Read nande 1 Emyatsi yʼEmigulu 16 Bible Online

1 Emyatsi yʼEmigulu 16 - nande bible

1 Emyatsi yʼEmigulu 16

¹Neryo mobaleta erĩsandũko lya Nyamuhanga, mobahĩralyo omo katĩkatĩ kʼeHema eyo Dawĩdĩ ahanda busana nalyo; neryo mobahonga amahere wʼerĩokererya nʼamahere wʼobuholo embere sya Nyamuhanga.

²Nʼomugulu Dawĩdĩ abuga erihera amahere wʼerĩokererya nʼamahere wʼobuholo, mwatsumula bandu omo lĩna lyʼOmwami Mukulu.

³Neryo mwagabira obuli mundu wa Ĩsraelĩ, abalume nʼabakalĩ, obuli mundu akabiga kʼobundu, nʼerĩgabo lyʼeyĩswĩ, nʼakatole kʼebĩgũma byʼebĩnyũ.

⁴Neryo mwahĩra abandi bʼoko Balawĩ erikola embere syʼerĩsandũko lyʼOmwami Mukulu, nʼerĩhĩra eryibuka, nʼeriha Omwami Mukulu Nyamuhanga wa Ĩsraelĩ ewasĩngya nʼeripipa.

⁵Asafũ yo mukulu, nʼoyũmũkwamĩre ye Zekarĩa, na Yeĩelĩ, na Semaramotĩ, na Yehĩelĩ, na Matĩtĩa, na Elĩabũ, na Benaya, na Obedĩ-edomũ, na Yeĩelĩ, omo binanda byʼeriimba, haguma nʼesyonanga nʼesyonzenze; na Asafũ nibya haguma nʼamasengo erĩbũga omo mulenge munene;

⁶na Benaya na Yahazelĩ abahererĩ haguma nʼesyongubi emigulu yosĩ, embere wʼerĩsandũko lyʼerilagana lya Nyamuhanga.

⁷Neryo oko kiro ekyo, Dawĩdĩ mwatsũka erĩhĩra eriha ewasĩngya oko Mwami Mukulu, omo byala bya Asafũ nʼabagala babo.

⁸Muhe ewasĩngya oko Mwami Mukulu, mulakire erĩna liwe; Mũmĩnyĩsaye emĩbĩrĩ yiwe omo katĩkatĩ kʼebihanda,

⁹Mumwimbire, mumwimbire eripipa; Mũkanaye busana nʼemĩbĩrĩ yiwe yosĩ yʼeriswekera.

¹⁰Mutsangire erĩna liwe lĩbũyĩrĩre; Omutima wʼabakasonda-sonda Omwami Mukulu atseme.

¹¹Mũsondaye Omwami Mukulu nʼamaka wuwe; Mũsonda-sondaye obũsũ buwe ebiro byosĩ.

¹²Mwibuke emĩbĩrĩ yiwe yʼeriswekera eyo abirikola, Nʼebyʼeriswekera biwe, nʼeritswera eryo abũga omo buno buwe,

¹³Ĩnywe lubuto lwʼomugombe wuwe Ĩsraelĩ, Ĩnywe bana ba Yakobo, abayisogawa buwe.

¹⁴Iye ni Mwami Mukulu Nyamuhanga wetu; Eritswera liwe liri omo kihugo kyosĩ.

¹⁵Mwibuke endagano yiwe kera na kera, Ekĩnywa ekyo ahamula erĩhĩka oko ndengo elfu. 1,000.

¹⁶Endagano eyo ayira na Abrahamũ, Nʼerĩlahĩrya liwe uku Isaka.

¹⁷Mwatsũgũmatyabyo uku Yakobo eribya mugambo, Nʼoko Ĩsraelĩ endagano ya kera na kera,

¹⁸Ati, Nasyakuha ekihugo kyʼeKanana, Erĩgabo lyʼomwandu wenyũ.

¹⁹Omugulu mwabya bandu bake omwʼiganzwa, Ega, abake kutsibu, nʼababunga ba mukyo;

²⁰Ibakalendera-lendera erĩhĩka oko kihanda nʼekindi, Erĩlũa omo bwami buguma erĩhĩka oko bandi bandu.

²¹Mwatalĩga mundu nʼomuguma erikolabo nabi, Ega mwakunga abami busana nabo, ati,

²²Sĩmũtũle oko bahakabĩbwa bage, Kandi Simukole abamĩnyererĩ bage bo nabi.

