Read nande 2 Abami 9 Bible Online

2 Abami 9 - nande bible

2 Abami 9

¹Neryo omũmĩnyererĩ Elĩsa mwabirikira omuguma wʼoko bagala bʼabamĩnyererĩ mwamubwira ati, Ubohe embindi yawe, uheke erĩtambya lyʼamagũta erĩ omo byala byawe, ugende eRamotĩ-gĩleadĩ.

²Nʼomugulu ũkandĩhĩkayo, ũsondayeyo Yehũ mugala wa Yehosafatĩ mugala wa Nĩmsĩ, neryo uye omuwe, ũmũhanganaye omo katĩkatĩ kʼabagala babo, umutwale omo ngonde yʼomwisi.

³Neryo wĩmaye erĩtambya lyʼamagũta, wũtũlĩrego oko mutwe wuwe, ũbũge uti, Omwami Mukulu ati, Nabĩrĩkũhakabya amagũta eribya mwami wʼAbaĩsraelĩ. Neryo ukingule Olũyĩ, utibite, sulinde.

⁴Neryo omũlwana omugombe wʼomũmĩnyererĩ oyo mwaya eRamotĩ-gĩleadĩ.

⁵Nʼomugulu ahĩka, lebaya, abakulu bʼemilondo yʼabasĩrĩkanĩ babya bĩkereyo; neryo mwabũga ati, Ngwite kĩnywa ukʼuwe, uwe mukulu. Neryo Yehũ mwabũga ati, Nindi kwĩtwe bosĩ kwehĩ? Naye mwabũga ati, Ukʼuwe, uwe mukulu.

⁶Neryo Yehũ mwahangana, mwingira omo nyũmba; neryo omundu oyo mũtũlĩra amagũta ayo gʼoko mutwe wuwe, mwamubwira ati, Omwami Mukulu, Nyamuhanga wa Ĩsraelĩ akabũga ati, Nabĩrĩkũhakabya amagũta ubye mwami wʼabandu bʼOmwami Mukulu, ba bana ba Ĩsraelĩ.

⁷Nawe wasyĩta ekĩtũnga kya Ahabũ omukama wawe, inatoka erĩkĩsya omusasi wʼabagombe bage abamĩnyererĩ, nʼabagombe bʼOmwami Mukulu abosĩ, omo byala bya Yezebelĩ.

⁸Kusangwa ekĩtũnga kyosĩ kya Ahabũ kyasyahera; nage nasyĩta uku Ahabũ obuli mwana wʼobulume, nʼoyũbohĩrwe, nʼoyũkayĩgenderaya omo Baĩsraelĩ.

⁹Nage nasyayira ekĩtũnga kya Ahabũ ngʼekĩtũnga kya Yeroboamũ mugala wa Nebatĩ, kandi ngʼekĩtũnga kya Baasa mugala wa Ahĩya.

¹⁰Nʼesyombwa syasyalira Yezebelĩ omo kibuga kyʼeYezreelĩ, isihali oyo wasyamuta. Neryo mwakingula Olũyĩ, mwatibita.

¹¹Neryo Yehũ mwahulukira ahali abagombe bʼomukama wuwe; nʼomuguma mwamũbũlya ati, Nina buholo kwehĩ? Ko mũsĩre oyũ aliakwasira busana nakĩ kwehĩ? Naye mwamubwira ati, Ĩnywe mũnasĩ omundu oyũ, nʼebyo abũga.

¹²Nabo mobabũga bati, Ukabiha; utubwire. Naye mwabũga ati, Mwambwira atya nʼatya, ati, Omwami Mukulu ati, Nabĩrĩkũhakabya amagũta eribya mwami wʼeĨsraelĩ.

¹³Neryo mobanguha, obuli mundu mwahamba olukimba luwe, mwĩkalira kulo endata oko kisambiro, mobabuha engubi bati, Yehũ yo Wabere mwami.

¹⁴Neryo Yehũ mugala wa Yehosafatĩ mugala wa Nĩmsĩ mwayisamambula uku Yoramũ. Nĩkwa Yoramũ abya akalwira eRamotĩ-gĩleadĩ, iye nʼAbaĩsraelĩ bosĩ erilwa na Hazaelĩ omwami wʼeSũrĩa,

¹⁵nĩkwa omwami Yoramũ abya iniabirisubula erĩlamĩbwa eYezreelĩ busana nʼebironda ebyo Abanya Sũrĩa bamũhũtalaya, omugulu alwa na Hazaelĩ omwami wʼeSũrĩa. Neryo Yehũ mwabũga ati, Obũ bwamabya bũlengekanĩa bwenyũ, neryo simuleke mundu nʼomuguma akatibita erĩlũa omo mũyĩ, nʼerĩyatũlago eYezreelĩ.

¹⁶Neryo Yehũ mwagenda oko galĩ, mwaya eYezreelĩ; kusangwa Yoramũ abya agotsereyo. Na Ahazĩa omwami wʼeYũda abya iniabiriandagala erilola uku Yoramũ.

¹⁷Nĩkwa omũteya abya inianimene oko nyũmba eyĩsũngũlĩkĩre eYezreelĩ, neryo mwalangira endeko ya Yehũ ikasa, neryo mwabũga ati, Namalangira omulondo. Na Yoramũ mwabũga, ati, Mwĩmaye omuguma oyuli oko sabayĩrĩ, mumutume erĩyahĩndana nabo, abũlaye ati, Nina buholo kwehĩ?

¹⁸Neryo oyuli oko sabayĩrĩ mwayahĩndana naye, neryo mwabũga ati, Omwami akabũlaya ati, Nina buholo kwehĩ? Neryo Yehũ mwabũga ati, Obuholo nĩkĩ kuwe kwehĩ? Ubindukire enyũma kwĩngye. Nʼomũteya mwabũga ati, Omukwenda mwakahĩka kubo, nĩkwa sialitasubula.

