Read nande 1 Emyatsi yʼEmigulu 28 Bible Online

1 Emyatsi yʼEmigulu 28 - nande bible

1 Emyatsi yʼEmigulu 28

¹Neryo Dawĩdĩ mwahĩndanĩa abakulu bosĩ bʼAbaĩsraelĩ eYerũsalema haguma nʼabakulu bʼebihanda, nʼaba kulu bʼemilondo abakolera omwami omo kĩtũlĩ, nʼabakulu bʼamaelfu nʼabakulu bʼamagana, nʼabalangĩrĩ oko bindu byosĩ nʼebihangulo byʼOmwami nʼebyʼabagala buwe, haguma nʼabagombe bʼenyũmba, nʼesyombangĩ, abalume bosĩ bʼamaka.

²Neryo omwami Dawĩdĩ mwahangana oko bisando biwe, mwabũga ati, Abagala betu nʼabandu bage mũnyowe; ũkwʼĩngye kyabya omo mutima wage erĩhĩmba enyũmba yʼebiro byosĩ busana nʼerĩsandũko lyʼerilagana lyʼOmwami Mukulu, na busana nʼekĩtũmbĩ kyʼebisando kya Nyamuhanga wetu; nage nabya ĩnabĩrĩtegekanĩa busana nʼerĩhĩmba.

³Nĩkwa Nyamuhanga mwanyibwira ati, Sĩwendĩsyahĩmba enyũmba busana nʼerĩna lyage, kusangwa uli mundu wʼamalwa, ĩwabĩrĩũta omusasi.

⁴Nĩkwa Omwami Mukulu, Nyamuhanga wa Ĩsraelĩ, mwayisoga ngye omo kĩtũnga kyosĩ kya tata wage eribya mwami busana na Ĩsraelĩ kera na kera. Kusangwa abiriyisoga Yũda eribya mũsondolĩ; neryo omo kĩtũnga kya Yũda, ekĩtũnga kya tata wage; nʼomo katĩkatĩ kʼabagala ba tata wage mokyamũtsemesya erinyiyira mo mwami oko Baĩsraelĩ bosĩ.

⁵Nʼoko bagala bage bosĩ (kusangwa Omwami Mukulu abirimba bagala bangi), abiriyisoga Solomono, mugala wage, erĩĩkala oko kĩtũmbi kyʼobwami kyʼOmwami Mukulu busana nʼAbaĩsraelĩ.

⁶Neryo mwambwira ati, mugala wawe Solomono, asyahĩmba enyũmba yage nʼebibuga byage; kusangwa nabiriyisoga ye eribya mugala wage, nage nasyabya tata wuwe.

⁷Nage nasyahanganĩa obwami buwe ebiro byosĩ, amabya akakwamirira erikola ebihano byage, nʼebilayiro byage, nga mũnabwĩre.

⁸Neryo lino omo meso wʼAbaĩsraelĩ bosĩ, endeko yʼOmwami Mukulu, na Nyamuhanga ĩnĩanowĩre, mũtegaye nʼerisonda-sonda ebihano byosĩ byʼOmwami Mukulu Nyamuhanga wenyũ; mutoke erĩsĩgalya ekihugo kibuya ekĩ, nʼerĩsĩgakyo mo mwandu busana nʼabana benyũ enyũma kwĩnywe kera na kera.

⁹Nawe Solomono, mugala wage, Uminye Nyamuhanga wa tata wawe, umukolere nʼomutima owahĩkene nʼomo bũlengekanĩa obukanza; kusangwa Omwami Mukulu akasondaya emitima yosĩ nʼeriminya amaganĩryo gosĩ wʼobũlengekanĩa. Wamamusonda-sonda, asyabanika ukʼuwe; nĩkwa wamamũsĩga, asyakugana kera na kera.

¹⁰Na lino ũyĩrebaye; kusangwa Omwami Mukulu abiriyisoga we erĩhĩmba enyũmba busana nʼahabũyĩrĩre; Ũsĩkaye omutima, ukolekyo.

