Read nande 1 Emyatsi yʼEmigulu 19 Bible Online

1 Emyatsi yʼEmigulu 19 - nande bible

1 Emyatsi yʼEmigulu 19

¹Neryo enyũma kwʼaho, Nahasĩ omwami wʼAbaamonĩ mwahola, nʼomugala wuwe mwabya mwami omo mwanya wuwe.

²Neryo Dawĩdĩ mwabũga ati, Ngandĩkangya ekibuya uku Hanũnĩ mugala wa Nahasĩ, kusangwa tata wuwe mwanyĩkangya ekibuya. Neryo Dawĩdĩ mwatuma abakwenda erĩyamũkĩranĩa busana na tata wuwe. Neryo abagombe ba Dawĩdĩ mobahĩka omo kihugo kyʼabana ba Amonĩ uku Hanũnĩ, erĩmũkĩranĩa.

³Nĩkwa abanya-mwami bʼAbaamonĩ mobabwira Hanũnĩ bati, Ũkaganĩraya uti Dawĩdĩ akasĩkaya tata wawe ati akakutuma kwʼabakĩranĩa kwehĩ? Abagombe buwe sĩbakakũhĩkako busana nʼerisonda-sonda, nʼerĩherya, nʼeriringa ekihugo kwehĩ?

⁴Neryo Hanũnĩ mwahamba abagombe ba Dawĩdĩ, mwasĩsabo, mwatwĩra esyongimba syabo omo katĩkatĩ, erĩhĩka oko matako wabo, neryo mwatsindikabo.

⁵Neryo abandi bandu, mobayabwira Dawĩdĩ ngoko bakolera bandu abo. Neryo mwatuma abʼerĩhĩndana nabo; kusangwa abalume abo ibabirihemuka kutsibu. Neryo omwami mwabũga, ati, Mulinde eYerĩko erĩhĩka aho esyonderũ syenyũ syasyalasira, neryo mwasyasubula.

⁶Neryo omugulu abana ba Amonĩ balangira ngoko bamabiyiyira mo kĩponĩrwe na Dawĩdĩ, Hanũnĩ nʼabana ba Amonĩ mobatuma esyotalanta elfu nguma (1,000) syʼekĩtsĩpa eriyagemula esyogalĩ nʼabali oko syosabayĩrĩ erĩlũa eMesopotamia, nʼerĩlũa eAramũ-Maka, nʼerĩlũa eZoba.

⁷Ko bayagemula batya esyogalĩ elfu makũmĩ asatu nʼĩbĩrĩ (32,000), nʼomwami wʼeMaka nʼabandu buwe, abasa nʼerihanda ekilaliriro embere wʼeMedeba. Nʼabana ba Amonĩ mobayĩhĩndanĩa haguma bakalũa oko mĩyĩ yabo, mobasa erilwa.

⁸Neryo omugulu Dawĩdĩ owakyo, mwatuma Yoabũ nʼomulondo gosĩ wʼesyombangĩ.

⁹Nʼabana ba Amonĩ mobahuluka mobategekanĩa malwa oko lũkyo lʼomũyĩ; nʼabami abasa mobabya aho wabo omo kisuki.

¹⁰Neryo omugulu Yoabũ alangira ngoko amalwa atekĩre embere siwe nʼenyũma siwe, mwayisoga abundu omo katĩkatĩ kʼabayĩsogĩrwe bʼAbaĩsraelĩ, mwategekanĩabo embere syʼAbasũrĩa.

¹¹Nʼabandi bandu abasaka mwahĩrabo omo byala bya Abĩsayĩ mugala wabo; nabo mobayĩtegekanĩa erilwa nʼAbaamonĩ.

¹²Neryo mwabũga ati, Abasũrĩa bamabya banyĩlabĩrye maka, ũkandĩnyĩwatĩkya; nĩkwa abana ba Amonĩ bamayira amaka kwilaba we, neryo ĩnakũwatĩkya.

¹³Uhande omutima, tukole ngʼabalume busana nʼabandu betu na busana nʼemĩyĩ ya Nyamuhanga wetu; nʼOmwami Mukulu akole ekibuya omo meso wuwe.

¹⁴Neryo Yoabũ nʼabandu ababya haguma naye mobasegera hakũhĩ erilwa nʼAbasũrĩa; nabo mobasaga embere siwe.

¹⁵Nʼabana ba Amonĩ babere babilangira ngoko Basũrĩa bamabisaga, nabo mobatibita embere sya Abĩsayĩ, mobingira omo mũyĩ. Neryo Yoabũ mwahĩka eYerũsalema.

¹⁶Nʼomugulu Abasũrĩa balangira ngoko bamabĩkĩndwa embere syʼAbaĩsraelĩ, mobatuma abakwenda, erienda Abasũrĩa ababya eyisirya wʼolũsĩ lwʼeEfũratĩ haguma na Sofakĩ omukulu wʼomulondo wa Hadarezerĩ erisondolabo.

¹⁷Neryo Dawĩdĩ mwabwirwa; naye mwahĩndanĩa Abaĩsraelĩ bosĩ bo haguma, mwasoka eYorodanĩ, mwahĩka kubo, mwategekanĩa malwa busana nabo. Neryo Dawĩdĩ abere abĩtegekanĩa malwa busana nʼAbasũrĩa, mobalwa naye.

¹⁸NʼAbanya Sũrĩa mobasaga Abaĩsraelĩ; na Dawĩdĩ mwĩta Abasũrĩa abʼesyogalĩ elfu irinda (7,000), nʼabakagenda omo bisando elfu makũmĩ ani (40,000), mwĩta na Sofakĩ omukulu wʼomulondo.

¹⁹Nʼomugulu abagombe ba Hadarezerĩ balangira ngoko bamabĩkĩndwa nʼAbaĩsraelĩ, mobasakana na Dawĩdĩ omo buholo, mobamukolera. Neryo Abasũrĩa mobataswalĩga erĩwatĩkya abana ba Amonĩ kandi.