¹⁹Neryo mwaswatuma owʼakabiri oko sabayĩrĩ, naye mwahĩka kubo, mwabũga ati, Omwami akabũlaya ati, Nina buholo kwehĩ? Na Yehũ mwasũbĩrya ati, Uwitekĩ mo buholo kwehĩ? Ubindukire enyũma kwĩngye.

²⁰Nʼomũteya mwatũlago ati, Mwakahĩka kubo, nĩkwa sialitasubula; nʼerĩtĩbĩtya egalĩ yiwe liri ngʼerĩtĩbĩtya lya Yehũ mugala wa Nĩmsĩ; kusangwa akagendayayo kutsibu.

²¹Neryo Yoramũ mwabũga ati, Mũtegekanaye egalĩ. Neryo mobategekanĩa egalĩ yiwe. Na Yoramũ omwami wʼAbaĩsraelĩ na Ahazĩa omwami wʼAbayũda mobahongoka, obuli mundu oko galĩ yiwe, mobayahĩndana na Yehũ, mobamweya omo kibuga kya Nabotĩ Omũyezreelĩ.

²²Neryo, omugulu Yoramũ alangira Yehũ, mwabũlya ati, Yehũ, nina buholo kwehĩ? Naye mwamũsũbĩrya ati, Ni buholo bwahi? Omugulu oluteto lwa Yezebelĩ koyo wawe nʼobulagu buwe ni bingi.

²³Na Yoramũ mwabindula egalĩ yiwe mwatibita, mwabwira Ahazĩa ati, Uwe Ahazĩa omwaga aneho!

²⁴Neryo Yehũ mwakakya obuta buwe nʼamaka wuwe gosĩ, mwalasa Yoramũ omo kĩlũma-lũma; neryo omusoha mwahulukira omo mutima wuwe, neryo Yoramũ mwawa omo galĩ yiwe.

²⁵Neryo Yehũ mwabwira omukulu wuwe Bĩdĩkarĩ ati, Umusumbe umuguse omo kibuga kyʼeririma lya Nabotĩ Omũyezreelĩ; kusangwa namibuka ngoko mugulu twagenda haguma nawe nʼerikwama Ahabũ tata wuwe; Omwami Mukulu mwahĩra eriminyerera erĩ ukwʼiye, ati,

²⁶Kwenene monalangĩre mũlĩgolo omusasi wa Nabotĩ, nʼomusasi wʼabagala buwe, Omwami Mukulu atya; kandi nasyakũkĩsya omo kibuga ekĩ, Omwami Mukulu akabũga atya. Neryo lino umusumbe umuguse omo kibuga, ngʼekĩnywa kyʼOmwami Mukulu.

²⁷Nĩkwa omugulu Ahazĩa, omwami wʼAbayũda alangira ekĩ, mwatibita omo nzira yʼeBetĩ-haganĩ. Yehũ mwamukwama, mwabũga ati, Mumulasire oko galĩ; neryo mobamulasira omo bwiruka bwʼeGũrĩ, obuli hakũhĩ nʼeĩbleamũ. Nĩkwa mwatibita eMĩgĩdo, mwaholerayo.

²⁸Nʼabagombe buwe mobamuheka oko galĩ eYerũsalema, mobamuta omwʼisinda yiwe haguma nʼabotata-kulu buwe omo mũyĩ wa Dawĩdĩ.

²⁹Omo mwaka wʼerĩkũmĩ nʼomuguma wa Yoramũ mugala wa Ahabũ, Ahazĩa mwabya mwami oko Yũda.

³⁰Neryo Yehũ abere abĩhĩka eYezreelĩ, Yezebelĩ mwowago; neryo mwahakabya ameso wuwe omo rangĩ, mwasitika omutwe wuwe, mwasamalira eyĩhya omo lĩdĩrĩsa.

³¹Nʼomugulu Yehũ abya akingira omo lũkyo lwʼomũyĩ, Yezebelĩ mwabũlya ati, Uwe Zĩmũrĩ, omwĩtĩ wʼomukama wawe, nina buholo kwehĩ?

³²Na Yehũ mwalolya obũsũ buwe oko lĩdĩrĩsa, mwabũga ati, Nindi oyuli oko luhande lwage kwehĩ? Nindi kwehĩ? Neryo abakulu ababũnĩre babiri kutse basatu mobamusamalira.

³³Neryo Yehũ mwabũga ati, Mumuguse ahisi. Nabo mobamugusa batya ahisi; nʼogundi musasi wuwe mwayĩtsararya oko lũhĩmbo, nʼoko syosabayĩrĩ; na Yehũ mwamulyatangirira omo bisando.

³⁴Kandi abere abingira omo nyũmba, Yehũ mwalya nʼerĩpũlya, neryo mwabũga ati, Mũlebaye omũkalĩ oyo watakirawa, mumute; kusangwa ni mwali wʼOmwami.

³⁵Neryo mobayamuta, nĩkwa mobatamweyaho lye nʼerĩhanga, nʼebisando, nʼebiganza byʼebyala biwe.

³⁶Neryo mobasubula mobamubwira. Naye mwabũga ati, Ekĩ nĩ kĩnywa kyʼOmwami Mukulu ekyo abwira omugombe wuwe Elĩya Omũtĩsĩbe, ati, Omo kitaka kyʼeYezreelĩ esyombwa syasyalya emĩnyokũ ya Yezebelĩ.

³⁷Nʼekĩnda kya Yezebelĩ kyasyabya ngʼamabĩ oko kitaka kyʼekibuga kyʼeYezreelĩ, neryo sĩbendĩsyabũga bati, Oyũ nĩ Yezebelĩ.