Read nande 1 Emyatsi yʼEmigulu 10 Bible Online

1 Emyatsi yʼEmigulu 10 - nande bible

1 Emyatsi yʼEmigulu 10

¹Neryo Abafĩlĩstĩnĩ mobalwa nʼAbaĩsraelĩ; nʼabandu ba Ĩsraelĩ mobasaga Abafĩlĩstĩnĩ, mobawa nʼerĩkwa oko kitwa kyʼeGĩlboa.

²NʼAbafĩlĩstinĩ mobakwamirira Saũlo nʼabagala buwe bo kutsibu; nʼAbafĩlĩstĩnĩ mobĩta Yonatana, na Abĩnadabũ, na Malkĩ-sũa, bagala ba Saũlo.

³Kandi amalwa mwakala kutsibu uku Saũlo, nʼabalasĩ bʼobuta mobamũhĩkako; nʼabalasĩ mobamũhũtalya.

⁴Neryo Saũlo mwabwira omũhekĩ wʼebindu biwe byʼamalwa ati, Kula omũyalĩ wawe, ũnyĩlũbe gomo, abatabwene aba bakasyahĩka nʼerinyiseka. Nĩkwa omũhekĩ wʼebindu biwe byʼamalwa mwagana; kusangwa ubaha kutsibu. Busana nʼekyo, Saũlo mwahamba omũyalĩ wuwe mwawa mugo.

⁵Nʼomugulu omũhekĩ wʼebindu biwe byʼamalwa alangira ngoko Saũlo amabihola, naye nibya mwawa omo mũyalĩ wuwe, neryo mwahola.

⁶Saũlo kwʼahola atya, nʼabagala buwe basatu; nʼekĩtũnga kiwe kyosĩ mobaholera haguma.

⁷Nʼomugulu abandu bosĩ ba Ĩsraelĩ ababya omo musya balangira ngoko bamabitibita, na Saũlo nʼabagala buwe basatu ko bamabihola, mobasĩga emĩyĩ yabo mobatibita; nʼAbafĩlĩstĩnĩ mobasa mobĩkala muyo.

⁸Neryo bwabere bwabya ngyakya, omugulu Abafĩlĩstĩnĩ bahĩka eriambula abĩtawa, mobeya Saũlo nʼabagala buwe ĩbabĩrĩkwĩra oko kitwa kyʼeGĩlboa.

⁹Mobamwambula, mobaheka omutwe wuwe nʼebindu byʼamalwa biwe, mobatumabyo omo kihugo kyʼAbafĩlĩstĩnĩ ekĩtĩmbĩreyo erĩyatũla engulu oko syosanamu syabo nʼoko bandu.

¹⁰Neryo mobahĩra ebindu byʼamalwa biwe omo nyũmba yʼesyonyamuhanga syabo, mobatunga omutwe wuwe omo nyũmba ya Dagonĩ.

¹¹Nʼomugulu Abanya Yabesĩgĩleadĩ bosĩ bowa ebyosĩ ebyo Abafĩlĩstĩnĩ bakolera Saũlo,

¹²esyombangĩ syosĩ mosyahangana, mosyaheka ekĩnda kya Saũlo, nʼebĩnda byʼabagala buwe, mobatwalabyo eYabesĩ, mobata amakũha wabo omo ndĩna yʼomuti wʼomwalo eYabesĩ, mobatsira kalyo biro birinda.

¹³Neryo Saũlo mwahola atya busana nʼerĩlolo liwe eryo ahalaya oko Mwami Mukulu, busana nʼekĩnywa kyʼOmwami Mukulu, ekyo atategaya; kandi kusangwa abũlaya erĩhano ukwʼoyo wabya awite embĩnga erimulagula,

¹⁴mwatabũlya oko Mwami Mukulu, busana nʼekyo mwamwĩta, mwabindulira obwami uku Dawĩdĩ mugala wa Yese.