Read nande 1 Emyatsi yʼEmigulu 11 Bible Online

1 Emyatsi yʼEmigulu 11 - nande bible

1 Emyatsi yʼEmigulu 11

¹Neryo Abaĩsraelĩ bosĩ mobahĩndanira Dawĩdĩ eHebũronĩ, bati, Lebaya, ĩtwe tuli ĩkũha lyawe nʼomubiri wawe.

²Omo biro byalaba, omugulu Saũlo abya mwami, nina we wahũlũkaya nʼerĩsũbũlya Ĩsraelĩ; nʼOmwami Mukulu Nyamuhanga wawe mwakubwira ati, Wasyabya mũlĩsya wʼabandu bage Ĩsraelĩ, kandi Wasyabya mũsondolĩ wʼabandu bage Ĩsraelĩ.

³Neryo abakulu bosĩ ba Ĩsraelĩ mobahĩka oko mwami eHebũronĩ; na Dawĩdĩ mwalagana nabo eHebũronĩ embere syʼOmwami Mukulu; nabo mobahakabya Dawĩdĩ yʼamagũta erimuyira mo mwami wa Ĩsraelĩ, ngʼekĩnywa kyʼOmwami Mukulu uku Samwelĩ.

⁴Na Dawĩdĩ nʼAbaĩsraelĩ bosĩ mobaya eYerũsalema, eyo nĩ Yebũsĩ; nʼAbayebũsĩ, esyondũlanĩ syʼekihugo babyayo.

⁵Nʼesyondũlanĩ syʼeYebũsĩ mosyabwira Dawĩdĩ siti, Siwendisyingira eno. Nĩkwa Dawĩdĩ mwanyega ahakongotere hʼeSĩonĩ; go mũyĩ wa Dawĩdĩ.

⁶Na Dawĩdĩ mwabũga ati, Oyo wasyĩta Abayebũsĩ erĩmbere asyabya mukulu nʼomũsondolĩ wʼemilondo. Yoabũ mugala wa Zerũya mwatsũka erihetukirayo, naye mwayirwa mo mukulu.

⁷Neryo Dawĩdĩ mwĩkala ahakongotere; kyaleka ibahulaho mo mũyĩ wa Dawĩdĩ.

⁸Neryo mwahĩmba omũyĩ oko mbande syosĩ, erĩtsũka eMĩlo nʼerĩtĩmba ehosĩ; na Yoabũ mwasũbya oluhande lʼomũyĩ owasaka.

⁹Na Dawĩdĩ naye mwakanyirira eribya mukulu, kusangwa Omwami Mukulu wʼemilondo abya haguma naye.

¹⁰Neryo aba sye syombangĩ abo Dawĩdĩ abya awite, abamulegekerera haguma nʼAbaĩsraelĩ bosĩ erimuyira mo mwami, ngʼekĩnywa kyʼOmwami Mukulu busana na Ĩsraelĩ.

¹¹Eyĩ ye miganzo yʼesyombangĩ esyo Dawĩdĩ abya nasyo: Yasobeamũ, mugala wa Hakemonĩ, omukulu wʼamakũmĩ asatu; iye mwasumba erĩtũmo liwe erilwa nʼamagana asatu mwĩtĩrabo iguma.

¹²Nʼenyũma wuwe habya Eleazarĩ mugala wa Dodo, Omũahohĩ, oyo wabya muguma wʼoko syombangĩ ĩsatu.

¹³Abya haguma na Dawĩdĩ ePasadamĩmũ, aho Bafĩlĩstĩnĩ bahĩndana haguma oko malwa, ahabya ekĩtĩngũ kyʼeririma eriri mwʼekisusu; nʼabandu mobasaga Abafĩlĩstĩnĩ.

¹⁴Nabo mobahangana omo katĩkatĩ kʼekĩtĩngũ ekyo mobalwirakyo, mobĩta Abafĩlĩstĩnĩ; nʼOmwami Mukulu mwalamyabo omwʼilama lĩnene.

¹⁵Nʼabasatu bʼoko bakulu makũmĩ asatu mobandagala okwʼĩbwe aho Dawĩdĩ abya, omo mwangalũ wʼeAdũlamũ; nʼemilondo yʼAbafĩlĩstĩnĩ babya ibabirihanda endwiro omo musya wʼeRefaĩmũ.

¹⁶Neryo oko mugulu oyo Dawĩdĩ abya ahakongotere, nʼomulondo wʼAbafĩlĩstĩnĩ abya eBetelehemũ oko mugulu oyo.

¹⁷Na Dawĩdĩ mwakwa enyota, ati, Kumbe hali oyo wangamba amagetsi wʼekitehero kyʼeBetelehemũ, ekiri hakũhĩ nʼolũkyo nyĩpũlaye!

¹⁸Neryo abasatu abo mobalaba omo mulondo wʼAbafĩlĩstĩnĩ mobateha amagetsi omo kitehero kyʼeBetelehemũ ekyabya hakũhĩ nʼolũkyo, mobĩmyago mobaleterago Dawĩdĩ; nĩkwa Dawĩdĩ mwatanza erĩpũlyago, nĩkwa mũtũlĩrago embere syʼOmwami Mukulu,

¹⁹mwabũga ati, Nyamuhanga wage anyĩganayego sinyikole ekĩ; nasyapũlya omusasi wʼabandu aba ababirisonda erĩĩtĩsya engebe yabo kwehĩ? Kusangwa omwʼĩtĩsya engebe yabo babiriletago. Kyaleka iniagana erĩpũlyago. Esyombangĩ ĩsatu esĩ mosyakola emyatsi eyĩ.

