Read nande 1 Emyatsi yʼEmigulu 22 Bible Online

1 Emyatsi yʼEmigulu 22 - nande bible

1 Emyatsi yʼEmigulu 22

¹Neryo Dawĩdĩ mwabũga ati, Eyĩ nĩ nyũmba yʼOmwami Mukulu Nyamuhanga, na hano ni kiherero kyʼobuhere bwʼerĩokererya busana nʼAbaĩsraelĩ.

²Neryo Dawĩdĩ mwahana erĩhĩndanĩa ababunga ababya omo kihugo kya Ĩsraelĩ; neryo mwahĩra abahĩmbĩ bʼeribatsa mabwe wʼerĩhĩmba enyũmba ya Nyamuhanga.

³Na Dawĩdĩ mwakokotya ebyuma bingi busana nʼemĩsũmalĩ busana nʼesyonyũyĩ oko syongyo, na busana nʼebĩhambĩrĩrĩ; nʼemiringa minene eyitawite lulengo lwʼekĩlo;

⁴nʼemiti yʼemĩerezĩ eyitawite miganzo; kusangwa Abasĩdonĩ nʼAbatĩro mobaletera Dawĩdĩ yʼemiti mingi yʼemĩerezĩ.

⁵Neryo Dawĩdĩ mwabũga ati, Solomono mugala wage ni mulere, kandi ni molo, nʼenyũmba eyĩkandĩsyahĩmbwa busana nʼOmwami Mukulu itolere iyakanga kutsibu nʼerĩkũmayira nʼeyʼolukengerwa omo bihugo byosĩ. Nage ngandĩsyakokotya busana nayo. Neryo Dawĩdĩ mwakokotya bingi embere wʼoluholo luwe.

⁶Neryo mwabirikira mugala wuwe Solomono, mwamuhana busana nʼerĩhĩmba enyũmba busana nʼOmwami Mukulu, Nyamuhanga wa Ĩsraelĩ.

⁷Na Dawĩdĩ mwabwira mugala wuwe Solomono ati, Ũkwʼĩngye kyabya omo mutima wage erĩhĩmba enyũmba busana nʼerĩna lyʼOmwami Mukulu Nyamuhanga wage.

⁸Nĩkwa ekĩnywa kyʼOmwami Mukulu mokyambĩkako kiti, Wabĩrĩũta omusasi mungi, iwabirilwa amalwa mangi. Sĩwendĩsyahĩmba enyũmba busana nʼerĩna lyage, kusangwa wabĩrĩũta musasi mungi oko kihugo omo meso wage.

⁹Lebaya, wasyabuta mugala, oyo Wasyabya mundu ũhũmwĩre; nage nasyamuha erihumula oko nzĩgũ siwe syosĩ oko mbande syosĩ; kusangwa erĩna liwe lyasyabya Solomono, nage nasyamuha Obuholo nʼerĩtũlera oko Ĩsraelĩ omo biro biwe.

¹⁰Iye asyahĩmba enyũmba busana nʼerĩna lyage; naye asyabya mugala wage, nage nasyabya tata wuwe; nasyahanganĩa ekĩtũmbĩ kyʼobwami buwe oko Ĩsraelĩ kera na kera.

¹¹Neryo lino mugala wage, Omwami Mukulu abye haguma nawe; ubane omũyĩsa, ũhĩmbe enyũmba yʼOmwami Mukulu Nyamuhanga wawe, ngoko abĩrĩbũga busana nawe.

¹²Ekiguma, Omwami Mukulu akuhe amenge nʼeriminya, akuhamule busana nʼAbaĩsraelĩ; litya iwatoka erĩteya ebihano byʼOmwami Mukulu Nyamuhanga wawe.

¹³Neryo Wasyabana omũyĩsa wamateya erikola emigambo, nʼebilayiro ebyo Mwami Mukulu ahana Musa busana nʼAbaĩsraelĩ. Uyire maka, uhande omutima; Sigubahe, sũhanga-hangaye.

¹⁴Na lino lebaya, omo bũlĩge bwage nabĩrĩtegekanĩa busana nʼenyũmba yʼOmwami Mukulu, esyotalanta syʼesyamagetsi elfu erĩgana (100,000), nʼesyotalanta mĩlĩonĩ nguma (1,000,000) syʼekĩtsĩpa, nʼemiringa nʼebyuma ebitawite olulengo lwʼekĩlo, kusangwa ni bingi; nʼemiti nʼamabwe nabĩrĩtegekanĩabyo nibya; nawe wanganatomeka kubyo.

¹⁵Kandi uwite abanyima-nyima bangi, ababatsĩ nʼabanyima-nyima bʼamabwe nʼemiti, nʼobuli mundu munyima-nyima busana nʼobuli mũbĩrĩ.

¹⁶Esyamagetsi, nʼekĩtsĩpa, nʼemiringa, nʼebyuma, sibyeganzika. Hangana, Ukole, Omwami Mukulu abye haguma nawe.

¹⁷Dawĩdĩ mwahamula abakulu bosĩ bʼAbaĩsraelĩ erĩwatĩkya Solomono mugala wuwe, ati,

¹⁸Omwami Mukulu Nyamuhanga wenyũ siali haguma nenyũ kwehĩ? Naye sĩalĩtabahũmũlya oko mbande syosĩ kwehĩ? Kusangwa abĩrĩhĩra esyondũlanĩ syʼekihugo omo byala byage; nʼekihugo kyabĩrĩgondĩbwa embere syʼOmwami Mukulu nʼembere syʼabandu buwe.

¹⁹Na lino mũhĩre emitima yenyũ nʼebĩrĩmũ byenyũ erisonda-sonda Omwami Mukulu Nyamuhanga wenyũ; neryo muhangane, mũhĩmbe ahabũyĩrĩre hʼOmwami Mukulu Nyamuhanga, erireta erĩsandũko lyʼerilagana lyʼOmwami Mukulu, nʼebindu bĩbũyĩrĩre bya Nyamuhanga, omo nyũmba eyĩkandĩsyahĩmbwa busana nʼerĩna lyʼOmwami Mukulu.