Read nande 1 Emyatsi yʼEmigulu 12 Bible Online

1 Emyatsi yʼEmigulu 12 - nande bible

1 Emyatsi yʼEmigulu 12

¹Aba bo bahĩka uku Dawĩdĩ eZĩklagĩ omugulu ayĩbĩsa busana na Saũlo mugala wa Kĩsĩ; nabo babya omo katĩkatĩ kʼesyombangĩ, abamũwatĩkaya omo malwa.

²Babya balasĩ bʼobuta, ĩbanasĩ erigusa amabwe omo lukoba omo byala byʼamali nʼebyʼamalembe nʼerilasa emisoha yʼobuta; babya bagala babo Saũlo, Ababenyamĩna.

³Omukulu abya Ahĩzerĩ; nʼenyũma wʼaho Yoasĩ, abagala ba Sema Omũgĩbea, na Yezĩelĩ, na Peletĩ, abagala ba Azĩmawetĩ, na Beraka, na Yehũ Omũanatotĩ,

⁴na Ĩsĩmaya Omũgĩbeonĩ, embangĩ omo katĩkatĩ kʼamakũmĩ asatu, kandi ni mukulu wʼamakũmĩ asatu ayo, na Yeremĩa, na Yahazĩelĩ, na Yohana, na Yozabadĩ Omũgederatĩ,

⁵na Elũzaĩ, na Yeremotĩ, na Bealĩa, na Semarĩa, na Sefatĩa Omũharũfĩ,

⁶na Elekana, na Ĩsĩa, na Azarelĩ, na Yoezerĩ, na Yasobeamũ, Abakora,

⁷na Yoela, na Zebadĩa, abagala ba Yerohamũ wʼeGedorĩ.

⁸Nʼoko Bagadĩ mobayisombolera eyiri Dawĩdĩ ahakongotere omo mbwarara, esyombangĩ syʼamaka, abandu ababiryiga erilwa, abakatoka erihamba engabo nʼerĩtũmo; nʼamũsũ wabo abya ngʼamũsũ wʼesyondale, kandi babya bakanguha ngʼesyongabi oko bitwa.

⁹Ezerĩ yo mukulu, na Obadĩa yo wʼakabiri, na Elĩabũ wʼakasatu,

¹⁰nʼowʼakani, ye Mĩsĩmana, nʼowʼakatanu, ye Yeremĩa,

¹¹nʼowʼendatu Ataĩ, nʼowʼakalinda Elĩelĩ,

¹²nʼowʼomunani Yohana, nʼowʼomwenda Elĩzabadĩ,

¹³owʼerĩkũmĩ Yeremĩa, nʼowʼerĩkũmĩ nʼomuguma Makĩbanaĩ.

¹⁴Aba ba bagala ba Gadĩ ababya bakulu bʼemilondo; oyo wabya muke abya alingene nʼerĩgana (100), nʼoyo wabya mukulu inialingene nʼeelfu (1,000).

¹⁵Aba bo basoka eYorodanĩ omo mukera wʼerĩtsũka, omugulu olũsĩ lwabwagira oko mikyingyi yalo yosĩ; mobasagya abosĩ ababya omo misya, oko luhande lwʼendata, nʼoko luhande lwʼeyĩkwa.

¹⁶Nʼabandi bʼoko Babenyamĩna nʼAbayũda mobahĩka uku Dawĩdĩ ahakongotere.

¹⁷Neryo Dawĩdĩ mwahuluka erĩyahĩndana nabo, neryo mwabasũbĩrya mwabwirabo ati, Mwamabya mũkambĩkako nʼobuholo nʼerĩnyĩwatĩkya, omutima wage asyasanganĩbwa nenyũ; nĩkwa mwamasa erinyihotera oko nzĩgũ syage, kusangwa sihali mwaga omo byala byage, Nyamuhanga wʼabotata wetu alangirekyo nʼerikungakyo.

¹⁸Neryo Omũlĩmũ mwahĩka uku Amasaĩ, omukulu wʼamakũmĩ asatu abo, naye mwabũga ati, Uwe Dawĩdĩ tuli bawe, nʼoko luhande lwawe, uwe mugala wa Yese! Obuholo, Obuholo bubye kuwe, nʼobuholo bubye oko bawatĩkya bawe; kusangwa Nyamuhanga wawe akakũwatĩkaya! Neryo Dawĩdĩ mwakokyabo, mwayirabo mo basondolĩ bʼomulondo.

¹⁹Nʼabandi bʼuku Manase mobasuba oko luhande lwa Dawĩdĩ, omugulu asa haguma nʼAbafĩlĩstĩnĩ erilwa na Saũlo; nĩkwa mobatawatĩkyabo; kusangwa abakama bʼAbafĩlĩstĩnĩ ibamabihanwa mobamuhiga bati, akandisyasuba oko mukama wuwe Saũlo nʼerĩĩtĩsya emitwe yetu.

²⁰Nʼomugulu aya eZĩklagĩ, Abamanase mobamweyaho; ye Adĩna, na Yozabadĩ, na Yedĩelĩ, na Mĩkaelĩ, na Yozabadĩ, na Elĩhũ, na Zĩletaĩ, abasondolĩ bʼamaelfu ababya ba Manase.

