Read nande 1 Emyatsi yʼEmigulu 17 Bible Online

1 Emyatsi yʼEmigulu 17 - nande bible

1 Emyatsi yʼEmigulu 17

¹Neryo omugulu Dawĩdĩ ĩkala omo nyũmba yiwe, Dawĩdĩ mwabwira omũmĩnyererĩ Natana ati, Lebaya, nyĩkere omo nyũmba yʼeMĩerezĩ, nĩkwa erĩsandũko lyʼerilagana lyʼOmwami Mukulu lĩkere omo kĩsũkũlĩryo kyʼolukimba.

²Neryo Natana mwabwira Dawĩdĩ ati, Ukole ebyosĩ ebiri omo mutima wawe; kusangwa Nyamuhanga ali haguma nawe.

³Neryo oko kiro ekyo kisa-kisa, ekĩnywa kya Nyamuhanga mokyasa uku Natana kiti,

⁴Ugende Ubwire Dawĩdĩ omugombe wage uti, Omwami Mukulu akabũga ati, Sĩwendĩsyanyĩhĩmbĩra enyũmba yʼerĩĩkalamo.

⁵Kusangwa sĩndĩtĩkala omo nyũmba erĩtsũka ekiro naleta Abaĩsraelĩ, erĩhĩka mũnabwĩre, nĩkwa nabiribya omo hema nʼomo yindi hema, nʼerĩlũa omo hʼerĩĩkala haguma nʼerihĩka ahandi.

⁶Ehosĩ eyo nalendera haguma nʼAbaĩsraelĩ bosĩ, monanabũga ekĩnywa kiguma oko mũtswerĩ, nʼomuguma wʼAbaĩsraelĩ abo nahamula eribya balĩsya bʼabandu bage kwehĩ, nyiti, Busana nakĩ sĩmwetanyĩhĩmbĩra enyũmba yʼemĩerezĩ kwehĩ?

⁷Neryo lino ukandibwira omugombe wage Dawĩdĩ, uti, Omwami Mukulu wʼemilondo ati, Monakũlũsya omo kĩyĩte kyʼesyombũlĩ, igukakwama esyombũlĩ, nyiti ubye mũsondolĩ wʼabandu bage Abaĩsraelĩ.

⁸Kandi abiribya haguma nawe ehosĩ waya, monĩta esyonzĩgũ syawe syosĩ embere syawe; kandi nasyakuyirira erĩna, ngʼerĩna lyʼabakulu abali omo kihugo.

⁹Kandi nasyayira omwanya busana nʼabandu bage Abaĩsraelĩ, kandi nasyahandabo, ibatoka erĩĩkala aho wabo, kandi sĩbendĩsyahũmĩbwa; kutse abana bʼebibi sĩbendĩsyaheryabo kandi, ngʼerĩmbere,

¹⁰erĩtsũka omugulu nahamula abatswerĩ eribya bakulu bʼabandu bage Abaĩsraelĩ; nage nasyakĩnda esyonzĩgu syawe syosĩ. Kandi ngakubwira nyiti Omwami Mukulu asyakũhĩmbĩra enyũmba.

¹¹Neryo omugulu ebiro byawe byasyahwa wasyeya abotata-kulu bawe, nasyahanganĩa omwana wawe enyũma kuwe oyo Wasyabya gʼoko bagala bawe; nage nasyahanganĩa obwami buwe.

¹²Iye asyanyĩhĩmbĩra enyũmba, nage nasyahanganĩa ekĩtũmbĩ kiwe kyʼobwami ebiro byosĩ.

¹³Nasyabya tata wuwe, naye asyabya mugala wage; nage sindiendĩsyamũlũsya kʼobubuya bwage bʼolwanzo, ngoko nalũsayabo ukwʼoyo wabya embere syawe;

¹⁴nĩkwa nasyamũsĩkya omo nyũmba yage nʼomo bwami bwage kera na kera, nʼekĩtũmbĩ kiwe kyʼobwami kyasyahanganĩbwa kera na kera.

¹⁵Neryo Nataha mwabwira Dawĩdĩ ebĩnywa byosĩ ebĩ ngoko byabya omo nzolĩ syosĩ esĩ.

¹⁶Neryo omwami Dawĩdĩ mwingira, mwĩkala embere syʼOmwami Mukulu; neryo mwabũga ati, Uwe Mwami Mukulu Nyamuhanga, Ĩngyendi, nʼekĩtũnga kyage nĩkĩ, uti wabirinyireta erĩhĩka hano kwehĩ?

¹⁷Uwe Nyamuhanga, omwatsi oyũ abya muke omo meso wawe; nĩkwa wabĩrĩbũga busana nʼekĩtũnga kyʼomugombe wawe busana nʼebiro bingi ebikandisyasa, kandi wabirinyiganza ngʼomundu mukulu, uwe Mwami Mukulu Nyamuhanga.

¹⁸Dawĩdĩ angaswakubwira byahi busana nʼerĩsĩkya eryo lyabirikolwa oko mugombe wawe kwehĩ, kusangwa ũnasĩ omugombe wawe.

¹⁹Uwe Mwami Mukulu, busana nʼomugombe wawe, kandi ngʼomutima wawe, wabirikola ebingaha ebyosĩ ebĩ, erĩmĩnyĩsya emyatsi mikulu eyĩ.

²⁰Uwe Mwami Mukulu, sihali gundi nga we, kandi sihali Nyamuhanga nina we, omo byosĩ ebyo twabĩrĩowa nʼamatwĩ wetu.

²¹Muna-kihugo ekindi kihanda ni kyahi ekiringene nʼabandu bawe Abaĩsraelĩ, ekyo Nyamuhanga atongolaya busana naye eribya kihanda, erikuyirira erĩna omo myatsi mikulu nʼeyʼerĩũbahya, erihiga ebihanda embere syʼabandu bawe, abo watongolaya erĩlũa eMĩsĩrĩ kwehĩ?

²²Kusangwa mowayira abandu bawe Abaĩsraelĩ eribya bandu bawe kera na kera; nawe uwe Mwami Mukulu, mowabya Nyamuhanga wabo.

²³Na lino, uwe Mwami Mukulu, ekĩnywa ekyo wabũga busana nʼomugombe wawe, na busana nʼekĩtũnga kiwe, kĩhanganĩbawe kera na kera, kandi Ukole ngoko wabĩrĩbũga.

²⁴Nʼerĩna lyawe lĩhanganĩbawe nʼeripipwa kera na kera, bati, Omwami Mukulu wʼemilondo ni Nyamuhanga wʼAbaĩsraelĩ, ye Nyamuhanga wa Ĩsraelĩ; nʼenyũmba yʼomugombe wawe Dawĩdĩ ihangene embere syawe.

²⁵Kusangwa uwe Nyamuhanga wage, wabĩrĩbĩsũlĩra omugombe wawe uti wasyamũhĩmbĩra enyũmba; busana nʼekyo omugombe wawe abiribana omutima wʼerisaba embere syawe.

²⁶Na lino, uwe Mwami Mukulu, uli Nyamuhanga, kandi wabirilaga omugombe wawe omwatsi ogowene oyũ.

²⁷Na lino kyabĩrĩkũtsemesya eritsumula enyũmba yʼomugombe wawe, itoke eribya kera na kera embere syawe; kusangwa uwe Mwami Mukulu wabiritsumula, nakyo kĩtsũmwĩre kera na kera.