷Mwĩta oko Baedomũ abandu elfu ĩkũmĩ (10,000) omo Musya wʼOmũnyũ, kandi mwahũnga eSela omo malwa, mwahula erĩna lyago mo Yĩkĩtelĩ nʼerĩhĩka mũnabwĩre.

⁸Neryo Amazĩa mwatuma abakwenda uku Yoasĩ, mugala wa Yoahazĩ, mugala wa Yehũ, omwami wa Ĩsraelĩ, ati, tulolaneko omo bũsũ nʼobũsũ.

⁹Na Yoasĩ omwami wʼeĨsraelĩ mwatuma uku Amazĩa omwami wʼeYũda, ati, Omusakisaki owabya eLebanonĩ mwatuma oko mũerezĩ owabya eLebanonĩ, ati, Uhe mwali wawe eribya mwalĩana wage. Nĩkwa enyama yʼomolĩ eyabya eLebanonĩ moyalabaho moyalyatira omusakisaki oyo wʼahisi.

¹⁰Wabĩrĩkĩnda Edomũ kwenene, nʼomutima wawe abiriyiheka. Utsemere olukengerwa lwawe, Wĩkale eka wawe; kusangwa busana nakĩ ukayiretera obũlĩge, uti ũkwe, uwe, na Yũda haguma kwehĩ?

¹¹Nĩkwa Amazĩa mwagana erĩowa. Neryo Yoasĩ omwami wʼeĨsraelĩ mwahetukirayo; neryo iye na Amazĩa omwami wʼeYũda mobasamalirana obũsũ oko bũsũ eBetĩ-semesĩ, omũyĩ owabya wa Yũda.

¹²Neryo Ĩsraelĩ mwakĩnda Yũda; neryo mobatibita obuli mundu omo hema yiwe.

¹³Neryo Yoasĩ omwami wa Ĩsraelĩ mwahamba Amazĩa omwami wa Yũda, mugala wa Yoasĩ omugala wa Ahazĩa, eBetĩ-semesĩ, neryo mwahĩka eYerũsalema, mwaterya olũhĩmbo lwʼeYerũsalema erĩtsũka oko lũkyo lwa Efũraĩmũ erĩhĩka oko lũkyo lwʼenũnga, metere hakũhĩ nʼamagana abiri.

¹⁴Kandi mwĩmya esyamagetsi syosĩ nʼebĩtsĩpa, nʼebindu byosĩ ebyabanika omo nyũmba yʼOmwami Mukulu, nʼomo mbĩso yʼenyũmba yʼOmwami, nʼabandu abanyegawa nibya, neryo mwasuba eSamarĩa.

¹⁵Neryo eyindi mĩbĩrĩ ya Yoasĩ eyo akola, nʼamaka wuwe, ngoko alwa na Amazĩa omwami wa Yũda, sĩbĩsakĩre omo kitabu kyʼemyatsi yʼemigulu yʼabami ba Ĩsraelĩ kwehĩ?

¹⁶Neryo Yoasĩ mweya abotata-kulu buwe, mwatabwa eSamarĩa haguma nʼabami ba Ĩsraelĩ; na Yeroboamũ mugala wuwe mwabya mwami omo mwanya wuwe.

¹⁷Neryo Amazĩa mugala wa Yoasĩ omwami wa Yũda mwabyaho enyũma wʼoluholo lwa Yoasĩ mugala wa Yoahazĩ omwami wʼeĨsraelĩ emyaka erĩkũmĩ nʼeyĩtanu.

¹⁸Neryo eyindi mĩbĩrĩ ya Amazĩa sĩyĩsakĩre omo kitabu kyʼemyatsi yʼemigulu yʼabami ba Yũda kwehĩ?

¹⁹Neryo mobaya embĩta busana na Amazĩa eYerũsalema; naye mwatibita eLakĩsĩ! nĩkwa mobamutumako eLakĩsĩ, mobamwĩtĩrayo.

²⁰Neryo mobamuleta oko syosabayĩrĩ; neryo mwatabwa eYerũsalema eyiri abotata-kulu buwe omo mũyĩ wa Dawĩdĩ.

²¹Nʼabandu bosĩ ba Yũda mobĩmya Azaria, oyo wabya wʼemyaka erĩkũmĩ nʼendatu, mobamuyira mo mwami omo mwanya wa tata wuwe Amazĩa.

²²Naye mwaswahĩmba eElatĩ, mwasũbyago eYũda, omwami abĩeya abotata-kulu wuwe.

²³Oko mwaka wʼerĩkũmĩ nʼeyĩtanu wa Amazĩa mugala wa Yoasĩ omwami wʼeYũda, Yeroboamũ mugala wa Yoasĩ omwami wa Ĩsraelĩ mwabya mwami eSamarĩa, neryo mwatabala emyaka makũmĩ ani nʼomuguma.

²⁴Naye mwakola ekyabya kibi omo meso wʼOmwami Mukulu; mwataleka ebibi byosĩ bya Yeroboamũ mugala wa Nebatĩ, ebyo akosesayamo Ĩsraelĩ.

²⁵Naye mwasũbya Omutano wa Ĩsraelĩ erĩtsũka ahʼeriingirira eHamatĩ nʼe rĩhĩka oko ngetsi ya Araba, ngʼekĩnywa kyʼOmwami Mukulu, Nyamuhanga wa Ĩsraelĩ ekyo abũga oko mugombe wuwe Yona mugala wa Amĩtaĩ, omũmĩnyererĩ oyo wabya wʼeGatĩ-Heferĩ.

²⁶Kusangwa Omwami Mukulu mwalangira amalĩge wa Ĩsraelĩ kwʼabya akalĩre; kusangwa sihabya oyũbohĩre kutse oyuli bwĩranda, kutse sihabya omũwatĩkya busana na Ĩsraelĩ.

²⁷Kandi Omwami Mukulu mwatabũga ati akandisyasangula erĩna lya Ĩsraelĩ eyĩkwa oko bũtũkũ; nĩkwa mwalamyabo omo byala bya Yeroboamũ mugala wa Yoasĩ.

²⁸Neryo eyindi mĩbĩrĩ ya Yeroboamũ, nʼebyosĩ akola, nʼamaka wuwe, ngoko alwa, kandi ngoko asũbaya oko Ĩsraelĩ eDamasekĩ nʼeHamatĩ, eyabya oko Yũda erĩmbere, sĩbĩsakĩre omo kitabu kyʼemyatsi yʼabami ba Ĩsraelĩ kwehĩ?

²⁹Na Yeroboamũ mweya abĩse-kulu buwe, abami ba Ĩsraelĩ; na Zakarĩa mugala wuwe mwabya mwami omo mwanya wuwe.