Read nande 1 Emyatsi yʼEmigulu 26 Bible Online

1 Emyatsi yʼEmigulu 26 - nande bible

1 Emyatsi yʼEmigulu 26

¹Busana nʼemĩbĩrĩ yʼabateya bʼesyonyũyĩ: Abakora, Meselemĩa mugala wa Kora, oko bagala ba Asafũ.

²Na Meselemĩa mwabya nʼabagala: Zekarĩa yo kambere, Yedĩelĩ wʼakabiri, na Zebadĩa wʼakasatu, na Yatĩnĩelĩ wʼakani,

³Elamũ wʼakatanu, na Yehohanamũ wʼendatu, na Elĩehoenayĩ wʼabalinda.

⁴Obedĩ-edomũ mwabya nʼabagala: Semaya akambere, na Yehozabadĩ wʼakabiri, na Yoa wʼakasatu, na Sakarĩ wʼakani, na Netanelĩ wʼakatanu,

⁵na Amĩelĩ wʼendatu, na Ĩsakarĩ wʼakalinda, na Peũletayĩ wʼomunani; kusangwa Nyamuhanga mwamutsumula.

⁶Neryo Semaya mugala wuwe mwabuta bagala abatabala oko kĩtũnga kya tata wabo, kusangwa babya mbangĩ syʼamaka.

⁷Abagala ba Semaya babya Otĩnĩ, na Rafaelĩ, na Obedĩ, na Elĩzabadĩ, nʼabagala babo babya mbangĩ ye Elĩhũ, na Semakĩa.

⁸Abosĩ aba babya bagala ba Obedĩ-edomũ: ibo nʼabagala, nʼabagala babo, abandu bʼamaka busana nʼomũbĩrĩ; Abaobedĩ-Edomũ makũmĩ ndatu nʼababiri.

⁹Na Meselemĩa mwabya nʼabagala nʼabagala babo; abandu bʼamaka, erĩkũmĩ nʼomunani.

¹⁰Na Hosa, wʼabana ba Merarĩ abya nʼabagala: Sĩmĩrĩ omukulu (kusangwa nomo atabya kambere, tata wuwe mwamuyira mo mukulu),

¹¹Hĩlkĩa wʼakabiri, na Tebalĩa, wʼakasatu, na Zekarĩa wʼakanĩ; abagala bosĩ nʼabagala babo Hosa babya erĩkũmĩ nʼabasatu.

¹²Ukwʼaba mohabya erigaba lyʼabateya bʼesyonyũyĩ, abandu bakulu, ibawite omũbĩrĩ ngʼabagala babo, erikola omo nyũmba yʼOmwami Mukulu.

¹³Mobagusa emigereko, abake-bake nʼabakulu bakulu ngʼebĩtũnga byʼabotata wabo busana nʼobuli lũkyo.

¹⁴Omugereko wʼebwanga bwʼendata mwatogera Selemĩa. Neryo enyũma wʼaho mobagusa emigereko busana na Zekarĩa mugala wuwe omũhanĩ wʼamenge; nʼomugereko wuwe mwahulukira ebwanga bwʼelutambi lwʼendata.

¹⁵Nʼuku Obedĩ-edomũ elutambi lwʼeyĩkwa; nʼuku bagala buwe enyũmba yʼembĩso.

¹⁶Uku Sũpĩmũ na Hosa ebwanga bwʼeyĩkwa, hakũhĩ nʼolũkyo lwa Salĩketĩ, oko nzira eyikahetuka, obũteya eyisirya oko bũteya.

¹⁷Ebwanga bwʼendata habya Abalawĩ ndatu, nʼelutambi lwʼendata abani obuli kiro, nʼelutambi lwʼeyĩkwa abani obuli kiro, na busana nʼenyũmba yʼembĩso babiri babiri.

¹⁸Oko nyũmba eyahĩmbawa oko mũsĩke wʼeyĩkwa mohabya bani abakahetuka, kandi ababiri hakũhĩ nʼenyũmba eyo.

