Read nande 2 Abami 4 Bible Online

2 Abami 4 - nande bible

2 Abami 4

¹Neryo omũkalĩ muguma oko bakalĩ bʼabagala bʼabamĩnyererĩ mwalakira Elĩsa, ati, Omugombe wawe ĩbage abirihola; nawe ũnasĩ ngoko mugombe wawe abya akakenga Omwami Mukulu; neryo omũbwekĩ amasa eritwala abana bage babiri eribya bakobe buwe.

²Neryo Elĩsa mwamũbũlya ati, Nyikukolerekĩ kwehĩ? Umbwire, uwitekĩ omo nyũmba kwehĩ? Naye mwabũga ati, Omugombe wawe wʼobũkalĩ siawite kindu omo nyũmba, ka nʼakalega kʼamagũta.

³Neryo Elĩsa mwabũga ati, Genda, uyibweke amalega ehandi oko balĩkyenyũ, amalega wʼemikongoto; suyibweke make.

⁴Neryo wasyingira, iwayikingira Olũyĩ enyũma kuwe, uwe nʼabagala bawe, ĩgũtũlĩra omo malega gosĩ ayo; kandi Wasyahĩra oko mũsĩke awabĩrĩũsũla.

⁵Neryo mwamũsĩga mwayikingira iye nʼabagala buwe; nabo mobamuletera amalega, naye mũtũlĩra mugo.

⁶Neryo amalega abere abyũsũla, mwabwira mugala wuwe ati, Unyiretere erindi rĩrega. Naye mwamubwira ati, Sihakiri erindi rĩrega. Neryo amagũta mũmbya.

⁷Neryo mwasa mwabwira omundu wa Nyamuhanga. Neryo mwabũga ati, Ugende ũyagũlaye amagũta, ũtũhe omwĩnda wawe, nʼawakasaka mulyego uwe nʼabagala bawe.

⁸Neryo ekiro kiguma Elĩsa mwalabira eSũnemũ, ahabya omũkalĩ oyukakengawa; naye mwamubirikira okwʼirya akalyo. Neryo emigulu yosĩ alabayo Elĩsa mwingiraho erirya akalyo.

⁹Neryo omũkalĩ oyo mwabwira ĩba wuwe ati, Lebaya, ngaminya ngoko mundu oyũ akalaba hano emigulu yosĩ ni mundu ũbũyĩrĩre wa Nyamuhanga.

¹⁰Kĩsĩ-kĩsĩ nyiti, Tũmũhĩmbĩre akanyũmba kake oko lũhĩmbo; tũhĩremo engyingo busana naye, nʼemesa, nʼekĩtũmbĩ, nʼekihambiriro kyʼetala; neryo omugulu akahĩka, asyingiramo.

¹¹Neryo oko kiro kiguma Elĩsa mwahĩkaho, mwingira omo kanyũmba ako, mwagotseraho.

¹²Neryo mwabwira Gehazĩ, omugombe wuwe, ati, Ubirikire Omũsũnemũ oyũ, neryo abere abimubirikira, mwahangana embere siwe.

¹³Neryo Elĩsa mwamubwira ati, Umubwire uti, Lebaya, wabĩrĩtũwatĩkya nʼerĩwatĩkya lyosĩ erĩ; ni kyahi ekyo wangakolerwa kwehĩ? Wanzĩre ekĩnywa kĩbũgawe embere syʼOmwami, kutse oko mukulu wʼemilondo kwehĩ? Naye mwasũbĩrya ati, Nyĩkere omo katĩkatĩ kʼabandu betu.

¹⁴Neryo mwabũga ati, Neryo akolerawekĩ kwehĩ? Na Gehazĩ mwasũbĩrya ati, Kwenene siawite mugala, nʼĩba wuwe nĩ mũsyakulu.

¹⁵Neryo mwabũga ati, Umubirikire. Neryo abere abimubirikira, omũkalĩ mwahangana omo lũkyo.

¹⁶Neryo Elĩsa mwabũga ati, Oko mugulu oyũ oko gundi mwaka, wasyatambika omugala. Naye mwabũga ati, Iyihi, mukama wage, uwe mundu wa Nyamuhanga subihire omugombe wawe wʼobũkalĩ.

¹⁷Nʼomũkalĩ oyo mwaheka obukule, mwabuta omugala oko kirimo ekyo oko gundi mwaka, ngoko Elĩsa amubwira.

¹⁸Neryo omwana oyo abere abikula, ekiro kiguma mwaya eyiri tata wuwe eyiri abagesĩ.

¹⁹Neryo mwabwira tata wuwe ati, Omutwe wage, omutwe wage. Naye mwabwira omugombe wuwe ati, Umutwale eyiri koyo wuwe.

²⁰Neryo abere abimuheka, mwamuletera nyĩnya wuwe, neryo mwĩkala oko marwĩ wuwe erĩhĩka omwʼitungi, neryo mwahola.

²¹Neryo omũkalĩ mwahetuka mwamũgotserya oko ngyingo yʼomundu wa Nyamuhanga, neryo mwamukingiramo, mwalũaho.

²²Neryo mwabirikira ũkwʼĩba wuwe mwabũga ati, Ngakũbũlaya nyiti, Unyitumire omuguma gʼoko bagombe, nʼepunda nguma inatoka eritibita eyiri omundu wa Nyamuhanga, nʼeriswasa.

²³Naye mwabũga ati, Ukaya eyo ali mũnabwĩre busana nakĩ kwehĩ? Si mukera muhya-muhya kutse Sabato. Naye mwabũga ati, Kyasyabya buholo.

²⁴Neryo mwategekanĩa epunda, mwabwira omugombe wuwe ati, Ũgendayeyo, ulole embere; sulinde omo nzira, ndetakubwira.

