Read nande 2 Abami 2 Bible Online

2 Abami 2 - nande bible

2 Abami 2

¹Neryo omugulu Omwami Mukulu asonda eritwala Elĩya yʼelubula omo kanyabungu, neryo Elĩya mwalũa eGĩlĩgalĩ haguma na Elĩsa.

²Neryo Elĩya mwabwira Elĩsa ati, Watasĩgala hano kusangwa Omwami Mukulu abirinyituma eriya eBetelĩ. Na Elĩsa mwabũga ati, Ngoko Mwami Mukulu aliho, kandi ngoko uwe uliho, sindiendĩkũsĩganĩa. Neryo mobandagalira eBetelĩ yo batya.

³Neryo abagala bʼabamĩnyererĩ ababya eBetelĩ mobahulukira Elĩsa, mobamubwira bati, Ũnasĩ ngoko Mwami Mukulu akanditwala omukama wawe erĩkũlũsya yoko mũnabwĩre kwehĩ? Naye mwabũga ati, Ega, nyĩnasĩ; mubye bũkũtũ.

⁴Neryo Elĩya mwamubwira ati, Elĩsa, kĩsĩ-kĩsĩ nyiti ũsĩgale hano; kusangwa Omwami Mukulu abirinyituma eYerĩko. Naye mwabũga ati, Ngoko Mwami Mukulu aliho, kandi ngoko nawe uliho, sĩndĩendĩkũsĩgalako. Ko bahĩka eYerĩko yo batya.

⁵Kandi abagala bʼabamĩnyererĩ ababya eYerĩko mobahĩka hakũhĩ na Elĩsa, mobamubwira bati, Ũnasĩ ko Mwami Mukulu akanditwala omukama wawe erĩkũlũsya yoko mũnabwĩre kwehĩ? Naye mwasũbĩrya ati, Nyĩnasĩ; mubye bũkũtũ.

⁶Neryo Elĩya mwamubwira ati, Kĩsĩ-kĩsĩ nyiti ũsĩgale hano; kusangwa Omwami Mukulu abirinyituma eYorodanĩ. Neryo Elĩsa mwabũga ati, Ngoko Mwami Mukulu aneho, kandi ngoko nawe uneho, sĩndĩendĩkũsĩgalako. Neryo abosĩ babiri mobalolya embere.

⁷Nʼabandu makũmĩ atanu bʼoko bagala bʼabamĩnyererĩ mobayahangana eyisirya kubo; nabo ababiri mobahangana oko mũsĩke wʼeYorodanĩ.

⁸Neryo Elĩya mwahamba erĩkotĩ riwe mwalĩngalyo, neryo mwaswĩrya lyʼomo magetsi, nago mwagabana eyĩ nʼeyĩ, kyaleka ibasoka oko kitaka kyũmĩre.

⁹Neryo babere babisoka, Elĩya mwabwira Elĩsa ati, Ũbũlaye ekyo nangakukolera, nde nalũsĩbwa ukʼuwe, neryo Elĩsa mwabũga, ati, Kĩsĩ-kĩsĩ nyiti, Erĩgabo lyʼekĩrĩmũ kyawe linyibyeko kabiri.

¹⁰Neryo Elĩya mwabũga ati, Wamabũlya omwatsi akalĩre; nĩkwa wamanyilolako omugulu ngalũsĩbawa ukʼuwe, lyasyakubyako litya; nĩkwa bite bitya isiryendibya litya.

¹¹Neryo, babere bakalolya embere, ĩbanemũkanĩranĩa, lebaya, mohabutuka egalĩ yʼomuliro, nʼesyosabayĩrĩ syʼomuliro mosyagababo kabiri; na Elĩya mwahetukira elubula omo kanyabungu.

¹²Na Elĩsa mwalangira, mwabirikira ati, Tata wage, tata wage, esyogalĩ sya Ĩsraelĩ nʼabakagenda oko syosabayĩrĩ syasyo! Neryo mwataswamulolako; neryo mwahamba esyongimba siwe mwasatyasyo mo bihande bibiri.

¹³Neryo mwĩmya erĩkotĩ rya Elĩya eryamutogako, neryo mwasubula mwahangana oko mũsĩke wʼeYorodanĩ.

¹⁴Neryo mwahamba erĩkotĩ rya Elĩya eryamutogako mwaswĩrya lyʼoko magetsi, mwabũga ati, Omwami Mukulu, Nyamuhanga wa Elĩya ali hahi kwehĩ? Neryo abere abĩswĩrya oko magetsi, neryo amagetsi mwagabana eyĩ nʼeyĩ; neryo Elĩsa mwasoka.

¹⁵Neryo omugulu abagala bʼabamĩnyererĩ ababya eYerĩko eyisirya, babere bamulolako, mobabũga bati, Ekĩrĩmũ kya Elĩya kĩkere uku Elĩsa. Neryo mobasa erĩhĩndana naye, mobũnamira ahisi embere siwe.

¹⁶Mobamubwira bati, Lebaya lino, hali balume esyombangĩ makũmĩ atanu abali haguma nʼabagombe bawe; kĩsĩ-kĩsĩ uleke bagende bayasondaye omukama wawe; kwamũhwa Omũlĩmũ wʼOmwami Mukulu abirimusumba, nʼerimugusa oko kitwa, kutse omo musya. Naye mwabũga ati, simusyetumabo.

¹⁷Nĩkwa omugulu bamuhatikana mwakwa esĩsonĩ, mwabũga ati, Mutume. Neryo mobatuma abandu makũmĩ atanu; nabo mobamusonda-sonda ebiro bisatu, nĩkwa mobatamubana.

¹⁸Neryo mobasuba aho ali, omugulu akinalindirira eYerĩko; neryo mwabwirabo ati, Mondababwira nyiti, Simugende kwehĩ?

¹⁹Nʼabandu bʼomũyĩ oyo mobabwira Elĩsa bati, Lebaya, tuti ahali omũyĩ oyũ howene, ngoko mukama wage amabilangira; nĩkwa amagetsi ni mabi, nʼekitaka sĩkĩryeraya ebyalya byo ndeke.

²⁰Naye mwabũga ati, Mundetere erĩrega lihya-lihya, mũhĩre mulyo mʼomũnyũ. Nabo mobamuleteralyo.

²¹Naye mwaya eyiri engũnũnũko yʼamagetsi, mwagusa muyo mʼomũnyũ, mwabũga ati, Omwami Mukulu akabũga ati, Nabĩrĩlamya amagetsi aya; sihendisyaswahuluka oluholo kutse erĩtesya.

²²Litya amagetsi abĩrĩlamĩbwa erĩhĩka mũnabwĩre, ngʼekĩnywa kya Elĩsa ekyo abũga.

²³Neryo mwalũayo mwahetukira eBetelĩ, neryo abere anemugenda omo nzira, abalwana abakalũa omo mũyĩ mobahĩkaho mobamũsekererya, mobamubwira bati, Hetuka, uwe wʼoluhala! Uhetuke uwe wʼoluhala!

²⁴Neryo mwakebera enyũma mwalangirabo, mwatsumabo oko lĩna lyʼOmwami Mukulu. Neryo mohahuluka esyodubu ĩbĩrĩ syʼobũkalĩ sĩkalũa omo mũsĩtũ, mosyatulanga abalwana makũmĩ ani nʼababiri ba kubo.

²⁵Neryo Elĩsa mwalũayo mwaya oko kitwa kyʼeKaramelĩ, nʼerĩlũa eyo mwasuba eSamarĩa.