²¹Neryo mobawatĩkya Dawĩdĩ erilwa nʼemilondo yʼabanyeyĩ; kusangwa abosĩ babya mbangĩ syʼamaka, kandi babya basondolĩ bʼomulondo.

²²Kusangwa ekiro nʼekiro abandu mobasa uku Dawĩdĩ erĩmũwatĩkya, erĩhĩka aho babera mulondo munene, ngʼomulondo wa Nyamuhanga.

²³Eyĩ ni miganzo yʼabakulu abambite ebindu byʼamalwa busana nʼerilwa, abahĩka uku Dawĩdĩ eHebũronĩ erimubindulirako obwami bwa Saũlo ngʼekĩnywa kyʼOmwami Mukulu.

²⁴Abana ba Yũda abaheka esyongabo nʼamatũmo babya elfu ndatu nʼamagana munani (6,800), abambite ebindu byʼamalwa.

²⁵Nʼabʼoko bana ba Sĩmeonĩ, esyombangĩ syʼamaka busana nʼamalwa, elfu irinda nʼerĩgana (7,100).

²⁶Abʼoko bana ba Lawĩ elfu ĩnĩ nʼamagana ndatu (4,600).

²⁷Na Yehoyada abya mũsondolĩ wʼekĩtũnga kya Harũnĩ; naye abya haguma nʼeelfu ĩsatu nʼamagana alinda (3,700),

²⁸na Zadokĩ, omũlwana wʼamaka nʼembangĩ, nʼabʼekĩtũnga kya tata wuwe abakulu makũmĩ abiri nʼababiri (22).

²⁹Nʼabʼoko bana ba Benyamĩna, bagala babo Saũlo, elfu ĩsatu (3,000); kusangwa erĩmbere oluhande lunene lwabo babya bakimira ekĩtũnga kya Saũlo.

³⁰Nʼabana ba Efũraĩmũ elfu makũmĩ abiri nʼamagana munani (20,800), esyombangĩ syʼamaka, abakũmayĩre omo bĩtũnga byʼabotata wabo.

³¹Nʼabʼekihande kyʼekihanda kya Manase elfu ĩkũmĩ nʼomunani (18,000), abahulawa omo mena, erĩhĩka nʼeriyira Dawĩdĩ mo mwami.

³²Nʼabʼoko bana ba Ĩsakarĩ, abandu ababya bawite eriminya emyatsi yʼemigulu, eriminya ekyo Ĩsraelĩ angakola, abakulu babo babya magana abiri (200); nʼabagala babo bosĩ babya ĩbakowa erihana lyabo.

³³Abazebũlonĩ, abatoka eriya omo milondo abatoka erĩtegekanĩa amalwa haguma nʼemihanda yosĩ yʼebindu byʼamalwa, elfu makũmĩ atanu (50,000), abatoka erĩtegekanĩa amalwa, abatabya nʼemitima eyikatika-tika.

³⁴Nʼabʼuku Nafũtalĩ habya bakulu elfu nguma (1,000), haguma nʼabʼesyongabo nʼamatũmo elfu makũmĩ asatu nʼirinda (37,000).

³⁵Nʼabʼuku Danĩ abatoka erĩtegekanĩa amalwa, elfu makũmĩ abiri nʼomunani nʼamagana ndatu (28,600).

³⁶NʼAbaaserĩ abatoka erigenda omo mulondo, abatoka erĩtegekanĩa amalwa, elfu makũmĩ ani (40,000).

³⁷Nʼeyisirya wʼeYorodanĩ, abʼoko Barũbenĩ, nʼAbagadĩ, nʼekihande kyʼekihanda kya Manase, haguma nʼemihanda yosĩ yʼebindu byʼamalwa busana nʼerilwa, elfu erĩgana nʼamakũmĩ abiri (120,000).

³⁸Abosĩ aba babya bandu bʼamalwa, abakatoka erĩtegekanĩa amalwa, mobasa eHebũronĩ nʼomutima ahĩkene, eriyira Dawĩdĩ mo mwami oko Baĩsraelĩ bosĩ; nʼabasĩgala bosĩ Abaĩsraelĩ nibya mobabya bʼomutima muguma eriyira Dawĩdĩ mo mwami.

³⁹Kandi mobabyaho haguma na Dawĩdĩ ebiro bisatu, bakalya nʼerĩpũlya; kusangwa abagala babo ĩbabĩrĩkokoteryabo.

⁴⁰Kandi ababya hakũhĩ nabo, erĩhĩka ewa Ĩsakarĩ na Zebũlũnĩ na Nafũtalĩ, mobaleta kalyo oko syopunda, nʼoko syongamia, nʼoko syonyumbu, nʼoko syonume syʼesyonde, ebyalya bingi, eyĩsyano, nʼebĩgũma byũmĩre byʼomũtĩnĩ, nʼebĩgũma byũmĩre byʼebĩnyũ, nʼebĩnyũ, nʼamagũta, nʼesyonume syʼesyonde, nʼesyombũlĩ, kusangwa habya obutseme ewʼAbaĩsraelĩ.