¹⁹Aya abya amahango wʼabateya bʼesyongyo; oko bagala ba Kora, nʼoko bagala ba Merarĩ.

²⁰Nʼoko Balawĩ, Ahĩya abya mukulu wʼebindu byʼenyũmba ya Nyamuhanga, nʼoko bindu bĩbũyĩrĩre.

²¹Abagala ba Ladanĩ, abagala bʼAbagersonĩ nĩ ba Ladanĩ, abakulu bʼebĩtũnga byʼabotata nĩ ba Ladanĩ Omũgersonĩ: ye Yehĩelĩ.

²²Abagala ba Yehĩelĩ: Zetamũ, na Yoelĩ mugala wabo, abakulu bʼebindu byʼenyũmba yʼOmwami Mukulu.

²³Oko Baamũramũ, nʼAbaĩsĩharĩ, nʼAbahebũronĩ, nʼAbaũsĩelĩ;

²⁴na Sebũelĩ mugala wa Gersonĩ, mugala wa Musa, abya mũtabalĩ wʼebindu ebyo.

²⁵Kandi abagala babo: uku Elĩezerĩ habya mugala wuwe Rehabĩa na Yesaya mugala wuwe, na Yoramũ mugala wuwe, na Zĩkĩrĩ mugala wuwe, na Selomotĩ mugala wuwe.

²⁶Selomotĩ oyũ nʼabagala babo babya bateya bʼebindu byosĩ ebyasololawa, ebyo mwami Dawĩdĩ, nʼabakulu bʼebĩtũnga byʼabotata, nʼabakulu bʼamaelfu nʼamagana, nʼabakulu bʼomulondo, bahigula.

²⁷Omo bunyegwa, ebyahũngawa omo malwa mobahigulabyo busana nʼerĩsũbya enyũmba yʼOmwami Mukulu.

²⁸Nʼebyosĩ ebyo Samwelĩ mũlangĩrĩ, na Saũlo mugala wa Kĩsĩ, na Abĩnerĩ mugala wa Nerĩ, na Yoabũ mugala wa Zerũya, obuli mundu oyo wahigula ekindu, ebyosĩ byabya omo byala bya Selomotĩ, nʼabagala babo.

²⁹Oko Baĩsĩharĩ, na Kenanĩa, nʼabagala buwe babya busana nʼomũbĩrĩ wʼAbaĩsraelĩ wʼeyĩhya, eribya bakulu nʼabatswerĩ.

³⁰Oko Bahebũronĩ, ye Hasabĩra nʼabagala babo, esyombangĩ elfu nguma nʼamagana alinda (1,700), babya bahanganĩrĩ ba Ĩsraelĩ eyisirya wʼeYorodanĩ oko luhande lwʼeyĩkwa, busana nʼomũbĩrĩ gosĩ wʼOmwami Mukulu, kandi busana nʼomũbĩrĩ wʼOmwami.

³¹Oko Bahebũronĩ, Yerĩa abya mukulu wʼAbahebũronĩ, ngʼesyondengo syabo omo bĩtũnga byʼabotata. Omo mwaka wʼamakũmĩ ani wʼeritabala lya Dawĩdĩ mobasondĩbwa, nʼabandu esyombangĩ kutsibu mosyabanika omo katĩkatĩ kabo eYazerĩ yʼeGĩleadĩ.

³²Nʼabagala babo, abandu banyima, babya elfu ĩbĩrĩ nʼamagana alinda (2,700), abakulu bʼebĩtũnga byʼabotata. Kandi omwami Dawĩdĩ mwahĩrabo mo balangĩrĩ oko Barũbenĩ, nʼAbagadĩ, nʼekihande kyʼekihanda kya Manase, busana nʼemyatsi yosĩ eya Nyamuhanga, na busana nʼemyatsi yʼOmwami.