Read nande 1 Emyatsi yʼEmigulu 23 Bible Online

1 Emyatsi yʼEmigulu 23 - nande bible

1 Emyatsi yʼEmigulu 23

¹Neryo omugulu Dawĩdĩ akula mwakululira; neryo mwayira mugala wuwe Solomono mo mwami wʼAbaĩsraelĩ.

²Neryo mwahĩndanĩa abakulu bosĩ bʼAbaĩsraelĩ, haguma nʼabahererĩ nʼAbalawĩ.

³NʼAbalawĩ mobaganzwa erĩtsũka oko myaka makũmĩ asatu na mingi kwʼaho; nʼemiganzo yʼemitwe yabo, muguma muguma, yabya elfu makũmĩ asatu nʼomunani (38,000).

⁴Ukwʼaba, elfu makũmĩ abiri nʼĩnĩ (24,000) babya bateya bʼomũbĩrĩ wʼenyũmba yʼOmwami Mukulu; nʼeelfu ndatu (6,000) babya bakulu nʼabatswerĩ;

⁵nʼeelfu ĩnĩ (4,000) babya bateya bʼesyonyũyĩ; nʼeelfu ĩnĩ (4,000) ibakapipa Omwami Mukulu omo binanga ebyo Dawĩdĩ abamba eripipa mubyo.

⁶Neryo Dawĩdĩ mwagababo mo milondo ngʼabagala ba Lawĩ: Gerĩsonĩ, na Kohatĩ, na Merarĩ.

⁷Oko Bagerĩsonĩ: Ladanĩ na Sĩmeĩ.

⁸Abagala ba Ladanĩ babya basatu, ye Yehĩelĩ yo mukulu, na Zetamũ, na Yoelĩ.

⁹Abagala ba Sĩmeĩ babya: Selomotĩ, na Hazĩelĩ, na Haranĩ, abasatu. Aba babya bakulu bʼebĩtũnga byʼabotata ba Ladanĩ.

¹⁰Nʼabagala ba Sĩmeĩ babya: ye Yahatĩ, na Zĩna, na Yeũsĩ, na Berĩa. Aba babya bani abagala ba Sĩmeĩ.

¹¹Na Yahatĩ abya mukulu, na Zĩna wʼakabiri; nĩkwa Yeũsĩ na Berĩa mobatayira bagala bangi; kyaleka ibabya kĩtũnga kyʼabotata omwʼiganza liguma.

¹²Abagala ba Kohatĩ babya bani, ye Amũramũ, na Ĩzĩharĩ, na Hebũronĩ, na Ũzĩelĩ.

¹³Abagala ba Amũramũ babya: ye Harũnĩ na Musa. Na Harũnĩ rnwasombolwa erimuhigula eribya mũbũyĩrĩre kutsibu, iye nʼabagala buwe, ebiro byosĩ, erĩhĩsya obukwa embere syʼOmwami Mukulu, erimukolera, nʼeritsumula erĩna liwe kera na kera.

¹⁴Nĩkwa Musa omundu wa Nyamuhanga, abagala buwe mobaganzirwa omo katĩkatĩ kʼekihanda kya Lawĩ.

¹⁵Abagala ba Musa babya: ye Gerĩsomĩ na Elĩezerĩ.

¹⁶Omugala wa Gerĩsomĩ abya: Sebũelĩ, iyo mukulu.

¹⁷Nʼomugala wa Elĩezerĩ abya: Rehabĩa, ĩyo mukulu. Na Elĩezerĩ mwatabya nʼabandi bagala; nĩkwa bagala ba Rehabĩa babya bangi kutsibu.

¹⁸Omugala wa Ĩsĩharĩ abya: ye Selomĩte iyo mukulu.

¹⁹Abagala ba Hebũronĩ babya: Yerĩa iyo mukulu, na Amarĩa wʼakabiri, na Yahazĩelĩ wʼakasatu, na Yekameamũ wʼakani.

²⁰Abagala ba Ũzĩelĩ babya: Mĩka akambere, na Ĩsĩa wʼakabiri.

²¹Abagala ba Merarĩ babya: Malĩ na Mũsĩ. Abagala ba Malĩ babya: Eleazarĩ na Kĩsĩ.

²²Na Eleazarĩ mwahola, isiawite bagala, nĩkwa abali basa; nʼabagala babo bagala ba Kĩsĩ mobahĩkyabo.

²³Abagala ba Mũsĩ babya basatu; Malĩ, na Ederĩ, na Yeremotĩ.

²⁴Aba babya bagala ba Lawĩ ngʼebĩtũnga byʼabotata wabo, abakulu bʼebĩtũnga byʼabotata wabo abaganzawa, omo miganzo yabo, abakola oko mũbĩrĩ wʼenyũmba yʼOmwami Mukulu, erĩtsũka oko myaka makũmĩ abiri nʼemingi kwʼaho.

²⁵Kusangwa Dawĩdĩ mwabũga ati, Omwami Mukulu, Nyamuhanga wa Ĩsraelĩ abĩrĩhũmũlya abandu buwe; naye ĩkere eYerũsalema ebiro byosĩ.

²⁶NʼAbalawĩ sibendisyabya nʼobwaga bwʼeriheka eHema nʼebindu byayo busana nʼomũbĩrĩ wayo.

²⁷Kusangwa omo bĩnywa byʼenyũma bya Dawĩdĩ, abagala ba Lawĩ mobaganzwa, erĩtsũka oko myaka makũmĩ abiri nʼemingi kwʼaho.

²⁸Kusangwa omũbĩrĩ wabo abya wʼerikolera abagala ba Harũnĩ busana nʼomũbĩrĩ wʼenyũmba yʼOmwami Mukulu, omo bibuga, nʼomo byumba, nʼerĩerya ebindu bĩbũyĩrĩre byosĩ, ebyʼerikola omũbĩrĩ wʼenyũmba ya Nyamuhanga;

²⁹busana nʼobundu bwʼerĩkanganĩa nibya, na busana nʼeyĩsyano eyiswere kutsibu busana nʼobuhere bwʼeyĩsyano, yamabya yʼobundu obute mo kĩhamya kutse eyĩkakotsĩbawa oko luyo, kutse eyĩkahĩrawa omo magũta, na busana nʼemihanda yosĩ yʼolulengo nʼobuli;

³⁰nʼerihangana obuli ngyakya eriha ewasĩngya nʼeripipa Omwami Mukulu, nʼomwʼĩgolo-golo nibya;

³¹nʼerihonga amahere gosĩ wʼerĩokererya busana nʼOmwami Mukulu omo syoSabato, nʼomo mikera mihya-mihya, nʼoko biro bikulu ebyahamulawa, omo miganzo ko yahamulawa busana nabyo, emigulu yosĩ embere syʼOmwami Mukulu;

³²kandi bategaye eHema yʼerĩhĩndanamo, nʼahabũyĩrĩre, nʼerĩteya bagala ba Harũnĩ, abagala babo, busana nʼomũbĩrĩ wʼenyũmba yʼOmwami Mukulu.