Read nande 1 Emyatsi yʼEmigulu 13 Bible Online

1 Emyatsi yʼEmigulu 13 - nande bible

1 Emyatsi yʼEmigulu 13

¹Neryo Dawĩdĩ mwakanĩa nʼabasondolĩ bʼamaelfu nʼabʼamagana, nʼobuli mũsondolĩ.

²Neryo Dawĩdĩ mwabwira endeko yosĩ yʼAbaĩsraelĩ ati, Kyamabya kibuya ukwʼinywe, kandi kyamabya kĩkalũa oko Mwami Mukulu Nyamuhanga wetu, tutume ehosĩ oko bagala betu abasĩgere omo kihugo kyosĩ kya Ĩsraelĩ, abawite abahererĩ nʼAbalawĩ abali omo mĩyĩ yabo eyiwite ehĩyĩ bahĩndane haguma netu;

³tuyiretere erĩsandũko lya Nyamuhanga wetu; kusangwa motũtasondyalyo oko biro bya Saũlo.

⁴Nʼendeko yosĩ moyabũga iti, bakandikola batya; kusangwa omwatsi oyo abya mubuya omo meso wʼabandu bosĩ.

⁵Neryo Dawĩdĩ mwahĩndanĩa abandu bosĩ, erĩtsũka eSĩhorĩ akũsĩ kʼeMĩsĩrĩ erĩhĩka oko hʼeriingirira eHamatĩ, erĩlũsya erĩsandũko lya Nyamuhanga eKĩrĩatĩ-yearĩmũ.

⁶Neryo Dawĩdĩ mwahetuka nʼAbaĩsraelĩ bosĩ, eriya eBaala, eyo nĩ Kĩrĩatĩ-yearĩmũ, ewa Yũda, erĩlũsyayo erĩsandũko lya Nyamuhanga Omwami Mukulu oyo wĩkere endata oko makerũbĩ, aho Erĩna liwe rikabirikirawa.

⁷Neryo mobaheka erĩsandũko lya Nyamuhanga oko galĩ nyihya erĩlũa omo nyũmba ya Abĩnadabũ; na Ũza na Ahĩo mobagendya egalĩ.

⁸Na Dawĩdĩ nʼAbaĩsraelĩ bosĩ mobatsangira embere sya Nyamuhanga nʼamaka wabo gosĩ, haguma nʼesyonyimbo nʼamasengo, nʼesyonanga, nʼesyonzoga, nʼesyongubi.

⁹Nʼomugulu bahĩka oko kibuga kyʼerĩhũmbĩramo kyʼeKĩdonĩ, Ũza mwahĩra ebyala biwe erihamba erĩsandũko; kusangwa esyonde syʼobulume syabya ĩsĩkaterayalyo.

¹⁰Nʼerihitana lyʼOmwami Mukulu molyaka uku Ũza, neryo mwamwĩta, kusangwa ahĩra ebyala biwe okwʼĩsandũko; neryo mwaholera aho embere sya Nyamuhanga.

¹¹Na Dawĩdĩ mwatatsema, kusangwa Omwami Mukulu mwapumukira uku Ũza; neryo mwahulaho mo Perezĩũza, erĩhĩka mũnabwĩre.

¹²Na Dawĩdĩ mubaha Nyamuhanga ekiro ekyo, ati, Nasyaleta erĩsandũko lya Nyamuhanga eka wage nyiti kwehĩ?

¹³Neryo Dawĩdĩ mwatahũmĩrya erĩsandũko ewuwe omo mũyĩ wa Dawĩdĩ, nĩkwa mwasegeryalyo omo nyũmba ya Obedĩ-edomũ Omũgĩtĩ.

¹⁴Nʼerĩsandũko lya Nyamuhanga molĩkala omo kĩtũnga kya Obedĩ-edomũ omo nyũmba yiwe emikera ĩsatu; neryo Omwami Mukulu mwatsumula ekĩtũnga kya Obedĩ-edomũ, nʼebyosĩ abya awite.