Read nande 1 Emyatsi yʼEmigulu 15 Bible Online

1 Emyatsi yʼEmigulu 15 - nande bible

1 Emyatsi yʼEmigulu 15

¹Neryo Dawĩdĩ mwayĩhĩmbĩra amanyũmba omo mũyĩ wa Dawĩdĩ; kandi mwakokotya omwanya busana nʼerĩsandũko lya Nyamuhanga, kandi mwahandiralyo eHema.

²Neryo Dawĩdĩ mwabũga ati, Sihali oyo wangaheka erĩsandũko lya Nyamuhanga ba nʼAbalawĩ; kusangwa Omwami Mukulu mwayisogabo eriheka erĩsandũko lya Nyamuhanga, nʼerimukolera ebiro byosĩ.

³Neryo Dawĩdĩ mwahĩndanĩa Abaĩsraelĩ bosi eYerũsalema, erireta erĩsandũko lyʼOmwami Mukulu omo mwanya, aho akokotaya busana nalyo.

⁴Kandi Dawĩdĩ mwahĩndanĩa bagala ba Harũnĩ nʼAbalawĩ.

⁵Abʼoko bagala ba Kohatĩ, Ũrĩelĩ yo mukulu, nʼabagala babo erĩgana nʼamakũmĩ abiri (120);

⁶abʼoko bagala ba Merarĩ, Asaya yo mukulu, nʼabagala babo amagana abiri nʼamakũmĩ abiri (220);

⁷abʼoko bagala ba Gersonĩ, Yoelĩ yo mukulu, nʼabagala babo erĩgana nʼamakũmĩ asatu (130);

⁸abʼoko bagala ba Elĩzafanĩ, Semaya yo mukulu, nʼabagala babo amagana abiri (200);

⁹Nʼabʼoko bagala ba Hebũronĩ, Elĩelĩ yo mukulu, nʼabagala babo makũmĩ munani (80);

¹⁰nʼabʼoko bagala ba Ũzĩelĩ, Amĩnadabũ yo mukulu, nʼabagala babo erĩgana nʼerĩkũmĩ nʼababiri (112).

¹¹Neryo Dawĩdĩ mwabirikira abahererĩ Zadokĩ na Abĩatarĩ, nʼAbalawĩ, na Ũrĩelĩ, na Asaya, na Yoelĩ, na Semaya, na Elĩelĩ, na Amĩnadabũ,

¹²neryo mwabwirabo ati, Ĩnywe muli bakulu bʼebĩtũnga byʼabotata bʼAbalawĩ; muyihigule, ĩnywe nʼabagala benyũ, imwatoka erireta erĩsandũko lyʼOmwami Mukulu, Nyamuhanga wa Ĩsraelĩ, aho nabĩrĩkokotya busana nalyo.

¹³Kusangwa momutahekalyo erĩmbere, Omwami Mukulu mwatupumukira, kusangwa motutamusondasonda omo kilayiro.

¹⁴Neryo abahererĩ nʼAbalawĩ mobayihigula erireta erĩsandũko lyʼOmwami Mukulu, Nyamuhanga wa Ĩsraelĩ.

¹⁵Nʼabana bʼAbalawĩ mobaheka erĩsandũko lya Nyamuhanga oko bitigo byabo omo migamba yalyo, ngoko Musa ahana ngʼekĩnywa kyʼOmwami Mukulu.

¹⁶Na Dawĩdĩ mwabwira bakulu bʼAbalawĩ bahĩre abagala babo mo bĩmbĩ, haguma nʼebindu byʼeriimba, esyonanga, nʼamasengo, nʼesyonzenze, erĩbũgya olusengo nʼerisumba omulenge nʼobutseme.

¹⁷Neryo Abalawĩ mobahĩra Hemanĩ mugala wa Yoelĩ; nʼoko bagala babo, ye Asafũ mugala wa Berekĩa; nʼoko bagala ba Merarĩ abagala babo, Etanĩ mugala wa Kũsaya;

¹⁸kandi haguma nabo, abagala babo bʼolulengo lwʼakabiri, ye Zekarĩa, na Benĩ, na Yazĩelĩ, na Semĩramotĩ, na Yehĩelĩ, na Ũnĩ, Elĩabũ, na Benaya, na Masea, na Matĩtĩa, na Elĩfelehũ, na Mĩkĩneya, na Obedĩ-edomũ, na Yeĩelĩ, abateya bʼolũyĩ.

¹⁹Neryo abĩmbĩ, Hemanĩ, na Asafũ, na Etanĩ, mobahĩrwaho, haguma nʼesyonzenze syʼemiringa syʼerĩbũgya olusengo;

²⁰na Zekarĩa, na Azĩelĩ, na Semĩramotĩ, na Yehĩelĩ na Ũnĩ, na Elĩabũ, na Maseya, na Benaya, haguma nʼesyonanga syʼomulenge wa Alamotĩ;

²¹na Matĩtĩa, na Elĩfelehũ, na Mĩkeneya, na Obedĩ-edomũ, na Yeĩelĩ, na Azazĩa, erisondola haguma nʼamasengo wʼomulenge wa Semĩnĩtĩ, erisondola.

²²Na Kenanĩa, yo mukulu wʼAbalawĩ abya mukulu wʼolwimbo, mwakangĩrĩrya Olwimbo, kusangwa abya munyima-nyima.

²³Na Berekĩa na Elkana babya bateya bʼolũyĩ busana nʼerĩsandũko.

²⁴Na Sebanĩa, na Yosafatĩ, na Netanelĩ, na Amasaĩ, na Zekarĩa, na Benaya, na Elĩezerĩ abahererĩ, mobabuha esyongubi emuliro wʼerĩsandũko lya Nyamuhanga; na Obedĩ-edomũ na Yehĩa babya bateya bʼolũyĩ busana nʼerĩsandũko.

²⁵Neryo Dawĩdĩ nʼabakulu bʼAbaĩsraelĩ, nʼabakulu bʼamaelfu, mobayaleta erĩsandũko lyʼerilagana lyʼOmwami Mukulu erĩlũsyalyo omo nyũmba ya Obedĩ-edomũ nʼobutseme.

²⁶Neryo omugulu Nyamuhanga awatĩkaya Abalawĩ abaheka erĩsandũko lyʼerilagana lyʼOmwami Mukulu, mobahonga amahere esyonume syʼesyonde sirinda nʼesyombangale sirinda.

²⁷Na Dawĩdĩ abya ambite ekanzu yʼekĩtanĩ kĩbũyahĩre, nʼAbalawĩ bosĩ abaheka erĩsandũko, nʼabĩmbĩ, na Kenanĩa, omukulu wʼolwimbo haguma nʼabĩmbĩ; na Dawĩdĩ abya ambite eefodĩ yʼekĩtanĩ.

²⁸Neryo Abaĩsraelĩ bosĩ mobahetũkya erĩsandũko lyʼerilagana lyʼOmwami Mukulu nʼerĩũta obogo, nʼomo mirenge yʼorumaka, nʼengubi, nʼomo masengo erĩbũgya omulenge munene haguma nʼesyonanga, nʼesyonzenze.

²⁹Neryo omugulu erĩsandũko lyʼerilagana lyʼOmwami Mukulu lyahĩka omo mũyĩ wa Dawĩdĩ, Mĩkalĩ, mwali wa Saũlo mwaleberya omo lĩdĩrĩsa mwalangira omwami Dawĩdĩ akasata nʼeritsanga; mwamupona omo mutima wuwe.