²⁵Neryo mwagenda atya, mwahĩka eyiri omundu wa Nyamuhanga oko kitwa kyʼeKaramelĩ. Neryo, omugulu omundu wa Nyamuhanga amulangira iniakine hali, mwabwira Gehazĩ omugombe wuwe ati, Lebaya! Omũsũnemũ yolya.

²⁶Kĩsĩ-kĩsĩ utibite erĩyahĩndana naye, umubwire uti, Nina buholo ukʼuwe kwehĩ? Nina buholo nʼukwʼĩbawe kwehĩ? Nina buholo nʼoko mwana kwehĩ? Naye mwasũbĩrya ati, Ni buholo.

²⁷Neryo abere ahĩka oko mundu wa Nyamuhanga oko kitwa, mwahamba oko bisando biwe. Na Gehazĩ mwahĩka hakũhĩ erĩmũlũsyaho; nĩkwa omundu wa Nyamuhanga mwabũga ati, Umuleke; kusangwa omutima wuwe akagalawa omwisi wuwe; nʼOmwami Mukulu abĩrĩmbĩsago, kandi sialitambwira.

²⁸Neryo omũkalĩ mwabũga ati, Ĩngye nasondaya omugala oko mukama wage kwehĩ? Mondabũga nyiti, Sunyitebe kwehĩ?

²⁹Neryo mwabwira Gehazĩ ati, Wanguhe, wĩmaye omũtso wage omo byala byawe, uyigendere; Wamahĩndana nʼomundu sũmũbũkaye; nʼomundu amakũbũkya sũmũsũbĩraye; kandi ũhĩre omũtso wage oko bũsũ bʼomwana.

³⁰Na koyo wʼomwana mwabũga ati, Ngoko Mwami Mukulu aneho, kandi nawe ngoko uneho, sindiendĩkũsĩganĩa. Neryo Elĩsa mwahangana, mwamukwama.

³¹Na Gehazĩ mwalabira embere syabo, mwahĩra omũtso oko bũsũ bʼomwana; nĩkwa isihali mulenge kutse erĩowa. Neryo mwasubula erĩhĩndana naye, mwamubwira ati, Omwana sialitabuka.

³²Neryo Elĩsa abere ahĩka omo nyũmba, lebaya omwana iniabirihola, iniagotsere oko ngyingo yiwe.

³³Neryo mwingira, mwayikingiramo iye nʼomwana, mwasaba Omwami Mukulu.

³⁴Neryo mwagenda, mwayĩlambamya endata oko mwana, mwahĩra obuno buwe oko buno buwe, nʼameso wuwe oko meso wuwe, nʼebyala biwe oko byala biwe; mwayĩkakĩrya endata wuwe; nʼomubiri wʼomwana mwahũhana.

³⁵Neryo mwasubula, mwagenda-genda omo nyũmba, eyĩ nʼeyĩ; neryo mwasubaho, mwayĩkakĩrya endata kwiye; neryo omũlwana mwatwa etsĩhya ngendo sirinda, neryo omũlwana mwalĩbũla ameso wuwe.

³⁶Neryo Elĩsa mwabirikira Gehazĩ, mwabũga ati, Ubirikire Omũsũnemũ oyũ. Neryo mwamubirikira. Neryo abere abĩhĩka aho ali, mwabũga ati, Heka mugala wawe.

³⁷Neryo omũkalĩ mwahĩkamo, mwawa oko bisando bya Elĩsa; mwayũnamĩrya oko kitaka; neryo mwaheka mugala wuwe, mwahuluka.

³⁸Neryo Elĩsa mwaswahĩka eGĩlgalĩ, neryo habya enzala omo kihugo. Neryo omugulu abagala bʼabamĩnyererĩ babya bĩkere embere siwe, Elĩsa mwabwira omugombe wuwe ati, Ũhĩre enyungu nene yʼoko lĩko, ũhũkĩre abagala bʼabamĩnyererĩ obusara.

³⁹Neryo omuguma mwaya omolĩ erioha esyonyenyĩ, neryo mwabana omũlĩkĩ ogʼomolĩ, neryo moha kugo ebyungululu mũsũlyabyo omo lukimba luwe, neryo mwakũlũka, mwatsũtsangirabyo omo nyungu yʼobusara; kusangwa sibabya basĩbyo.

⁴⁰Neryo mobahũkũlĩra abandu balye. Neryo babere bakalya oko busara obo, mobalaka, bati, Uwe mundu wa Nyamuhanga, oluholo luli omo nyungu. Neryo mobatatoka erirya kubo.

⁴¹Nĩkwa Elĩsa mwabũga ati, Mulete oko yĩsyano. Neryo mwagusayo omo nyungu eyo ati, Mũhũkũlĩre abandu, balye. Neryo mohatabya omwaga omo nyungu.

⁴²Neryo mohahĩka omundu akalũa eBaalĩ-salĩsa, mwaletera omundu wa Nyamuhanga yʼakalyo kʼomutwika, amandu makũmĩ abiri wʼekisusu, nʼamakũndĩ mabisi-bisi wʼengano omo ngunza yiwe. Neryo Elĩsa mwabũga ati, Muhe abandu balye.

⁴³Nʼomugombe wuwe mwabũga ati, Kuti, nyĩhĩre ebĩ embere syʼabandu erĩgana kwehĩ? Nĩkwa Elĩsa mwabũga ati, Uhe byʼoko bandu balye, kusangwa Omwami Mukulu akabũga ati, Basyalya kandi basyasakya ebindi.

⁴⁴Neryo mwahĩrago embere syabo, nabo mobalya, mobasakya nʼebindi, ngʼekĩnywa kyʼOmwami Mukulu.