Read nande 1 Emyatsi yʼEmigulu 18 Bible Online

1 Emyatsi yʼEmigulu 18 - nande bible

1 Emyatsi yʼEmigulu 18

¹Nʼenyũma wʼaho, Dawĩdĩ mwĩta Abafĩlĩstĩnĩ, mwakĩndabo, mwahũnga eGatĩ, nʼemĩyĩ yayo erĩlũa omo byala byʼAbafĩlĩstĩnĩ.

²Kandi Dawĩdĩ mwĩta Moabũ; nʼAbamoabũ mobabya bagombe ba Dawĩdĩ, kandi mobamuletera omuhako.

³Kandi Dawĩdĩ mwĩta Hadarezerĩ omwami wʼeZoba erĩhĩka eHamatĩ omugulu ayahanganaya eritabala liwe hakũhĩ nʼolũsĩ lwʼeEfũratĩ.

⁴Kandi Dawĩdĩ mwamusagula esyogalĩ elfu nguma (1,000), nʼabali oko syosabayĩrĩ elfu irinda (7,000), nʼabakagenda omo bisando elfu makũmĩ abiri (20,000); na Dawĩdĩ mwatwa emĩkĩ yʼesyosabayĩrĩ syosĩ syʼesyogalĩ, nĩkwa mwayibikira kusyo busana nʼesyogalĩ erĩgana (100).

⁵Nʼomugulu Abasũrĩa bʼeDamasekĩ basa erĩwatĩkya Hadarezerĩ omwami wʼeZoba, Dawĩdĩ mwĩta Abasũrĩa bandu elfu makũmĩ abiri nʼĩbĩrĩ (22,000).

⁶Neryo Dawĩdĩ mwahĩra abateya eSũrĩa yʼeDamasekĩ; nʼAbasũrĩa mobabya bagombe ba Dawĩdĩ, mobaleta omuhako. NʼOmwami Mukulu mwakĩndĩsya Dawĩdĩ ehosĩ aya.

⁷Kandi Dawĩdĩ mwahũnga esyongabo syʼesyamagetsi esyabya oko bagombe ba Hadarezerĩ, mwaletasyo eYerũsalema.

⁸Kandi oko Tĩbũhatĩ nʼoko Kũnĩ, emĩyĩ ya Hadarezerĩ mwahũnga emiringa minene kutsibu, eyo Solomono ahĩmba mwʼengetsi yʼomulinga, nʼesyondũyĩ nʼesyonyungu syʼemiringa.

⁹Nʼomugulu Toũ, omwami wʼeHamatĩ owa ngoko Dawĩdĩ ĩta omulondo gosĩ wa Hadarezerĩ omwami wʼeZoba,

¹⁰mwatuma Hadoramũ mugala wuwe oko mwami Dawĩdĩ, erĩmũkerya, nʼerimutsumula, kusangwa iniamabilwa na Hadarezerĩ nʼerĩmwĩta, kusangwa Hadarezerĩ abya iniakalwa na Toũ. Kandi Hadoramũ mwaleta emihanda yosĩ yʼebindu byʼesyamagetsi nʼekĩtsĩpa nʼemiringa.

¹¹Neryo omwami Dawĩdĩ mwahigulabyo busana nʼOmwami Mukulu, haguma nʼebĩtsĩpa nʼesyamagetsi ebyo anyega oko bihanda byosĩ; ebyʼeEdomũ, nʼebyʼeMoabũ, nʼebyʼabana ba Amonĩ, nʼebyʼAbafĩlĩstĩnĩ, nʼebyʼAbamalekĩ.

¹²Kandi Abĩsayĩ mugala wa Zerũya mwĩtĩra Abaedomũ omo Musya wʼOmũnyũ bandu elfu ĩkũmĩ nʼomunani (18,000).

¹³Neryo mwahĩra abateya eEdomũ; nʼAbaedomũ bosĩ mobabya bagombe ba Dawĩdĩ. Neryo Omwami Mukulu mwawatĩkya Dawĩdĩ ehosĩ aya.

¹⁴Neryo Dawĩdĩ mwatabala oko Baĩsraelĩ bosĩ; mwahĩra erĩbanza nʼebitunganene busana nʼabandu buwe bosĩ.

¹⁵Na Yoabũ mugala wa Zerũya abya mukulu wʼemilondo yʼamalwa; na Yehosafatĩ mugala wa Ahĩlũdĩ abya mũhandĩkĩ wʼekitabu;

¹⁶na Zadokĩ mugala wa Ahĩtũbũ, na Abĩmelekĩ mugala wa Abĩatarĩ, babya bahererĩ; na Sawũsa abya mũhandĩkĩ.

¹⁷Na Benaya mugala wa Yehoyada abya mukulu wʼAbakeretĩ nʼAbapeletĩ; nʼabagala ba Dawĩdĩ babya bakulu abakatĩmba oko mwami.