Read nande 1 Emyatsi yʼEmigulu 21 Bible Online

1 Emyatsi yʼEmigulu 21 - nande bible

1 Emyatsi yʼEmigulu 21

¹Neryo Satanĩ mwahangana erilwa nʼAbaĩsraelĩ neryo mwateba Dawĩdĩ aganze Abaĩsraelĩ.

²Neryo Dawĩdĩ mwabwira Yoabũ nʼabanya-mwami bʼabandu ati, Mugende, muganze Abaĩsraelĩ erĩtsũka eBerĩ-seba nʼerĩhĩka eDanĩ; neryo munyiretere omwatsi, inatoka eriminya emiganzo yabo.

³Neryo Yoabũ mwabũga ati, Omwami Mukulu akanyaye abandu buwe ngendo ĩgana kwilaba ko bali, rino; nĩkwa, omukama wage omwami, abosĩ si bagombe bʼomukama wage kwehĩ? Busana nakĩ omukama wage akasonda omwatsi oyũ kwehĩ? Busana nakĩ akaletera Abaĩsraelĩ bʼomusango kwehĩ?

⁴Nĩkwa ekĩnywa kyʼOmwami mokyakala oko kya Yoabũ. Neryo Yoabũ mwalũaho, mwalaba omo Baĩsraelĩ bosĩ, mwahĩka eYerũsalema.

⁵Neryo Yoabũ mwaha Dawĩdĩ emiganzo yʼabandu. NʼAbaĩsraelĩ bosĩ abalume abakakula omũyalĩ mobabya mĩlĩonĩ nguma na elfu erĩgana (1,100,000); nʼAbayũda babya elfu magana ani nʼamakũmĩ alinda (470,000) abakakula omũyalĩ.

⁶Nĩkwa mwataganzira Abalawĩ nʼAbabenyamĩna omo katĩkatĩ kabo; kusangwa ekĩnywa kyʼOmwami kyabya nye uku Yoabũ.

⁷Neryo Nyamuhanga mwatatsemera omwatsi oyũ; busana nʼekyo mwaswĩrya Abaĩsraelĩ.

⁸Na Dawĩdĩ mwabwira Nyamuhanga ati, Nabĩrĩhalya kutsibu, kusangwa nabirikola omwatsi oyũ; nĩkwa lino kĩsĩ-kĩsĩ ũlũsaye ebibi byʼomugombe wawe; kusangwa nabirikola omo bũkĩrũ kutsibu.

⁹Neryo Omwami Mukulu mwabwira Gadĩ, omũlangĩrĩ wa Dawĩdĩ ati,

¹⁰Ugende, Ubwire Dawĩdĩ uti, Omwami Mukulu ati, Namakũhererya myatsi ĩsatu: Uyisoge ogo nangakukolera omo katĩkatĩ kayo.

¹¹Neryo Gadĩ mwahĩka uku Dawĩdĩ, mwamubwira ati, Omwami Mukulu amabũga ati, Ũlĩge ekyo wanzĩre:

¹²emyaka ĩsatu yʼenzala; kutse emikera ĩsatu erĩherĩbwa embere syʼesonzĩgũ syawe omugulu omũyalĩ wʼesyonzĩgũ syawe akakũhĩkako; kutse ebiro bisatu byʼomũyalĩ wʼOmwami Mukulu gʼobũkoni bwʼakasũsũ omo kihugo, nʼomũlaĩka wʼOmwami Mukulu akaheraya omo mitano yosĩ yʼAbaĩsraelĩ. Neryo ũganĩraye lino erĩsũbĩrya eryo nasyasũbya ukwʼoyo wanyituma.

¹³Na Dawĩdĩ mwabwira Gadĩ ati, Namahatatana kutsibu; ngakũbũlaya nyiti uleke nyiwe omo byala byʼOmwami Mukulu kusangwa olukogo luwe ni lungi; Suleke ngawa omo byala byʼomundu.

¹⁴Neryo Omwami Mukulu mwatuma obũkonĩ bwʼakasũsũ oko Baĩsraelĩ; neryo Abaĩsraelĩ mobawa bandu elfu makũmĩ alinda (70,000).

¹⁵Na Nyamuhanga mwatuma omũlaĩka eYerũsalema erĩheryago naye abere asonda erĩheryako, Omwami Mukulu mwasamalira, mwayĩganĩa busana nʼekibi ekyo, neryo mwabwira omũlaĩka wʼerĩherya ati, Bingaho; ũkakĩraye ebyala byawe. Nʼomũlaĩka wʼOmwami Mukulu abya imene hakũhĩ nʼekibuga kyʼerĩhũmbĩramo kya Ornanĩ Omũyebũsĩ.

