Read nande 1 Emyatsi yʼEmigulu 20 Bible Online

1 Emyatsi yʼEmigulu 20 - nande bible

1 Emyatsi yʼEmigulu 20

¹Neryo oko mugulu Omwaka ahwa, oko mugulu abami bakayalwa, Yoabũ mwahũlũkya omulondo, mwaherya ekihugo kyʼabana ba Amonĩ, neryo mwayabambira eRaba. Nĩkwa Dawĩdĩ mwasĩgala eYerũsalema. Na Yoabũ mwahĩsya eRaba nʼerĩkĩndago.

²Na Dawĩdĩ mwalũsya embĩta yʼOmwami wabo oko mutwe wuwe, mwabana obũlĩto bwayo ini talanta nguma yʼesyamagetsi kandi yabya mwʼerĩbwe lyʼobũgũlĩ bunene; neryo embĩta eyo moyahĩrwa oko mutwe wa Dawĩdĩ. Kandi Dawĩdĩ mwahũlũkya obunyegwa bʼomũyĩ, bunene kutsibu.

³Neryo mwahũlũkya abandu ababya mugo, mwatsũtsangabo omo bisego, nʼomo byuma bĩtwĩre, nʼomo syombasa. Na Dawĩdĩ kwʼakola atya oko mĩyĩ yosĩ yʼabana ba Amonĩ. Neryo Dawĩdĩ nʼabandu bosĩ mobasuba eYerũsalema.

⁴Neryo enyũma wʼaho, amalwa mwahuluka eGezerĩ nʼAbafĩlĩstĩnĩ; neryo Sĩbekaĩ Omũhũsatĩ mwĩta Sĩpaĩ, ogʼoko bagala bʼomundu muli-muli; neryo mobakĩndwa.

⁵Neryo kandi mohabya amalwa nʼAbafĩlĩstĩnĩ; na Elhananĩ mugala wa Yaĩrĩ mwĩta Lamĩ mugala wabo Golĩata Omũgĩtĩ, nʼolumango lwʼerĩtũmo liwe lwabya ngʼomuti gʼomũlũkĩ.

⁶Kandi mohabya malwa eGatĩ, ahabya omundu muli-muli, nʼeminwe nʼamano wuwe abya makũmĩ abiri nʼawani, oko buli byala ndatu, nʼoko buli kisando ndatu; naye abya mwana wʼabandu bali-bali.

⁷Kandi omugulu atsuma Abaĩsraelĩ, Yonatana mugala wa Sĩmea mugala wabo Dawĩdĩ mwamwĩta.

⁸Aba babya bana bʼabandu bali-bali eGatĩ; mobawa omo byala bya Dawĩdĩ, nʼomo byala byʼabagombe buwe.