²⁰Na Abĩsaĩ, mugala wabo Yoabũ, abya mukulu wʼabasatu abo; kusangwa mwasumba erĩtũmo liwe erilwa nʼamagana asatu neryo mwĩtabo, neryo mwayira erĩna omo katĩkatĩ kʼabasatu abo.

²¹Oko basatu omo lulengo lwʼakabiri mwabya nʼerĩsĩkĩbwa kwilaba bandu babiri, kandi mwabya mukulu wabo; nĩkwa mwatalingirirana nʼabasatu bʼerĩmbere.

²²Benaya mugala wa Yehoyada, mugala wʼembangĩ wʼeKabũseelĩ, owʼamaka omo mĩbĩrĩ, mwĩta abagala babiri ba Arĩelĩ wʼeMoabũ; kandi mwandagala omo buhya mwĩta endale oko mugulu wʼenzururu.

²³Kandi mwĩta Omunya Mĩsĩrĩ, omundu muli kutsibu, owʼemetere 2.30; nʼomo byala byʼOmunya Mĩsĩrĩ mwabya erĩtũmo eriri ngʼomuti wʼomũlũkĩ; neryo Benaya mwamwandagalirako nʼomũtso, mwapũra erĩtũmo omo byala byʼOmunya Mĩsĩrĩ, mwamwĩta omwʼĩtũmo liwe.

²⁴Benaya mugala wa Yehoyada mwakola emyatsi eyĩ mwakũmayira omo katĩkatĩ kʼesyombangĩ ĩsatu esĩ.

²⁵Lebaya, abya nʼerĩsĩkĩbwa kwilaba omo katĩkatĩ kʼamakũmĩ asatu abo, nĩkwa mwatalingirirana nʼabasatu bʼerĩmbere; na Dawĩdĩ mwamuyira mo mukulu wʼabateya buwe.

²⁶Kandi esyombangĩ syʼemilondo: Asahelĩ mugala wabo Yoabũ, na Elhananĩ mugala wa Dodo wʼeBetelehemũ,

²⁷Samotĩ Omũharorĩ, na Helezĩ Omũpelonĩ,

²⁸Ĩra mugala wa Ĩkesĩ Omũtekoa, na Abĩezerĩ Omũanatotĩ,

²⁹Sĩbekaĩ Omũhũsa, na Ĩlaĩ Omũahoa,

³⁰Maharaĩ Omũnetofatĩ, Heladĩ mugala wa Bana Omũnetofatĩ,

³¹Ĩtaĩ, mugala wa Rĩbaĩ wʼeGĩbea wʼabana ba Benyamĩna, na Benaya Omũpĩratonĩ,

³²Hũraĩ wʼoko hyũsĩ hyʼeGaasĩ, na Abĩelĩ Omũarabatĩ,

³³Azĩmawetĩ Omũbaharũmũ, na Elĩaba Omũsalabonĩ,

³⁴nʼabagala ba Hasemũ Omũgĩzonĩ, na Yonatana mugala wa Sage Omũhararĩ,

³⁵na Ahĩamũ mugala wa Sakarĩ Omũhararĩ, na Elĩfalĩ mugala wa Ũrĩ,

³⁶na Heverĩ Omũmekeratĩ, na Ahĩa Omũpelonĩ,

³⁷na Hezero Omũkaramelĩ, na Naraĩ mugala wa Ezebaĩ,

³⁸Yoelĩ mugala wabo Natana, na Mĩbũharĩ mugala wa Hagĩrĩ,

³⁹Zelekĩ Omũamonĩ, na Haraĩ Omũberotĩ, omũhekĩ wʼebindu byʼamalwa bya Yoabũ mugala wa Zerũya,

⁴⁰na Ĩra Omũĩtĩrĩ, na Garebĩ Omũĩtĩrĩ,

⁴¹Ũrĩa Omũhĩtĩ, na Zabadĩ mugala wa Alaĩ,

⁴²Adĩna mugala wa Sĩza Omũrũbenĩ, omukulu wʼAbarũbenĩ nʼamakũmĩ asatu haguma naye,

⁴³Hananĩ mugala wa Maaka, na Yosafatĩ Omũmĩtĩnĩ,

⁴⁴Na Ũzĩa Omũaseteratĩ, na Sama na Yeĩelĩ bagala ba Hotamũ Omũaroerĩ,

⁴⁵na Yedĩaelĩ mugala wa Sĩmũrĩ, na Yoha mugala wabo, Omũtĩsĩ,

⁴⁶na Elĩelĩ Omũmahawĩ, na Yerĩbaĩ, na Yosawĩa bagala ba Elnaamũ, na Ĩtĩma Omũmoabũ,

⁴⁷na Elĩelĩ, na Obedĩ, na Yasĩelĩ Omũmesoba.