¹⁶Na Dawĩdĩ mwasumba ameso wuwe mwalangira omũlaĩka wʼOmwami Mukulu inianimene omo katĩkatĩ kʼekihugo nʼolubula, iniawite oko mũyalĩ owakũlĩre omo byala biwe ĩnĩayĩsũmbĩre endata oko Yerũsalema. Neryo Dawĩdĩ nʼabakulu, ibambite emisarandwe, mobatũlama ahisi.

¹⁷Na Dawĩdĩ mwabwira Nyamuhanga ati, Sĩ ngye nahana nyiti abandu baganzawe kwehĩ? Nĩna ngye nabĩrĩhalya nʼerikola nabi kutsibu; nĩkwa esyombũlĩ esĩ, syakolĩrekĩ kwehĩ? Uwe Mwami Mukulu, Nyamuhanga wage, kĩsĩ-kĩsĩ, ebyala byawe bibye ũkwʼĩngye, nʼoko nyũmba ya tata wage; butsira oko bandu bawe erĩkwa.

¹⁸Neryo omũlaĩka wʼOmwami Mukulu mwahamula Gadĩ abwire Dawĩdĩ ati, Dawĩdĩ ahetuke, erĩyahĩmba ekiherero busana nʼOmwami Mukulu omo kibuga kyʼerĩhũmbĩramo kya Ornanĩ Omũyebũsĩ.

¹⁹Na Dawĩdĩ mwahetuka busana nʼerĩbũga lya Gadĩ ekyo abũga omo lĩna lyʼOmwami Mukulu.

²⁰Neryo Ornanĩ mwakeba, mwalangira omũlaĩka, nʼabagala buwe bani ababya haguma naye mobayĩbĩsa. Na Ornanĩ abya ĩnĩakahũmba engano.

²¹Neryo omugulu Dawĩdĩ abya akahĩka uku Ornanĩ, Ornanĩ mwasamalira mwalangira Dawĩdĩ, mwalũa omo kibuga kyʼerĩhũmbĩramo, mũnamira Dawĩdĩ, mwamũtũlamĩra ahisi oko kitaka.

²²Neryo Dawĩdĩ mwabwira Ornanĩ ati, Umba ekibuga kyʼerĩhũmbĩramo ekĩ, inatoka erĩhĩmbaho ekiherero busana nʼOmwami Mukulu; wasyambakyo omo nzwere yakyo yosĩ, obũkonĩ bwʼakasũsũ bũkakĩrĩbawe oko bandu.

²³Na Ornanĩ mwabwira Dawĩdĩ ati, Ũyĩmĩrayekyo, mukama wage iye mwami akole ekyamabya kibuya omo meso wuwe; lebaya, ngakuha nʼesyonume syʼesyonde busana nʼamahere wʼerĩokererya, nʼemĩhũmbo busana nʼesyongwĩ, nʼengano busana nʼobuhere bwʼeyĩsyano; ngandiha ebyosĩ.

²⁴Nʼomwami Dawĩdĩ mwabwira Ornanĩ ati, Iyihi; nĩkwa ngandigulakyo omo nzwere yosĩ; kusangwa sĩndĩendĩsyĩmya ebyawe busana nʼOmwami Mukulu, kutse erihonga obuhere bwʼerĩokererya butsira bũgũlĩ.

²⁵Neryo Dawĩdĩ mwaha Ornanĩ esyosekelĩ syʼesyamagetsi amagana ndatu (600) omo lulengo wʼekĩlo busana naho.

²⁶Neryo Dawĩdĩ mwahĩmbaho ekiherero busana nʼOmwami Mukulu, kandi mwahonga amahere wʼerĩokererya nʼamahere wʼobuholo, mwalakira Omwami Mukulu; naye mwamũsũbĩrya erĩlũa elubula omo muliro oko kiherero kyʼobuhere bwʼerĩokererya.

²⁷Nʼomwami Mukulu mwahana omũlaĩka; naye mwasũbya omũyalĩ wuwe gʼomo lubo lwago.

²⁸Nʼoko mugulu oyo, omugulu Dawĩdĩ alangira ngoko Mwami Mukulu amũsũbĩraya omo kibuga kyʼerĩhũmbĩramo kya Ornanĩ Omũyebũsĩ, neryo mwahereraho amahere.

²⁹Kusangwa eHema yʼOmwami Mukulu, eyo Musa ahanda omo mbwarara, nʼekiherero kyʼobuhere bwʼerĩokererya, byabya oko mugulu oyo oko hendata bʼeGĩbeonĩ.

³⁰Nĩkwa Dawĩdĩ mwatatoka eriyaho erĩbũlya Nyamuhanga; kusangwa abya akubaha busana nʼomũyalĩ wʼomũlaĩka wʼOmwami Mukulu.