Read nande 1 Emyatsi yʼEmigulu 14 Bible Online

1 Emyatsi yʼEmigulu 14 - nande bible

1 Emyatsi yʼEmigulu 14

¹Na Hĩramũ omwami wʼeTĩro mwatuma abakwenda uku Dawĩdĩ, nʼemiti yʼeMĩerezĩ, nʼabahĩmbĩ, nʼababatsĩ, erĩmũhĩmbĩra enyũmba.

²Neryo Dawĩdĩ mwaminya ngoko Mwami Mukulu abĩrĩmũhanganĩa mo mwami oko Baĩsraelĩ; kusangwa obwami buwe mobwasĩkĩbwa kutsibu busana nʼabandu buwe Abaĩsraelĩ.

³Neryo Dawĩdĩ mwahĩkya abandi bakalĩ eYerũsalema; na Dawĩdĩ mwabuta abandi bagala nʼabandi bali.

⁴Nʼaya wa mena wʼabana abo abya nabo eYerũsalema: Samũa, na Sobabũ, na Natana, na Solomono,

⁵na Ĩbũharĩ, na Elĩsũa, na Elĩpeletĩ,

⁶na Noga, na Nefegĩ, na Yafia,

⁷na Elĩsama, na Belĩada, na Elĩfeletĩ.

⁸Nʼomugulu Abafĩlĩstĩnĩ bowa ngoko Dawĩdĩ abĩrĩhakabĩbwa amagũta eribya mwami oko Baĩsraelĩ bosĩ, Abafĩlĩstĩnĩ bosĩ mobahetuka erisonda-sonda Dawĩdĩ, neryo Dawĩdĩ mwowa ekyo, mwayalwa nabo.

⁹Neryo Abafĩlĩstĩnĩ ibamabiasa nʼerĩhũnga omo musya wa Refũraĩmũ.

¹⁰Na Dawĩdĩ mwabũlya Nyamuhanga, ati, Nyinahetuke eriyalwa nʼAbafĩlĩstĩnĩ kwehĩ? Nawe wasyahĩrabo omo byala byage kwehĩ? Neryo Omwami Mukulu mwamubwira ati, Uhetuke; kusangwa nasyahĩrabo omo byala byawe.

¹¹Neryo mobahetuka eBaalĩ-perazĩmũ, neryo Dawĩdĩ mwĩtĩra boho; neryo Dawĩdĩ mwabũga ati, Nyamuhanga abiripumukira oko nzĩgũ syage omo byala byage, ngʼeribwaga lyʼamagetsi. Neryo mobahula erĩna lyaho mo Baalĩ-perazĩmũ.

¹²Kandi mobasĩganĩa esyonyamuhanga syabo syʼaho; na Dawĩdĩ mwahamula neryo mobahĩsyasyo omo muliro.

¹³Neryo Abafĩlĩstĩnĩ mobaswahũnga kandi omo musya.

¹⁴Neryo Dawĩdĩ mwabũlya Nyamuhanga kandi; na Nyamuhanga mwamubwira ati, Susyehetuka erikwamabo; ũtĩmbe aho bali, ũhĩke kubo ebwanga bwʼeyiri emiti yʼamakerere.

¹⁵Neryo omugulu ũkowa omulenge wʼebĩkyĩndo endata wʼemiti yʼamakerere, oko mugulu oyo iwayalwa; kusangwa Nyamuhanga abirikubera embere erĩĩta omulondo wʼAbafĩlĩstĩnĩ.

¹⁶Neryo Dawĩdĩ mwakola ngoko Nyamuhanga amuhana; neryo mobĩta omulondo wʼAbafĩlĩstĩnĩ erĩtsũka eGĩbeonĩ erĩhĩka eGezerĩ.

¹⁷Nʼengulu ya Dawĩdĩ moyatsungana omo bihugo byosĩ; Omwami Mukulu mwaleta obuba buwe oko bihanda byosĩ.