Read nande 1 Emyatsi yʼEmigulu 27 Bible Online

1 Emyatsi yʼEmigulu 27 - nande bible

1 Emyatsi yʼEmigulu 27

¹Neryo eyĩ ye miganzo yʼabana ba Ĩsraelĩ, abakulu bʼebĩtũnga byʼabotata, nʼabakulu bʼamaelfu nʼamagana, nʼabakulu babo abakolera omwami, omo myatsi yosĩ yʼemilondo eyahĩka nʼerihuluka oko buli mukera omo mikera yosĩ yʼomwaka omo buli mulondo habya bandu elfu makũmĩ abiri nʼĩnĩ (24,000).

²Yasobeamũ, mugala wa Zabũdĩelĩ, abya akasondola omulondo wʼerĩmbere busana nʼomukera wʼerĩtsũka; nʼomo mulondo wuwe habya elfu makũmĩ abiri nʼĩnĩ (24,000).

³Iye abya wʼabana ba Peresĩ, abya mukulu wʼabasondolĩ bosĩ bʼemilondo busana nʼomukera wʼerĩtsũka.

⁴Dodayĩ Omũahoa, nʼomulondo wuwe, abya akasondola omulondo busana nʼomukera wʼakabiri; na Mĩkĩlotĩ abya mukulu wʼomulondo wuwe, nʼomo mulondo habya elfu makũmĩ abiri nʼĩnĩ (24,000).

⁵Omũsondolĩ wʼakasatu wʼemilondo busana nʼomukera wʼakasatu abya Benaya mugala wʼomũhererĩ Yehoyada; iye abya mukulu, nʼomo mulondo wuwe habya elfu makũmĩ abiri nʼĩnĩ (24,000).

⁶Benaya oyũ yo wabya mbangĩ yʼamakũmĩ asatu ayo, kandi abya mukulu wʼamakũmĩ asatu ayo; nʼoko mulondo wuwe habya Amĩzabadĩ mugala wuwe.

⁷Nʼomũsondolĩ wʼakani busana nʼomukera wʼakani habya Asahelĩ mugala wabo Yoabũ, na Zebadĩa mugala wuwe enyũma wuwe; nʼomo mulondo wuwe habya elfu makũmĩ abiri nʼĩnĩ (24,000).

⁸Omũsondolĩ wʼakatanu busana nʼomukera wʼakatanu abya Samũhũtĩ Omũĩsĩra: nʼomo mulondo wuwe habya elfu makũmĩ abiri nʼĩnĩ (24,000).

⁹Nʼomũsondolĩ wʼendatu busana nʼomukera wʼendatu habya Ĩra, mugala wa Ĩkesĩ Omũtekotũ; nʼomo mulondo wuwe habya elfu makũmĩ abiri nʼĩnĩ (24,000).

¹⁰Nʼomũsondolĩ wʼakalinda busana nʼomukera wʼakalinda abya Helesĩ Omũpelonĩ, wʼabana ba Efũraĩmũ; nʼomo mulondo wuwe habya elfu makũmĩ abiri nʼĩnĩ (24,000).

¹¹Omũsondolĩ wʼomunani busana nʼomukera wʼomunani abya Sĩbekayĩ Omũhũsa wʼAbazara; nʼomo mulondo wuwe habya elfu amakũmĩ abiri nʼĩnĩ (24,000).

¹²Nʼomũsondolĩ wʼomwenda busana nʼomukera wʼomwenda abya Abĩezerĩ Omũanatotĩ wʼAbabenyamĩna; nʼomo bũteya buwe mohabya elfu makũmĩ abiri nʼĩnĩ (24,000).

¹³Omũsondolĩ wʼerĩkũmĩ wʼomukera wʼerĩkũmĩ abya Maharaĩ, Omũnetofatĩ, wʼAbazera; nʼomo mulondo wuwe habya elfu makũmĩ abiri nʼĩnĩ (24,000).

¹⁴Omũsondolĩ wʼerĩkũmĩ nʼomuguma busana nʼomukera wʼerĩkũmĩ nʼomuguma abya Benaya Omũpĩratoni, wʼabana ba Efũraĩmũ; nʼomo mulondo wuwe habya elfu makũmĩ abiri nʼĩnĩ (24,000).

¹⁵Omũsondolĩ wʼerĩkũmĩ nʼababiri busana nʼomukera wʼerĩkũmĩ nʼeyĩbĩrĩ abya Heldayĩ Omũnetofatĩ, wa Otĩnĩelĩ; nʼomo mulondo wuwe habya elfu makũmĩ abiri nʼĩnĩ (24,000). Abasondolĩ bʼebihanda byʼAbaĩsraelĩ.