²³Ebihugo byosĩ, mwimbire Omwami Mukulu, Mũkangaye erĩlamya liwe ekiro nʼekiro.

²⁴Mũtũlaganaye olukengerwa luwe omo katĩkatĩ kʼebihanda, Nʼemĩbĩrĩ yiwe yʼeriswekera omo katĩkatĩ kʼabandu.

²⁵Kusangwa Omwami Mukulu ni mukulu, oyo wangapipwa kutsibu. Nibya angubahwa kwilaba esyonyamuhanga syosĩ.

²⁶Kusangwa esyonyamuhanga syosĩ syʼabandu ni sanamu. Nĩkwa Omwami Mukulu mwahangika amatũkũ.

²⁷Erĩsĩkya nʼerĩkenganĩa biri embere siwe. Amaka nʼobutseme biri aho wuwe.

²⁸Ĩnywe bĩtũnga byʼabandu, muhe Omwami Mukulu, Muhe Omwami Mukulu olukengerwa nʼamaka;

²⁹Mumuhe olukengerwa olutolere erĩna liwe. Mulete obuhere, mwase embere siwe; Mũramaye Omwami Mukulu omo bubuya bwʼerĩbũyĩrĩre.

³⁰Ebihugo byosĩ, mutitimane embere siwe. Ekihugo nakyo kĩsĩkĩre sikyangatoka erĩtũndwa.

³¹Amatũkũ atseme, nʼekihugo kĩyĩsyandire; Babũge omo katĩkatĩ kʼebihanda bati, Omwami Mukulu akatabala.

³²Engetsi ihuhe, nʼerĩũsũla lyayo; Ekisuki kĩyĩsyandire nʼebyosĩ ebiri mukyo;

³³Oko mugulu oyo emiti yʼomo mũsĩtũ yasyimba omo butseme embere syʼOmwami Mukulu; Kusangwa akasa eritswera ekihugo.

³⁴Muhe ewasĩngya oko Mwami Mukulu; kusangwa ni mubuya; Kusangwa obubuya buwe bʼolwanzo ni bya kera na kera.

³⁵Mũbũge muti, Uwe Nyamuhanga wʼomulamo wetu ũtũlamaye, Ũtũhĩndanaye nʼerĩtũlamya oko bihanda, Tuhe erĩna lyawe lĩbũyĩrĩre lyʼewasĩngya, Nʼerĩsĩngana omwʼipipa lyawe.

³⁶Omwami Mukulu Nyamuhanga wa Ĩsraelĩ abane omũyĩsa, Erĩtsũka kera na kera nʼerĩhĩka kera na kera. Nʼabandu bosĩ mobabũga bati, Bibere aho, mobapipa Omwami Mukulu.

³⁷Neryo Dawĩdĩ mwasĩga Asafũ nʼabagala babo embere wʼerĩsandũko lyʼerilagana lyʼOmwami Mukulu erikola embere wʼerĩsandũko ebiro byosĩ, ngʼomũbĩrĩ wʼobuli kiro kwʼabya;

³⁸na Obedĩ-edomũ haguma nʼabagala babo amakũmĩ ndatu nʼomunani (68); na Obedĩ-edomũ mugala wa Yedũtũnĩ na Hosa eribya bateya bʼolũkyo;

³⁹nʼomũhererĩ Zadokĩ, nʼabahererĩ abagala babo, embere syʼErĩhema lyʼOmwami Mukulu oko hʼendata ahali eGĩbeonĩ,

⁴⁰erihonga amahere wʼerĩokererya oko Mwami Mukulu oko kiherero kyʼobuhere bwʼerĩokererya ebiro byosĩ omo tũtũtũ nʼomwʼĩgolo ngʼebyosĩ ebyasakawa omo migambo yʼOmwami Mukulu ebyo ahana Ĩsraelĩ;

⁴¹na haguma nʼabo, Hemanĩ na Yedũtũnĩ, nʼabandi abayisogawa, abahulawa omo mena, eriha ewasĩngya oko Mwami Mukulu, kusangwa olwanzo luwe lubuya ni lwa kera na kera.

⁴²Na haguma nʼabo, Hemanĩ na Yedũtũnĩ nʼesyongubi nʼamasengo busana nabo abakabũgaya omulenge, haguma nʼebindu byʼesyonyimbo sya Nyamuhanga; nʼabagala ba Yedũtũnĩ busana nʼolũkyo.

⁴³Nʼabandu bosĩ mobakũlũka obuli mundu omo nyũmba yiwe. Na Dawĩdĩ mwasubula eriyatsumula ekĩtũnga kiwe.