¹¹Neryo Dawĩdĩ mwaha mugala wuwe ye Solomono ekĩsosekanĩo kyʼekĩsekũ kyʼeHekalũ, nʼamanyũmba wayo, nʼekyʼesyombĩso syayo, nʼekyʼebyumba byayo byʼendata, nʼebyumba byayo byʼomwisi, nʼomwanya wʼekĩtũmbĩ kyʼeriganyira;

¹²nʼekĩsosekanĩo kyʼebyosĩ ebyo abya awite omo bũlengekanĩa, busana nʼebibuga byʼenyũmba yʼOmwami Mukulu, na busana nʼebyumba ebĩtĩmbĩre kuyo, busana nʼesyombĩso syʼenyũmba ya Nyamuhanga, na busana nʼesyombĩso syʼebindu ebĩhĩgwĩre;

¹³nibya busana nʼemihango yʼabahererĩ nʼeyʼAbalawĩ, na busana nʼerikola lyosĩ lyʼomũbĩrĩ wʼenyũmba yʼOmwami Mukulu, na busana nʼebindu byosĩ byʼomũbĩrĩ omo nyũmba yʼOmwami Mukulu;

¹⁴busana nʼebindu byʼesyamagetsi, obũlĩto bwʼesyamagetsi busana nʼebindu byosĩ byʼemĩsĩndo yosĩ yʼomũbĩrĩ; busana nʼebindu byʼekĩtsĩpa, obũlĩto bwʼekĩtsĩpa busana nʼebindu byosĩ byʼemihanda yosĩ yʼomũbĩrĩ;

¹⁵nʼobũlĩto bwʼesyamagetsi busana nʼebĩhambĩrĩrĩ byʼesyotala syʼesyamagetsi nʼesyotala syabyo syʼesyamagetsi, haguma nʼobũlĩto bwʼobuli kĩhambĩrĩrĩ kyʼesyotala nʼesyotala syakyo; nʼobũlĩto bwʼekĩtsĩpa busana nʼebĩhambĩrĩrĩ byʼesyotala byʼekĩtsĩpa, haguma nʼobũlĩto bwʼobuli kĩhambĩrĩrĩ kyʼesyotala nʼesyotala syakyo ngʼomũbĩrĩ wʼobuli kĩhambĩrĩrĩ kyʼetala.

¹⁶Nʼesyamagetsi omo bũlĩto bwasyo, busana nʼemesa yʼamandu wʼerĩkanganĩa, busana nʼobuli mesa; nʼebĩtsĩpa busana nʼesyomesa syʼekĩtsĩpa;

¹⁷nʼesyombugo, nʼamatũba, nʼesyondehĩ syʼesyamagetsi esĩtũkwĩre; na busana nʼebibindi byʼesyamagetsi omo bũlĩto bwasyo busana nʼobuli kibindi; kandi busana nʼebibindi byʼekĩtsĩpa nʼobũlĩto bwʼobuli kibindi.

¹⁸Na busana nʼekiherero kyʼobukwa omo syamagetsi esĩtũkwĩre omo lulengo lwʼobũlĩto bwasyo, nʼesyamagetsi busana nʼekĩsosekanĩo kyʼegalĩ, amakerũbĩ awasanzĩre ebĩpũpa byago, nʼeriswika erĩsandũlko lyʼerilagana lyʼOmwami Mukulu.

¹⁹Dawĩdĩ ati, Emĩbĩrĩ yosĩ eyĩ Omwami Mukulu abĩrĩnyĩmĩnyĩsyayo omo masako omo byala biwe ũkwʼĩngye, omo mĩbĩrĩ yosĩ yʼekĩsosekanĩo ekĩ.

²⁰Neryo Dawĩdĩ mwabwira mugala wuwe Solomono ati, Ubye nʼamaka, uhande omutima, ukolebyo. Sigubahe, kutse erĩhanga-hangya; kusangwa Omwami Mukulu Nyamuhanga, ye Nyamuhanga wage, ali haguma nawe; siendisyakuhigukalira, kutse erĩkũsĩga, erĩhĩka aho erikola lyosĩ lyʼomũbĩrĩ wʼenyũmba yʼOmwami Mukulu lyasyahwera.

²¹Neryo, lebaya, hali mihango yʼabahererĩ nʼeyʼAbalawĩ, busana nʼomũbĩrĩ wʼenyũmba ya Nyamuhanga; kandi nʼobuli mundu munyima-nyima, oyo anzĩre, asyabya haguma nawe omo mĩsĩndo yosĩ yʼomũbĩrĩ; nʼabasondolĩ nibya nʼabandu bosĩ basyabya omo hamũlĩ yawe mo ndeke.