¹⁶Neryo oko bũteya bwʼebihanda bya Ĩsraelĩ: oko Barũbenĩ omũsondolĩ mukulu abya Elĩezerĩ mugala wa Sĩkĩrĩ; oko Basĩmeonĩ habya Sefatĩa mugala wa Maka;

¹⁷busana na Lawĩ: Hasabĩa mugala wa Kemũelĩ; busana na Harũnĩ, Zadokĩ;

¹⁸busana na Yũda, Elĩhũ, omuguma wʼoko bagala babo Dawĩdĩ; busana na Ĩsakarĩ, Omũrĩ, mugala wa Mĩkaelĩ;

¹⁹busana na Zebũlũnĩ, Ĩsamaya, mugala wa Obadĩa; busana na Nafũtalĩ, Yeremotĩ, mugala wa Azĩrĩelĩ;

²⁰busana nʼabagala ba Efũraĩmũ, Hosea mugala wa Azazĩa; busana nʼekihande kyʼekihanda kya Manase, ye Yoelĩ, mugala wa Pedaya;

²¹busana nʼekihande kyʼekihanda kya Manase eGĩleadĩ, Ĩdo, mugala wa Zekarĩa; busana na Benyamĩna, Yasĩelĩ, mugala wa Abĩnerĩ;

²²busana na Danĩ, Azarelĩ, mugala wa Yehohamũ. Aba bo babya bakulu bʼebihanda bya Ĩsraelĩ.

²³Nĩkwa Dawĩdĩ mwataganza abʼemyaka makũmĩ abiri nʼabalere kwʼaho, kusangwa Omwami Mukulu mwabũga ati, asyakanyĩa Ĩsraelĩ ngʼesyongũnũnũ syʼekyanya.

²⁴Yoabũ mugala wa Zerũya mwatsũka eriganzabo nĩkwa mwatabuga; neryo mohahĩka erihitana busana nʼekĩ oko Ĩsraelĩ; nibya emiganzo eyĩ moyĩtahĩrwa omwʼiganza lyʼemyatsi yʼOmwami Dawĩdĩ.

²⁵Neryo Azĩmawetĩ mugala wa Adĩelĩ abya mukulu wʼesyombĩso syʼOmwami. Na Yonatana mugala wa Ũzĩa abya mukulu wʼesyombĩso syʼomolĩ, nʼomo mĩyĩ, nʼomo hĩyĩ nʼomo manyũmba mali-mali.

²⁶Na Ezerĩ mugala wa Kalebũ abya mukulu wʼabakakola omũbĩrĩ wʼeririma malima.

²⁷Na Sĩmeĩ Omũramatĩ abya mukulu wʼamalima wʼebĩnyũ; na Zabũdĩ Omũsĩfimĩ abya mukulu wʼebĩnyũ busana nʼahabĩsawa ebĩnyũ omo kitaka.

²⁸Na Baalĩ-hananĩ Omũgederĩ abya mukulu wʼeihiti yʼeMĩzeĩtũnĩ nʼemiti yʼeMikuyu eyabya omo bwerere; na Yoasĩ abya mukulu wʼesyombĩso syʼamagũta.

²⁹Sĩtĩrayĩ Omũsaronĩ abya mukulu wʼebihangulo ebyalĩsĩbawa eSaronĩ; na Safatĩ mugala wa Adelayĩ abya mukulu wʼebihangulo ebyabya omo misya.

³⁰Obĩlĩ Omũĩsĩmaelĩ abya mukulu wʼesyongamia; na Yedeya Omũmeronotĩ abya mukulu wʼesyopunda; na Yasĩsĩ Omũhagĩrĩ abya mukulu wʼebihangulo byʼesyombũlĩ nʼesyombene-hene.

³¹Abosĩ aba babya bakulu bʼabatabalĩ bʼobũsokĩ obwabya bwa Dawĩdĩ.

³²Kandi Yonatana, ĩse-mulere wa Dawĩdĩ, abya mũhanĩ, omundu wʼeriminya, nʼomũhandĩkĩ; na Yehĩelĩ mugala wa Hakemonĩ abya haguma nʼabagala bʼomwami.

³³Na Ahĩtofelĩ abya mũhanĩ wʼOmwami. Na Hũsayĩ Omũarkĩ abya mwĩra wʼOmwami.

³⁴Nʼenyũma wa Ahĩtofelĩ mohabya Yehoyada mugala wa Benaya, na Abĩatarĩ. Yoabũ abya mũsondolĩ wʼemilondo yʼOmwami.